ໜຶ່ງດຽວຂອງນັກສຶກສາຕ່າງປະເທດທີ່ໄດ້ກຽດນິຍົມຢູ່ຣັດເຊຍ

ໜຶ່ງດຽວຂອງນັກສຶກສາຕ່າງປະເທດທີ່ໄດ້ກຽດນິຍົມຢູ່ຣັດເຊຍ

10th May 2020 0 By Education

ນັກສຶກສາລາວສ້າງຊື່ສຽງຢູ່ຕ່າງປະເທດອີກແລ້ວ, ຜູ້ນີ້ຈົບຈາກຣັດເຊຍດ້ານການທະຫານ ມາພ້ອມປະກາສະນີຍະບັດກຽດນິຍົມ ສາຍທີ່ຕ້ອງຮຽນຢ່າງເຄັ່ງຄຽດ ທັງບົດຮຽນ ແລະລະບຽບວິໄນ ເພິານໄດ້ມາແບບນີ້ຖືວ່າບໍ່ທຳມະດາ, ພໍ່ແມ່ຄົງພູມໃຈ ກົມກອງຈະອ້າແຂນຮັບບຸກຄົນຄຸນນະພາບກັບປະເທດຢ່າງສົມກຽດ.

ພິທີມອບ-ຮັບປະກາສະນີຍະບັດທີ່ຈັດຂຶ້ນໃນວັນທີ 10 ພຶດສະພາ 2020 ທີ່ໄດ້ມີການມອບໃບປະກາສະນິຍະບັດ ຈົບການສຶກສາ ທີ່ ວິທະຍາຄານທະຫານ ຣັດເຊຍ. ເຊິ່ງ 1 ໃນ ຈໍານວນ ນັກສຶກສາລາວ ແມ່ນໄດ້ ປະສົບຜົນສໍາເລັດ ອັນສູງ ທີ່ໄດ້ຮັບກຽດຖືກຄັດເລືອກໃຫ້ເປັນນັກສືກສາຕ່າງປະເທດພຽງຄົນດຽວໃນປີນີ້ ທີ່ໄດ້ຮັບຫລຽນຄຳຈາກກະຊວງປ້ອງກັນປະເທດລັດເຊຍ (Золотой медаль) ແລະ ພ້ອມທັງໃບປະກາດແດງ (красный диплом) ຂອງວິທະຍາຄານທະຫານອາກາດລັດເຊຍແຫ່ງນີ້.

ຜູ້ຄວ້າມາສອງຜົນງານໃຫຍ່ຄືຫຼຽນຄຳ ແລະ ປະກາສະນີຍະບັດກຽດນິຍົມຄື ສະຫາຍ ວຽງພອນ ສີສົມລິດ ປະດັບຫຼຽນ ທີ່ຕົນໄດ້ຮັບໃສ່ທຸງຊາດລາວ ດ້ວຍຄວາມພາກພູມໃຈ

ຊາຍໜຸ່ມຜູ້ຮຽນດີບອກວ່າ: ໃນທີ່ສຸດເປັນເວລາເກືອບ 6 ປີ ທີ່ຜ່ານການສືກສາຢູ່ ສ. ຣັດເຊຍມາບາດນີ້ກໍໄດ້ຈົບລົງດ້ວຍຜົນສຳເລັດທີ່ເກີນຄວາມຄາດຫມາຍເອົາໄວ້, ອາດເປັນເພາະຄວາມອົດທົນຕັ້ງໃຈແລະເອົາໃຈໃສ່ໃນການຄົ້ນຄວ້າແຂ່ງຂັນກັນໃນການຮ່ຳຮຽນ, ອີກອັນຫນື່ງກໍຄືການປະຕິບັດກົດລະບຽບວິໄນຂອງໂຮຮຽນໄດ້ຢ່າງເຂັ້ມງວດ.


ເຮັດໃຫ້ຜົນລວມທັງຫມົດຂອງການຮຽນຜ່ານມາບວກໃສ່ກັບການປະພຶດຕົນທີ່ຖືກຕ້ອງເຫມາະສົມຈີ່ງກາຍເປັນທີ່ຍອມຮັບຂອງຄູອາຈານ, ຂອງຜູ້ບັນຊາການແຕ່ຂັ້ນຂອງໂຮງຮຽນ, ດ້ວຍເຫດນີ້ຈີ່ງຖືກຄັດເລືອກໃຫ້ເປັນນັກສືກສາຕ່າງປະເທດພຽງຄົນດຽວໃນປີນີ້ ທີ່ໄດ້ຮັບຫລຽນຄຳຈາກກະຊວງປ້ອງກັນປະເທດລັດເຊຍ (Золотой медаль) ແລະ ພ້ອມທັງໃບປະກາດແດງ (красный диплом) ຂອງວິທະຍາຄານທະຫານອາກາດລັດເຊຍແຫ່ງນີ້.

ສະຫາຍ ວຽງພອນ ສີສົມລິດ ບອກວ່າ: ຮູ້ສືກພາກພູມໃຈແລະເປັນກຽດທີ່ສຸດທີ່ໄດ້ຮັບຫລຽນຄຳຫນ່ວຍນີ້ຍ້ອນຜົນຂອງຄະແນນຮຽນ ຈີ່ງຢາກຂໍຕິດຫລຽນການີ້ເພື່ອເປັນກຽດໃຫ້ກັບກອງທັບປະຊາຊົນລາວທະຫານອາກາດລາວກອງພັນໃຫຍ່702ທະຫານອາກາດ (ສິດເກົ່າ ມສ ວຽງໄຊ ແຂວງຫົວພັນ)

ຢ່າງນ້ອຍໆມື້ນີ້ຊື່ປະເທດລາວກໍໄດ້ຖືກເອີ້ນຂື້ນໃນພິທີຮັບໃບປະກາສະນິຍະບັດທີ່ມີນັກສືກສາມາຈາກອີກຫລາຍໆປະເທດເຂົ້າຮ່ວມ, ແລ້ວເທື່ອນີ້ກໍຈະເປັນຄັ້ງທຳອິດທີ່ທຸງຊາດລາວ ແລະ ຊື່ຂອງທະຫານລາວຈະໄດ້ຖືກສະລັກໄວ້ໃນແຜ່ນກະດານລາຍຊື່ນັກສຶກສາຫລຽນຄຳ (золотой медалист)ຂອງວິທະຍາຄານແຫ່ງນີ້.

ຕ້ອງຂໍຂອບໃຈທຸກກຳລັງແຮງໃຈແລະການໃຫ້ໂອກາດໃຫ້ການຊ່ວຍເຫລືອຈາກທຸກພາກສ່ວນທີ່ກ່ຽວຂ້ອງຕະຫລອດມາ