ລັດຖະບານແຈ້ງ ຕະຫຼາດກາງຄືນໃຫ້ສືບຕໍ່ປິດ, ຮ້ານກິນ-ດື່ມ, ຮ້ານບັນເທີງຍັງບໍ່ໃຫ້ເປີດ

ລັດຖະບານແຈ້ງ ຕະຫຼາດກາງຄືນໃຫ້ສືບຕໍ່ປິດ, ຮ້ານກິນ-ດື່ມ, ຮ້ານບັນເທີງຍັງບໍ່ໃຫ້ເປີດ

16th May 2020 0 By Education

ຫຼາຍຄົນອາດຍັງສົງໄສ ແລະ ຍັງບໍ່ຮູ້ ຫຼື ມີຄໍາຖາມຄ້າງຄາໃນຫົວ ຫຼັງຈາກທີ່ຕ້ອງອົດບໍ່ໄດ້ໄປຍ່າງຕະຫຼາດສວນເຈົ້າອະນຸວົງ(ແຄມຂອງ) ມາໃນໄລຍະໜຶ່ງ ເນື່ອງຈາກລັດຖະບານສັ່ງປິດເພາະເປັນເຂດທີ່ມີຊຸມຊົນໜ້າແໜ້ນ, ຜູ້ຄົນແອອັດ ທັງນີ້ກໍ່ເພື່ອຄວບຄຸມການລະບາດຂອງພະຍາດໂຄວິດ-19.

ແຕ່ເຖິງຢ່າງໃດກໍ່ຕາມ ມາຮອດປັດຈຸບັນລັດຖະບານໄດ້ມີຫຼາຍມາດຕະການຜ່ອນຜັນ ເນື່ອງຈາກ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມຕິດຕໍ່ກັນເປັນເວລາ 1ເດືອນກວ່າແລ້ວ ແຕ່ເພື່ອເປັນການປ້ອງກັນ, ເພື່ອຄວາມປອດໄພບໍ່ໃຫ້ເກີດມີການລະບາດຮອບສອງ, ດັ່ງນັ້ນ ລັດຖະບານຈຶ່ງໃຫ້ສືບຕໍ່ປະຕິບັດເຂັ້ມງວດບາງມາດຕະການໃນຄໍາສັ່ງ 06/ນຍ, ເຊິ່ງໜຶ່ງໃນນັ້ນແມ່ນໃຫ້ສືບຕໍ່ປິດຕະຫຼາດກາງຄືນ.

ອີງຕາມແຈ້ງການສະບັບເລກທີ 580/ຫສນຍ, ລົງວັນທີ 15 ພຶດສະພາ 2020 ໃນຂໍ້ທີ 5. ໃຫ້ຮູ້ວ່າ: ເຫັນດີ ໃຫ້ສືບຕໍ່ປະຕິບັດຢ່າງເຂັ້ມງວດ ບາງມາດຕະການທີ່ໄດ້ກຳນົດໃນຄຳສັ່ງ 06/ນຍ, ລົງວັນທີ 29 ມີນາ 2020 ດັ່ງນີ້:

1 ສືບຕໍ່ປິດບັນດາກິດຈະການ ເປັນຕົ້ນ: ຕະຫຼາດກາງຄືນ, ຮ້ານບັນເທີງ, ຮ້ານກິນ-ດື່ມ (ເຫຼົ້າ, ເບຍ ແລະ ສິ່ງມຶນເມົາ), ຮ້ານຄາຣາໂອເກະ, ຮ້ານເກມ, ໂຮງສາຍຮູບເງົາ, ກາຊິໂນ ແລະ ການຈັດລາຍການແຂ່ງຂັນກິລາ ທີ່ມີຜູ້ເຂົ້າຊົມຈຳນວນຫຼາຍ ຊຶ່ງບໍ່ສາມາດຮັກສາໄລຍະຫ່າງເກີນກວ່າ 1 ແມັດໄດ້ ແລະ ມີຄວາມສ່ຽງ ຕໍ່ການຕິດເຊື້ອ

2 ສືບຕໍ່ຫ້າມຈັດກິດຈະກຳຊຸມນຸມ (ບໍ່ເປັນທາງການ), ຊຸມແຊວ ແລະ ງານສັງສັນ. ຫ້າມຈັດງານປະເພນີ ແລະ ງານດອງ ທີ່ມີຜູ້ເຂົ້າຮ່ວມເກີນ 50 ຄົນ ທີ່ບໍ່ສາມາດຮັກສາໄລຍະຫ່າງເກີນກວ່າ 1 ແມັດ ໄດ້ ແລະ ມີຄວາມສ່ຽງຕໍ່ການຕິດເຊື້ອ;

3 ສືບຕໍ່ປິດດ່ານປະເພນີ, ດ່ານທ້ອງຖິ່ນ ແລະ ດ່ານສາກົນ ສຳລັບການເຂົ້າ-ອອກ ຂອງບຸກຄົນທົ່ວໄປ, ເວັ້ນເສຍແຕ່ລົດຂົນສົ່ງສິນຄ້າ, ຜູ້ທີ່ໄດ້ກຳນົດໃນຂໍ້ທີ 4.9 ຂອງແຈ້ງການສະບັບເລກທີ 580/ຫສນຍ, ລົງວັນທີ 15 ພຶດສະພາ 2020 ແລະ ຜູ້ທີ່ໄດ້ຮັບການອະນຸຍາດຈາກຄະນະສະເພາະກິດ

4 ສືບຕໍ່ໂຈະການອອກວີຊາທຸກປະເພດ ໃຫ້ບຸກຄົນທົ່ວໄປ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດ COVID-19, ຍົກເວັ້ນແຕ່ ສໍາລັບນັກການທູດ, ຊ່ຽວຊານ, ວິຊາການ ແລະ ແຮງງານຕ່າງປະເທດ ທີ່ມີຄວາມຈຳເປັນ ແລະ ຮີບດ່ວນ ເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ທີ່ມີຄວາມສຳຄັນ ແລະ ຈຳເປັນ, ແຕ່ຕ້ອງປະຕິບັດມາດຕະການຕ່າງໆ ຕາມຄຳແນະນຳ ຂອງຄະນະສະເພາະກິດ. ສຳລັບຂັ້ນຕອນ ໃນການປະຕິບັດຕົວຈິງ ກະຊວງການຕ່າງປະເທດ ຈະອອກຄຳແນະນຳຕ່າງຫາກ.