ຈັ່ງແມ່ນໂຊກດີ! ສອງນ້ອງອ້າຍຄົ້ນເຄື່ອງຫຼິ້ນເກົ່າບັງເອີນພົບຄຳແທ່ງອາຍຸເກົ່າແກ່ກວ່າ 50ປີ

ຈັ່ງແມ່ນໂຊກດີ! ສອງນ້ອງອ້າຍຄົ້ນເຄື່ອງຫຼິ້ນເກົ່າບັງເອີນພົບຄຳແທ່ງອາຍຸເກົ່າແກ່ກວ່າ 50ປີ

24th May 2020 0 By Education

ບຸນວາດສະໜາຂອງໃຜລາວແທ້ໆ ມີສອງອ້າຍນ້ອງຊາວຝຣັ່ງພາກັນຫາເຄື່ອງຫຼິ້ນແກ້ເບື່ອໃນຊ່ວງກັກຕົວຍ້ອນໂຄວິດ-19 ເຊິ່ງພໍເພິ່ນໄດ້ພາລູກທັງສອງໄປພັກໃນເຮືອນເກົ່າໆຫຼັງໜຶ່ງຂອງແມ່ເພິ່ນທີ່ຕາຍຈາກໄປແລ້ວໃນເມືອງວອງໂຄມ ທາງຕາເວັນອອກສຽງໃຕ້ຂອງປາຣີ ບໍ່ຄຸ້ນເຄີຍຄືບ້ານໂຕເອງຈິ່ງພາກັນຫາເຄື່ອງຫຼິ້ນຕາມພາສາເດັກນ້ອຍບັງເອີນໄປພົບກັບຄຳແທ່ງອາຍຸຫຼາຍສິບປີ.

ດ້ວຍຄວາມຢາກຫຼິ້ນຂອງສອງອ້າຍນ້ອງ ຈິ່ງຂໍພໍ່ເພື່ອນຳເອົາເຄື່ອງເກົ່າໆຈາກຫ້ອງເກັບເຄື່ອງຂອງຍ່າອອກມາຫຼິ້ນ ແລະ ພໍ່ກໍ່ອະນຸຍາດ ຫຼັງຈາກນັ້ນສອງອ້າຍນ້ອງກໍ່ໄປຫຼິ້ນປຸກເຮືອນໃນເດີ່ນບ້ານ ແລ້ວຂົນເອົາຜ້າປູບ່ອນນອນເຄື່ອງຂອງໃຊ້ອື່ນໆອອກໄປຫຼິ້ນ ປາກົດວ່າໃນລະຫວ່າງທີ່ພວມພືຜ້າປູອອກມານັ້ນໄດ້ພົບຄຳເປັນແທ່ງໆຕົກລົງມາກະແທກກັບພື້ນ.

ສິ່ງທີ່ຕົກລົງມານັ້ນ ສຳລັບເດັກແລ້ວບໍ່ໄດ້ສົນວ່າແມ່ນຫຍັງຍັງພາກັນຫຼິ້ນຕໍ່ໄປ ແລະເກັບເອົາຂອງແປກໆທີ່ຕົກລົງມາໄປໄວ້ໃນຫ້ອງເກັບເຄື່ອງຄືເກົ່າ ກັບໄປຫຼິ້ນຈົນເມື່ອຍຈິ່ງຈື່ໄດ້ວ່າເຫັນທ່ອນແປກໆຕົກລົງມາ ແລ້ວໄປເລົ່າໃຫ້ພໍ່ຟັງ ແລະກັບໄປຢິບມາໃຫ້ພໍ່ເບິ່ງ.

ເນື່ອງຈາກຄຳແທ່ງເຫຼົ່ານັ້ນໄດ້ຜ່ານການເວລາໄປຫຼາຍປີ ພໍ່ຂອງເດັກກໍ່ບໍ່ຮູ້ວ່າແມ່ນຫຍັງ ຈິ່ງຕັດສິນໃຈຕິດຕໍ່ໄປຍັງບໍລິສັດປະມູນເຄື່ອງເກົ່າມາກວດສອບ ຫຼັງກວດສອບລະອຽດແລ້ວຈິ່ງຮູ້ວ່າສອງທ່ອນທີ່ເປັນຮູບ 4 ຫຼ່ຽມນັ້ນຄວາມຈີງແລ້ວເປັນຄຳນັ້ນເອງ ມີນ້ຳໜັກແທ່ງລະ 1 ກິໂລ ລະບຸໄວ້ປີຊື້ 1967 ກໍ່ຄື 53 ປີປ່ອນໜ້ານີ້.

ຕາມການປະເມີນຂອງເຈົ້າຂອງຮ້ານບູຮານບອກວ່າ ຖ້ານຳໄປປະມູນຂາຍໜ້າຈະໄດ້ແທ່ງລະ 40.000 ຢູໂຣ(ສະກຸນເງິນຝຣັ່ງ) ປະມານ 392 ລ້ານກີບຕໍ່ແທ່ງ (ຄິດໄລ່ຕາມອັດຕາແລກປ່ຽນ 1 ຢູໂຣເທົ່າກັບ 9.800) ຖືວ່າບໍ່ທຳມະດາເລີຍການຫຼີ້ນຂອງລູກໆຊຸດນີ້.