ຜ່ອນຜັນລົງອີກ! ເຊກອງແຈ້ງໂຈະຕັ້ງຈຸດກວດກາ ແລະ ກັກກັນຄົນເຂົ້າອອກລະຫວ່າງເມືອງ ພາຍໃນແຂວງ

ຜ່ອນຜັນລົງອີກ! ເຊກອງແຈ້ງໂຈະຕັ້ງຈຸດກວດກາ ແລະ ກັກກັນຄົນເຂົ້າອອກລະຫວ່າງເມືອງ ພາຍໃນແຂວງ

6th May 2020 0 By Education

ໃນໄລຍະຜ່ານມາ ນັບຕັ້ງແຕ່ປະເທດລາວເຮົາມີການລະບາດຂອງພະຍາດໂຄວິດ-19 ບັນດາແຂວງໃນທົ່ວປະເທດ ລ້ວນເຂັ້ມງວດໃນການຈັດຕັ້ງປະຕິບັດມາດຕະການເຝົ້າລະວັງຕ່າງໆ ເພື່ອປ້ອງກັນການລະບາດຂອງພະຍາດດັ່ງກ່າວເຂົ້າແຂວງຂອງຕົນ ເປັນຕົ້ນແມ່ນມາດຕະການຕັ້ງຈຸດກວດກາ ຈໍາກັດຄົນເຂົ້າ-ອອກພາຍໃນແຂວງ, ແຕ່ມາຮອດປັດຈຸບັນສະພາບການລະບາດພາຍໃນປະເທດເຮົາເລີ່ມເບົາບາງລົງ ໂດຍບໍ່ພົບຜູ້ຕິດເຊື້ອໃໝ່ເປັນເວລາດົນຕິດຕໍກັນເຖິງ 20ກວ່າວັນແລ້ວ, ຫຼ້າສຸດ ແຂວງເຊກອງ ໄດ້ອອກແຈ້ງການໂຈະຈຸດກວດກາ ແລະ ກັກກັນຄົນເຂົ້າອອກລະຫວ່າງເມືອງ ພາຍໃນແຂວງ ແລ້ວ.

ອີງຕາມແຈ້ງການຂອງຄະນະສະເພາະກິດ ຕ້ານພະຍາດໂຄວິດ-19 ແຂວງເຊກອງ ເລື່ອງໂຈະຈຸດກວດກາ ແລະ ກັກກັນຄົນເຂົ້າອອກລະຫວ່າງເມືອງ ພາຍໃນແຂວງ ສະບັບເລກທີ 06/ສພຂ, ລົງວັນທີ 5 ພຶດສະພາ 2020 ລະບຸໄວ້ວ່າ

1 ໃຫ້ຍົກເລີກຈຸດກວດກາ 2ຈຸດຂອງເມືອງລະມາມ ຄື: ຈຸດກວດກາຂົວຂ້າມແມ່ນໍ້າເຊກອງທາງຂຶ້ນເມືອງດາກຈຶງ ແລະ ຈຸດກວດກາປະຕູໂຂງຫຼັກ 5 ແລະ ຍົກເລືອກຈຸດເຊື່ອມຕໍ່ລະຫວ່າງເມືອງຕໍ່ເມືອງ

2 ໃຫ້ສືບຕໍ່ຮັກສາຈຸດກວດກາ ເຂດເຊື່ອມຕໍ່ລະຫວ່າງແຂວງຕໍ່ແຂວງຄື ຈຸດກວດກາເຊນ້ອຍ ເມືອງລະມາມ ແລະ ຈຸດກວດກາບ້ານຫຼັກຂາວ ແລະ ຈຸດກວດບ້ານກົກພຸງ ເມືອງທ່າແຕງ

3 ສໍາລັບເມືອງດາກຈຶງໃຫ້ສືບຕໍ່ຮັກສາຈຸດກວດກາຄື ຈຸດກວດກາບ້ານດາກລານ ແລະ ຈຸດກວດກາບ້ານດາກຂາຍທີ່ເຊື່ອມຕໍ່ກັບແຂວງອັດຕະປື

4 ເມືອງກະລຶມ ແມ່ນໃຫ້ສືບຕໍ່ຮັກສາຈຸດກວດກາຢູ່ເມືອງເກົ່າ

5 ໃຫ້ແຕ່ລະເມືອງມີຈຸດກັກກັນ ປະຈໍາເມືອງລະ 1ຈຸດ ເພື່ອຮອງຮັບບັນດາຊ່ຽວຊານ ແລະ ບຸກຄົນທີ່ມາຈາກຕ່າງປະເທດເຂົ້າມາແຂວງ

6 ໃນໄລຍະສືບຕໍ່ແຕ່ວັນທີ 4 ຫາ 17 ພຶດສະພາ 2020 ຖ້າຫາກບັນດາບໍລິສັດຈະດໍາເນີນກິດຈະການ ຕ້ອງມີໜັງສືສະເໜີຫາຄະນະນໍາຂັ້ນແຂວງ ເພື່ອພິຈາລະນາ ແລະ ແຕ່ງຕັ້ງຄະນະສະເພາະກິດຂັ້ນແຂວງລົງກວດກາ ແລະ ປະເມີນຄືນ

7 ມອບໃຫ້ຄະນະສະເພາະກິດຂັ້ນເມືອງ 4ຕົວເມືອງ ຈົ່ງຮັບຮູ້ ແລະ ພ້ອມກັນຈັດຕັ້ງປະຕິບັດ ໃຫ້ເຂັ້ມງວດ ແລະ ມີຄວາມຮັບຜິດຊອບສູງ ຖ້າຫາກວ່າມີການປ່ຽນແປງ ຫຼື ແຈ້ງການໃໝ່ ຫຼັງຈາກວັນທີ 17 ພຶດສະພາ ແລ້ວຈຶ່ງຈະແຈ້ງໃຫ້ຊາບຕາມພາຍຫຼັງ.