ຍັງສືບຕໍ່ຢູ່! ນັກລົງທຶນຈີນ ສຸມໃສ່ບຸກເບີກເນື້ອທີ່ປູກກ້ວຍຫອມຢູ່ແຂວງບໍ່ແກ້ວໃຫ້ທັນລະດູການ

ຍັງສືບຕໍ່ຢູ່! ນັກລົງທຶນຈີນ ສຸມໃສ່ບຸກເບີກເນື້ອທີ່ປູກກ້ວຍຫອມຢູ່ແຂວງບໍ່ແກ້ວໃຫ້ທັນລະດູການ

7th May 2020 0 By Education

ປັດຈຸບັນ ມີນັກລົງທຶນທັງພາຍໃນ ແລະ ຕ່າງປະເທດຈໍານວນບໍ່ໜ້ອຍທີ່ລົງທຶນສຸມໃສ່ການປູກກ້ວຍຫອມຢູ່ລາວເຮົາ ໂດຍມີຢູ່ຫຼາຍແຂວງໃນທົ່ວປະເທດ ແຕ່ໃນໄລຍະຜ່ານມາກໍ່ເກີດມີຫາງສຽງຈາກປະຊາຊົນຫຼາຍຢ່າງຕໍ່ກັບຜົນກະທົບທີ່ໄດ້ຮັບຈາກສວນກ້ວຍ ດັ່ງນັ້ນ ລັດຖະບານຈຶ່ງກໍານົດໃຫ້ການປູກກ້ວຍຕ້ອງເປັນກະສິກໍາສະອາດເທົ່ານັ້ນ. ຫຼ້າສຸດ ນັກລົງທຶນຢູ່ແຂວງບໍ່ແກ້ວ ເລັ່ງບຸກເບີກເນື້ອທີ່ດິນເພື່ອກຽມລົງປູກກ້ວຍຫອມໃຫ້ຖ່ວງທັນກັບລະດູການ.

ອີງຕາມການລົງເກັບກໍາຂໍ້ມູນຕົວຈິງຂອງຫ້ອງການ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເມືອງເມິງໃນວັນທີ 5 ພຶດສະພາ 2020 ນີ້ ເຊິ່ງນໍາພາໂດຍ ທ່ານ ນິລະພົບ ທອງສະຫວັດ ກໍາມະການພັກເມືອງ ຫົວໜ້າຫ້ອງການຖະແຫຼງຂ່າວ,ວັດທະນະທໍາ ແລະ ທ່ອງທ່ຽວເມືອງພ້ອມດ້ວຍພະນັກງານວິຊາການ ແລະ ບໍລິສັດເຈີນຢຸຍເຊີ່ນ ຂາເຂົ້າ-ຂາອອກ ຈໍາກັດ ທີ່ມາລົງທຶນ ປູກພືດກະສິກໍາສະອາດຢູ່ເມືອງເມິງໃນເນື້ອທີ່ 100 ກວ່າ ເຮັກຕ່າ ຢູ່ເຂດໂຮງງານເຈ້ຍເກົ່າ ບ້ານປຸ່ງຈອມແສງ ແລະ ເຂດຫົວນໍ້າຄາລວມມູນຄ່າ ການລົງທຶນທັງໝົດ 500,000 ໂດລາສະຫະລັດ ໃນນີ້ທຶນຈົດທະບຽນ ມູນຄ່າ 200, 000 ໂດລາສະຫະລັດ.

ຈຸດປະສົງຫຼັກຂອງບໍລິສັດ ແມ່ນເພື່ອເຂົ້າມາລົງທຶນປູກກ້ວຍຫອມ, ພືດກະສິກໍາອື່ນໆ ແລະ ລ້ຽງສັດຈໍານວນໜຶ່ງ, ໂດຍປະຕິບັດຕາມສັນຍາ ວ່າດ້ວຍ ໂຄງການສໍາປະທານ ເນື້ອທີ່ດິນລັດ ເພື່ອປູກພືດກະສິກໍາສະອາດ GAP ຢູ່ເມືອງເມິງ ແຂວງບໍ່ແກ້ວ ເລກທີ 159/ ພຜຫ.ສສ.ບກ, ອີງຕາມ ຂໍ້ຕົກລົງ ວ່າດ້ວຍ ການເຫັນດີມອບໃຫ້ ພະແນກແຜນການ ແລະ ການລົງທຶນແຂວງບໍ່ແກ້ວ ຕ່າງໜ້າອົງການປົກຄອງແຂວງ, ເຊັນສັນຍາ ວ່າດ້ວຍໂຄງການ ສໍາປະທານ ເນື້ອທີ່ດິນລັດ ເພື່ອປູກພືດກະສິກໍາສະອາດ GAP ແລະ ໃບອະນຸຍາດລົງທຶນຂອງຄະນະກໍາມະການສົ່ງເສີມ ແລະ ຄຸມຄອງການລົງທຶນແຂວງ ບໍ່ແກ້ວ, ເຊິ່ງປັດຈຸບັນແມ່ນຢູ່ໃນຂັ້ນຕອນການບຸກເບີກພື້ນທີ່ປູກກ້ວຍຫອມ ແລະ ກ້າເບ້ຍກ້ວຍເພື່ອກະກຽມລົງມືປູກໃນມໍ່ໆນີ້.

ນອກຈາກນີ້ບໍລິສັດຍັງໄດ້ສຸມໃສ່ປັບປຸງເສັ້ນທາງແຕ່ບ້ານຊຽງກົກ,ເມືອງລອງ, ແຂວງຫຼວງນໍ້າທາ ຫາ ເມືອງເມິງ ແຂວງບໍ່ແກ້ວ ເຊິ່ງໜ້າວຽກປະກອບມີ ການກໍ່ສ້າງຂົວຂ້າມນໍ້າຫ້ວຍຊຽງກົກ, ປັບປຸງຂົວນໍ້າຟ້າດ້ວຍການເສີມໂຄງເຫຼັກຂອງຂົວ ແລະ ຂະຫຍາຍເສັ້ງທາງໃຫ້ກວ້າງອອກຕື່ມເພື່ອລະດວກໃນການສັນຈອນໄປ-ມາ ແລະ ຂົນສົ່ງສິນຄ້າ ແຕ່ເມືອງເມິງ, ແຂວງບໍ່ແກ້ວ ຫາ ເມືອງລອງ, ແຂວງຫຼວງນໍ້າທາ ອອກສູ່ ສປຈີນໃຫມີຄວາມສະດອກ, ແລະ ວ່ອງໄວກວ່າເກົ່າ.

ທີ່ມາ: ໜັງສືພິມແຂວງບໍ່ແກ້ວ