ຕອບຄໍາຖາມ! ການເປີດ-ປິດດ່ານທຸກປະເພດ ແລະ ການອອກວີຊາ? ຫຼັງມີມາດຕະການຜ່ອນຜັນເພີ່ມອີກ

ຕອບຄໍາຖາມ! ການເປີດ-ປິດດ່ານທຸກປະເພດ ແລະ ການອອກວີຊາ? ຫຼັງມີມາດຕະການຜ່ອນຜັນເພີ່ມອີກ

15th May 2020 0 By Education

ຍັງເປັນຄໍາຖາມຄາໃຈໃຫ້ກັບນັກເດີນທາງທັງຫຼາຍ ສໍາລັບການເປີດດ່ານທຸກປະເພດໃນລາວ ຫຼັງມີການສັ່ງປິດໄປກ່ອນໜ້ານີ້ ເພື່ອປ້ອງກັນ, ຄວບຄຸມການລະບາດຂອງພະຍາດໂຄວິດ-19 ແລະ ອະນຸຍາດຜູ້ໄປວຽກທາງລັດຖະການ ຫຼື ໄດ້ຮັບອະນຸຍາດຈາກຄະນະສະເພາະກິດ ແລະ ລົດຂົນສົ່ງສິນຄ້າຜ່ານໄດ້ເທົ່ານັ້ນ.

ແຕ່ປັດຈຸບັນສະພາບການລະບາດຂອງພະຍາດນີ້ໃນປະເທດເຮົາເລີ່ມຢູ່ໃນສະຖານະການທີ່ດີຂຶ້ນ ໂດຍບໍ່ມີຜູ້ຕິດເຊື້ອຕິດຕໍ່ກັນເປັນເວລາ 1ເດືອນກວ່າແລ້ວ ແຕ່ລັດຖະບານກໍ່ບໍ່ໄດ້ລະເຫຼີງມີການຜ່ອນຜັນບາງມາດຕະການລົງ ແຕ່ກໍ່ຍັງໃຫ້ສືບຕໍ່ປະຕິບັດບາງມາດຕະການທີ່ຈໍາເປັນຕໍ່ ເຊິ່ງໜຶ່ງໃນນັ້ນແມ່ນການສືບຕໍ່ປິດດ່ານທຸກປະເພດ ແລະ ໂຈະການອອກວີຊາ.

ອີງຕາມແຈ້ງການສະບັບເລກທີ 580/ຫສນຍ, ລົງວັນທີ 15 ພຶດສະພາ 2020, ລັດຖະບານໄດ້ກໍານົດລະອຽດບັນດາມາດຕະການຜ່ອນຜັນ ໃນໄລຍະວັນທີ 18 ພຶດສະພາ ຫາ 1 ມິຖຸນາ 2020 ແລະ ບາງມາດຕະການໃນຄໍາສັ່ງຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020.

ໃນແຈ້ງການດັ່ງກ່າວໄດ້ລະບຸໄວ້ຈັດເຈນເຖິງ 4ມາດຕະການທີ່ໃຫ້ສືບຕໍ່ຈັດຕັ້ງປະຕິບັດ ແຕ່ແອັດມິນຈະຍົກຂຶ້ນມາໃຫ້ແຟນເພຈໄດ້ຮູ້ກະຈ່າງແຈ້ງນໍາກັນ 2ຂໍ້ຄື: ໃຫ້ສືບຕໍ່ປິດ່ດ່ານປະເພນີ, ດ່ານທ້ອງຖິ່ນ ແລະ ດ່ານສາກົນ ສໍາລັບການເຂົ້າ-ອອກ ຂອງບຸກຄົນທົ່ວໄປ ເວັ້ນເສຍແຕ່ລົດຂົນສົ່ງສິນຄ້າ ຜູ້ທີ່ໄດ້ກໍານົດໄວ້ໃນຂໍ້ທີ 4.9 ຂອງແຈ້ງການສະບັບນີ້ ແລະ ຜູ້ທີ່ໄດ້ຮັບອະນະຍາດຈາກຄະນະສະເພາະກິດ.

ພ້ອມນີ້ກໍ່ໃຫ້ສືບຕໍ່ໂຈະການອອກວີຊາທຸກປະເພດ ໃຫ້ບຸກຄົນທົ່ວໄປ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດໂຄວິດ-19, ຍົກເວັ້ນແຕ່ ສໍາລັບນັກການທູດ, ຊ່ຽວຊານ, ວິຊາການ ແລະ ແຮງງານຕ່າງປະເທດ ທີ່ມີຄວາມຈຳເປັນ ແລະ ຮີບດ່ວນ ເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ທີ່ມີຄວາມສຳຄັນ ແລະ ຈຳເປັນ, ແຕ່ຕ້ອງປະຕິບັດມາດຕະການຕ່າງໆ ຕາມຄຳແນະນຳ ຂອງຄະນະສະເພາະກິດ. ສຳລັບຂັ້ນຕອນ ໃນການປະຕິບັດຕົວຈິງ ກະຊວງການຕ່າງປະເທດ ຈະອອກຄຳແນະນຳຕ່າງຫາກ.