ໜ້າຫ່ວງ! ພຽງ 9 ມື້ ລາວເຮົາມີຜູ້ຕິດເຊື້ອໄຂ້ຍຸງລາຍເພີ່ມຂຶ້ນ 149 ກໍລະນີ

ໜ້າຫ່ວງ! ພຽງ 9 ມື້ ລາວເຮົາມີຜູ້ຕິດເຊື້ອໄຂ້ຍຸງລາຍເພີ່ມຂຶ້ນ 149 ກໍລະນີ

21st May 2020 0 By Education

ຕາມການລາຍງານສູນຂ່າວສານການແພດສຸຂະສຶກສາ ກະຊວງສາທາລະນະສຸກ ໃຫ້ຮູ້ວ່າ: ປັດຈຸບັນ ເຊື້ອພະຍາດໄຂ້ຍຸງລາຍ ພວມແຜ່ລະບາດເປັນວົງກວ້າງໃນທົ່ວປະເທດ ພຽງແຕ່ 9 ມື້ (12-21/05/2020) ມີຜູ້ຕິດເຊື້ອໄຂ້ຍຸງລາຍ ເພີ່ມຂຶ້ນ 149 ກໍລະນີ; ນັບແຕ່ວັນທີ 28 ທັນວາ 2019-11 ພຶດສະພາ 2020 ມີຜູ້ຕິດເຊື້ອໄຂ້ຍຸງລາຍແລ້ວ 1.069 ກໍລະນີ, ເສຍຊີວິດ 2 ຄົນ ແລະ ມາຮອດວັນທີ 20 ພຶດສະພາ 2020 ນີ້ ມີຜູ້ຕິດເຊື້ອພະຍາດດັ່ງກ່າວແລ້ວ 1.263 ກໍລະນີ.

ສູນຂ່າວສານການແພດສຸຂະສຶກສາ ໃຫ້ຮູ້ຕື່ມວ່າ: ສະເພາະນະຄອນຫລວງວຽງຈັນ ພົບຜູ້ຕິດເຊື້ອໄຂ້ຍຸງລາຍ ຫລາຍກວ່າໝູ່ 334 ກໍລະນີ, ເສຍຊີວິດແລ້ວ 1 ຄົນ, ຮອງລົງມາແມ່ນແຂວງ ອັດຕະປື 188 ກໍລະນີ, ແຂວງວຽງຈັນ 173 ກໍລະນີ, ຄຳມ່ວນ 95 ກໍລະນີ, ບໍລິຄຳໄຊ 98 ກໍລະນີ, ສະຫວັນນະເຂດ 85 ກໍລະນີ, ສາລະວັນ 77 ກໍລະນີ, ໄຊຍະບູລີ 76 ກໍລະນີ ເສຍຊີວິດແລ້ວ 1 ຄົນ, ເຊກອງ 43 ກໍລະນີ, ຫລວງນໍ້າທາ 29 ກໍລະນີ, ອຸດົມໄຊ 24 ກໍລະນີ, ໄຊສົມບູນ 14 ກໍລະນີ, ຫລວງພະບາງ 11 ກໍລະນີ, ຈຳປາສັກ 7 ກໍລະນີ, ຜົ້ງສາລີ 5 ກໍລະນີ, ບໍ່ແກ້ວ 4 ກໍລະນີ. ສໍາລັບ ແຂວງຊຽງຂວາງ ແລະ ຫົວພັນ ແມ່ນຍັງບໍ່ພົບກໍລະນີຜູ້ຕິດເຊື້ອໄຂ້ຍຸງລາຍ.

ເພື່ອເປັນການປ້ອງກັນພະຍາດໄຂ້ຍຸງລາຍ ບໍ່ໃຫ້ມີການແຜ່ລາມໄປເປັນວົງກວ້າງ ແລະ ບໍ່ໃຫ້ມີກໍລະນີໃໝ່ນັ້ນ ກະຊວງສາທາລະນະສຸກ ຮຽກຮ້ອງໃຫ້ທຸກພາກສ່ວນ ແລະ ປະຊາຊົນທຸກຄົນ ຈົ່ງພ້ອມກັນສຸມໃສ່ເພີ່ມທະວີການສະກັດກັ້ນ, ຄວບຄຸມ ແລະ ປ້ອງກັນການແພ່ລະບາດຂອງເຊື້ອພະຍາດໄຂ້ຍຸງລາຍ ໂດຍສະເພາະ ໃຫ້ເປັນເຈົ້າການໃນປ້ອງກັນບໍ່ໃຫ້ຍຸງລາຍກັດ ໄປຄຽງຄູ່ກັບການປະຕິບັດຫລັກການ 5ປ ເປັນປະຈຳ ທັງມີການທຳລາຍແຫລ່ງເພາະພັນໜອນນ້ຳຍຸງລາຍ “ບໍ່ມີໜອນນ້ຳ ກໍຈະບໍ່ມີຍຸງລາຍ”.

ທີ່ມາ: ປະເທດລາວ