ເມືອງກະລຶມ ແຂວງເຊກອງ ເປັນເມືອງຈົບຊັ້ນມັດທະຍົມຕອນຕົ້ນບຳລຸງຢ່າງເປັນທາງການ

ພິທີປະກາດ ເມືອງກະລຶມ ແຂວງເຊກອງ ເປັນເມືອງ ຈົບຊັ້ນມັດທະຍົມຕອນຕົ້ນບຳລຸງ ໄດ້ຈັດຂື້ນໃນວັນທີ 30 ທັນວານີ້ ທີ່ສະໂມສອນເມືອງດັ່ງກ່າວ, ໃຫ້ກຽດເຂົ້າຮ່ວມມີ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການແລະກິລາ, ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ຜູ້ຊີ້ນຳຂົງເຂດວຽກງານວັດທະນະທຳສັງຄົມຂັ້ນແຂວງ, ທ່ານ ຄຳໄພ ສິມມະວັດ ວ່າການຫົວໜ້າພະແນກສຶກສາທິການແລະກິລາແຂວງເຊກອງ,ມີທ່ານ ອໍບົວລາ ອ່ອນມະໄລວົງ ວ່າການເຈົ້າເມືອງ-ເມືອງກະລຶມ, ມີຄະນະປະຈຳພັກແຂວງ,ຄະນະປະຈຳພັກເມືອງກະລຶມ-ເມືອງຕະໂອ້ຍ ແຂວງສາລະວັນ ພ້ອມດ້ວຍພະແນກການອອ້ມຂ້າງແຂວງ, ຫ້ອງການອອ້ມຂ້າງເມືອງເຂົ້າຮ່ວມ,

ກ່ອນອື່ນໃນພິທີ ໄດ້ຮັບຟັງການລາຍງານ ການຈັດຕັ້ງການຮຽນ-ການສອນບຳລຸງຍົກລະດັບການສຶກສາຊັ້ນມັດທະຍົມຕອນຕົ້ນຂອງເມືອງກະລຶມ ຈາກທ່ານ ອຸດົມສຸກ ບຸດສວນທຽນ ຮອງເລຂາພັກເມືອງກະລຶມ ຜູ້ຊີ້ນຳຂົງເຂດວຽກງານວັດທະນະທຳສັງຄົມຂັ້ນເມືອງ ໂດຍຍົກໃຫ້ເຫັນວ່າ: ເມືອງກະລຶມເປັນເມືອງພູດອຍ ທຸລະກັນດານ ມີເນື້ອທີ່ທັງໝົດ 3ແສນ 69 ພັນ 700 ເຮັກຕາ,ມີພູດອຍສູງຊັນກວມ 95%, ພູພຽງກວມ 5%, ມີພົນລະເມືຶອງທັງໝົດ 18 ພັນກວ່າຄົນ,ຍິງ 7ພັນກວ່າຄົນ,ມີ 3ພັນ 239 ຄອບຄົວ,ມີ2 ພັນ850 ຫຼັງຄາເຮືອນ, ມີ53ບ້ານ,ແບ່ງອອກເປັນ 7ກຸ່ມບ້ານ, ມີ 4ເຜົ່າຢູ່ຮ່ວມກັນຄື: ເຜົ່າກຼຽງ,ກະຕູ່, ຈະຕ໋ອງ ແລະເຜົ່າຕະໂອ້ຍ, ລາຍຮັບທົ່ວເມືອງສະເລ່ຍ 360 ໂດລາ/ຄົນ/ປີ,

ມີປະຊາກອນອາຍຸ 15-40 ທັງໝົດ 6ພັນ 879 ຄົນ,ຍິງ 3ພັນ277ຄົນ,ໃນນີ້ບໍ່ຮູ້ໜັງສືພຽງ 133ຄົນ,ຍິງ80ຄົນ, ຮຽນຈົບປະຖົມ 6ພັນ 746 ຄົນ,ຍິງ 3ພັນ 197ຄົນ, ເທົ່າກັບ 98,06%, ຮຽນຈົບມັດທະຍົມສຶກສາຕອນຕົ້ນສາມັນ 3ພັນ664 ຄົນ,ຍິງ 1ພັນ903ຄົນ, ກຸ່ມເປົ້າໝາຍຮຽນ ມໍຕົ້ນບຳລຸງ 1ພັນ 69ຄົນ,ຍິງ 381ຄົນ, ສອບເສັງຈົບມໍຕົ້ນບຳລຸງໄດ້ 995 ຄົນ,ຍິງ 346ຄົນ, ເທົ່າກັບ 93,07%, ທົ່ວເມືອງກະລຶມມີໂຮງຮຽນມັດທະຍົມສຶກສາຕອນຕົ້ນທັງໝົດ 3ແຫ່ງ, ມີ 25ຫ້ອງຮຽນ, ມີນັກຮຽນທັງໝົດ 1ພັນ 42 ຄົນ,ຍິງ 444ຄົນ,ມີຄູ-ອາຈານສອນທັງໝົດ 39ຄົນ,ຍິງ 10ຄົນ,

ມີອັດຕາເຂົ້າຮຽນລວມ 59%,ອັດຕາເລື່ອນຂັ້ນ 87,25%,ອັດຕາຄ້າງຫ້ອງ 2,1%,ອັດຕາປະລະການຮຽນ 10% ແລະອັດຕາຈົບຊັ້ນ 74%, ຜ່ານການຈັດປະຕິບັດການຮຽນ-ການສອນຕົວຈິງມາຮອດສົກຮຽນ 2018-2019 ສາມາດປະກາດເປັນບ້ານຈົບຊັ້ນມັດທະຍົມສຶກສາຕອນຕົ້ນບຳລຸງປະຊາຊົນ 46ບ້ານ ເທົ່າກັບ 86%,ຂອງຈຳນວນບ້ານທັງໝົດ,ມີເປົ້າໝາຍເຂົ້າຮຽນທັງໝົດ 995 ຄົນ,ຍິງ346ຄົນ ແລະສາມາດຈົບຊັ້ນມັດທະຍົມສຶກສາຕອນຕົ້ນບຳລຸງປະຊາຊົນມີຈຳນວນ 995ຄົນ,ຍິງ346ຄົນ ເທົ່າກັບ 100%,

ໃນໂອກາດນີ້ ທ່ານ ຄຳໄພ ສິມມະວັດ ວ່າການຫົວໜ້າພະແນກສຶກສາທິການແລະກິລາແຂວງເຊກອງ ກໍ່ໃຫ້ກຽດຜ່ານ ມະຕິຕົກລົງ ຂອງກະຊວງສຶກສາທິການແລະກິລາ ສະບັບເລກທີ141/ກສນ, ລົງວັນທີ 26ທັນວາ 2019 ວ່າດ້ວຍການສຳເລັດການສຶກສາຊັ້ນມັດທະຍົມຕອນຕົ້ນລະບົບບຳລຸງ, ຫຼັງຈາກນັ້ນ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການແລະກິລາ ກໍ່ໃຫ້ກຽດມອບໃບຢັ້ງຢືນ ເມືອງກະລຶມເປັນເມືອງຈົບມັດທະຍົມສຶກສາຕອນຕົ້ນບຳລຸງ ແລະກ່າວຮັບໂດຍ ທ່ານ ອໍບົວລາ ອ່ອນມະໄລວົງ ວ່າການເຈົ້າເມືອງ-ເມືອງກະລຶມ ພ້ອມນີ້ການນຳຂັ້ນກະຊວງ,ຂັ້ນແຂວງແລະຂັ້ນເມືອງ ກໍ່ໄດ້ເປີດປ້າຍເມືອງກະລຶມເປັນເມືອງຈົບມັດທະຍົມສຶກສາຕອນຕົ້ນບຳລຸງຢ່າງເປັນທາງການ ແລະລັ່ນຄ້ອງ 9ບາດເພື່ອເປັນສິລິມຸງຄຸນຕື່ມອີກ.

ຂ່າວ: ກາດແກ້ວ