ທີ່ສຸດຂອງຄວາມເປັນແມ່! ຢື້ຊີວິດລູກເກີດກ່ອນກໍານົດທີ່ໜັກພຽງ 700 ກຣາມ ຈົນລອດຊີວິດປະຕິຫານ

ທີ່ສຸດຂອງຄວາມເປັນແມ່! ຢື້ຊີວິດລູກເກີດກ່ອນກໍານົດທີ່ໜັກພຽງ 700 ກຣາມ ຈົນລອດຊີວິດປະຕິຫານ

26th May 2020 0 By Education

ຍ້ອນຢາກໄດ້ລູກສາວ ແມ່ໃຈສູ້ບໍ່ຍອມໃຫ້ລູກຈາກໄປ ດື້ຈົນຢື້ຊີວິດລູກລອດຕາຍປະຕິຫານ ຫຼັງເກີດກ່ອນກໍານົດດ້ວຍພາວະລຸລູກຄຸກຄາມ ເຮັດໃຫ້ເດັກນ້ອຍເກີດມາມີນໍ້າໜັກພຽງ 700 ກຣາມ, ພ້ອມຂອບໃຈໂອກາດ ແລະ ຄວາມດື້ຂອງຕົນເອງຈົນເຮັດໃຫ້ໄດ້ເຮັດໜ້າທີ່ແມ່ໄດ້ຢ່າງສົມບູນແບບ.

ຂອບໃຈໃນຄວາມດື້ຂອງຕົນເອງ ເຊື່ອໃນສັນຊາດຕະຍານຂອງຄວາມເປັນແມ່ ຈົນເຮັດໃຫ້ມີໂອກາດໄດ້ເຮັດໜ້າທີ່ແມ່ ໃນວິນາທີນັ້ນ ແມ່ບໍ່ໄດ້ຄິດຫຍັງເລີຍ ແມ່ບໍ່ສົນໃຈຫຍັງທັງນັ້ນ ໃນໃຈແມ່ຄິດວ່າເຖິງລູກຈະພິການ ແມ່ກໍ່ຈະລ້ຽງໃຫ້ດີທີ່ສຸດ ແລະ ແມ່ບໍ່ຄິດເລີຍວ່າຈະໄດ້ລູກຄົນນີ້ກັບມາຢ່າງສົມບູນແບບ ເພາະນ້ອງເກີດຕອນອາຍຸຄັນພຽງ 5ເດືອນກວ່າ.

ເຫດການດັ່ງກ່າວແມ່ນເກີດຂຶ້ນທີ່ປະເທດໄທ ໂດຍ ນາງສາວ ນິຣະຊາ ຫຼື ມີ່ ອາຍຸ 30ປີ  ໄດ້ເປີດໃຈແຊເລື່ອງລາວຂອງຕົນເອງ ແລະ ລູກສາວຕໍ່ສໍານັກຂ່າວໄທລັດອອນລາຍ ເພື່ອເປັນກໍາລັງໃຈໃຫ້ແມ່ທີ່ກໍາລັງທໍ້ ໄດ້ມີແຮງສູ້ເພື່ອລູກ ແລະ ເຊື່ອວ່າປະຕິຫານມີຈິງດັ່ງທີ່ລາວພົບໃນຄັ້ງນີ້.

ໂດຍຜູ້ກ່ຽວ ໄດ້ເປີດໃຈວ່າ: ກວ່າຈະຜ່ານຊ່ວງນາທີຊີວິດຈົນໄດ້ນ້ອງໃບບຸນ ຫຼື ເດັກຍິງ ບຸນຮັກສາ ທີ່ມີສຸຂະພາບຮ່າງກາຍແຂງແຮງສົມບູນເຊັ່ນທຸກມື້ນີ້ໄດ້ ຂໍເລົ່າຢ້ອນໄປວ່າຕົນເອງຢາກໄດ້ລູກສາວຫຼາຍ ເພາະລູກຄົນທໍາອິດເປັນຜູ້ຊາຍ ເມື່ອຮູ້ວ່າຖືພາ ກໍ່ຮີບໄປຝາກທ້ອງທັນທີ ແຕ່ໂຊກຮ້າຍຖືພາພຽງ 2ອາທິດ ມີພາວະແທ້ງ(ລຸລູກ) ຄຸກຄາມ, ເຂົ້າ-ອອກ-ນອນໂຮງໝໍຕະຫຼອດ ເພາະເລືອດໄຫຼຕະຫຼອດ ຄືກັບເປັນປະຈໍາເດືອນ ລາປ່ວຍທຸກໆເດືອນ ເດືອນລະ 7ມື້ ແລະ ຕ້ອງໄດ້ນອນນິ່ງໆຄືຜັກຄືປາ ບໍ່ດີ້ນ ເພື່ອຮັກສາລູກໃນທ້ອງໄວ້.

ຂະນະດຽວກັນທ່ານໝໍທີ່ຮັບຝາກທ້ອງ ແລະ ຕົນເອງ ພະຍາຍາມເຮັດທຸກວິທີທາງເພື່ອໃຫ້ອາຍຸຄັນຢູ່ຄົບຕາມກໍານົດເກີດ ແຕ່ບໍ່ສໍາເລັດ ປະຄອງມາຈົນເຖິງທີ່ສຸດໄດ້ພຽງ 26 ອາທິດ(5ເດືອນກວ່າ) ກະທັ້ງໃນມື້ໜຶ່ງຕົນເອງເຈັບທ້ອງເຕືອນ ແລະ ມີນໍ້າໃສໆໄຫຼອອກມາເທື່ອລະໜ້ອຍ ເມື່ອມາຮອດໂຮງໝໍ ທ່ານໝໍບອກນໍ້າຄໍ່າຮົ່ວໃຫ້ນອນເບິ່ງອາການ ພຽງເວລາບໍ່ດົນ ນໍ້າຄໍ່າເຫຼືອນ້ອຍ ທ່ານໝໍຖາມເຖິງຄວາມສະໝັກໃຈ ຍິນດີໄປເກີດຢູ່ອີກຈັງຫວັດໜຶ່ງທີ່ມີເຄື່ອງມືພ້ອມກວ່າຫຼືບໍ່ ຕົນເອງຮີບຕອບຕົກລົງທັນທີໂດຍບໍ່ຄໍານຶງເຖິງຄ່າໃຊ້ຈ່າຍໃດໆ ຂໍພຽງລູກປອດໄພ ທ່ານໝໍຈຶ່ງສັກຢາຂະຫຍາຍປອດໃຫ້ລູກທຸກມື້ຄົບ 4ເຂັມ.

ເມື່ອຮອດມື້ຈະສົ່ງຕົວໃນວັນທີ 28 ກໍລະກົດ 2562 ຢູ່ຊື່ໆ ນໍ້າຄໍ່າຮົ່ວຈົນລູກດີ້ນຕະກຸກຕະກັກ ທ່ານໝໍເອັກສະເລວັດແທກນໍ້າໜັກລູກໄດ້ພຽງ 700ກຣາມ ແລະຕົນເອງຖືກສົ່ງເຂົ້່າຫ້ອງເກີດລູກທັນທີເພື່ອຊ່ວຍຊີວິດລູກ ແຕ່ເມື່ອເຂົ້າຮອດຫ້ອງເກີດລູກ ຕ້ອງຊັອກເມື່ອຮູ້ວ່າລູກມີນໍ້າໜັກພຽງ 700ກຣາມ ເຊິ່ງເປັນນໍ້າໜັກທີ່ໜ້ອຍຫຼາຍ ໂອກາດລອດຊີວິດມີພຽງຮິບຮີ່ ແລະ ມີໂອກາດສູງທີ່ຈະພິການ ຕ້ອງຮີບຮັກສາຊີວິດຜູ້ເປັນແມ່ໄວ້ ຈຶ່ງຕັດສິນໃຈໃຫ້ແທ້ງ. ເມື່ອຜູ້ເປັນແມ່ໄດ້ຟັງຈຶ່ງຮ້ອງໄຫ້ຂຶ້ນສຸດແຮງ ໃຈສະຫຼາຍ ແລ້ວທ່ານໝໍໃຫ້ກັບມາແທ້ງທີ່ຕຶກຫຼັງເກີດ ຕອນນັ້ນເລືອດອາບຂາ, ທັງປວດທັງເຈັບທ້ອງ ແລະ ເສຍໃຈຮ້ອງໄຫ້ທີ່ລູກຈະບໍ່ຢູ່ແລ້ວ ແຕ່ໃນທ້ອງລູກຍັງດີ້ນ ຢັນເພື່ອຫາທາງອອກມາ ເພາະນໍ້າຄໍ່າເຫຼືອນ້ອຍ ນ້ອງບໍ່ມີອາກາດຫາຍໃຈ.

ເຈົ້າຂອງເລື່ອງບອກວ່າການເຈັບແທ້ງເຈັບກວ່າການເກີດປົກກະຕິ ລາວເຈັບທ້ອງທຸກໆ 1ນາທີຕັ້ງແຕ່ເວລາ 16:00ໂມງ ເຈັບຫຼາຍຈົນຫາຍໃຈບໍ່ໄດ້, ເຈັບຄືໃຈຊິຂາດ ສ່ວນຜູ້ເປັນຜົວ ສຸດທີ່ຮູ້ສຶກສົງສານເມຍ ແລະ ນັ່ງໄຫ້ຢູ່ທາງຂ້າງ ພ້ອມຈັບມືຢູ່ຕະລອດ ຈົນຮອດເວລາ 17:00ໂມງ ຜູ້ກ່ຽວຮູ້ສຶກປວດຍ່ຽວ ຜູ້ເປັນຜົວຈຶ່ງນໍາກະໂຖນມາໃຫ້ ແຕ່ແລ້ວຢູ່ດີໆ ຫົວລູກກໍ່ແມນອອກມາ ຜົວເລີຍບອກບໍ່ຕ້ອງຢ້ານ ເພາະມີປະສົບການຊ່ວຍໝາເກີດລູກມາກ່ອນ.

ຫຼັງເກີດລູກແລ້ວ ຜູ້ເປັນຜົວຈຶ່ງເອີ້ນພະຍາບານມາຕັດສາຍໄສ້ບື ທໍາຄວາມສະອາດລູກທີ່ເກີດອອກມາຄົບທຸກຢ່າງ ແລະ ນໍາລູກໄປໄວ້ທີ່ຕຽງແລ້ວໃສ່ທໍ່ອົກຊີໃຫ້ແຕ່ຕົນເອງຍັງບໍ່ທັນໄດ້ອຸ້ມລູກແມ້ແຕ່ວິນາທີດຽວ ຫົວໃຈຍິ່ງແຕຫສະຫຼາຍລັງຕ້ອງຕັດສິນໃຈໃຫ້ລູກຈາກໄປຢ່າງສະຫງົບ ໂດຍຫາກພ້ອມສູນເສຍໃຫ້ປິດຖັງອົກຊີ ແຕ່ດ້ວຍສັນຊາດຕະຍານຂອງຄວາມເປັນແມ່ ທີ່ຜູ້ເປັນຜົວບອກວ່າລູກຍັງຫາຍໃຈ ທັ້ງໆທີ່ຄິດວ່າລູກຕາຍໃນທ້ອງແລ້ວ ລາວຈຶ່ງເລືອກທີ່ຈະຢື້ຊີວິດລູກໄວ້.

ແລະແລ້ວ ວິນາທີປະຕິຫານກໍ່ເກີດຂຶ້ນ ລູກຫາຍໃຈເອງ 30ນາທີ ມືສື່ຮັກສື່ຄວາມຮູ້ສຶກ, ຫຼັງເອີ່ຍຂໍຮ້ອງພະຍາບານກັບໄປປຶກສາຫົວໜ້າ ແລະ ຕັດສິນໃຈຊ່ວຍລູກຂອງຕົນເອງ ຈາກນັ້ນກໍ່ເກີດຄວາມສັບສົນວຸ້ນວາຍ ຕູ້ອົບທີ່ຖືກຍົກເລີກໄປກ່ອນໜ້ານີ້ຕ້ອງນໍາມາຕິດຕັ້ງຄືນໃໝ່ ພະຍາບານຮີບແລ່ນອຸ່ມລູກໄປຍັງຫ້ອງອະພິບານເດັກນ້ອຍເກີດໃໝ່ ແລະ ເກີດເລື່ອງສຸດປະຕິຫານ ລູກຂອງຕົນເອງຫາຍໃຈໄດ້ເອງໂດຍບໍ່ໃສ່ອົກຊີດົນເຖິງ 30ນາທີ ແລະ ຖືເປັນກໍລະນີທໍາອິດຂອງໂຮງໝໍທີ່ນໍ້າໜັກນ້ອຍທີ່ສຸດ.

ນັບຕັ້ງແຕ່ນັ້ນມາ ຜູ້ກ່ຽວ, ສາມີ ແລະ ລູກ ສູ້ນໍາກັນມາຕະຫຼອດ ລະຫວ່າງປິ່ນປົວລູກ ຕ້ອງໃສ່ທໍ່ຊ່ວຍຫາຍໃຈ ຖືກເຈາະເລືອດທຸກມື້ ມື້ລະ 2ຄັ້ງ ເຊົ້າ-ແລງ ໃຫ້ນົມທາງສາຍຢາງ ຖືກປິດຕາ ເພາະຕ້ອງອົບສານເຫຼືອງ ທ່ານໝໍບອກຕ້ອງເບິ່ງອາການໃນແຕ່ລະມື້ເພາະເກີດໃນຊ່ວງອາຍຸຄັນພຽງ 5ເດືອນກວ່າ ໂອກາດລອດຊີວິດບໍ່ມີສູງປານໃດ.

ແຕ່ເຖິງແນວໃດກໍ່ຕາມ ຜ່ານມາເຖິງຈະຕ້ອງໄ້ຮັກສາປິ່ນປົວ ໃຊ້ເວລາດົນນານເພື່ອຮັກສາລູກໃຫ້ຢູ່ກັບຕົນເອງໄດ້, ມາຮອດປັດຈຸບັນເດັກນ້ອຍຄົນດັ່ງກ່າວມີຊີວິດລອດກັບມາຢູ່ກັບພໍ່ແມ່ຢ່າງປະຕິຫານ ມີພັດທະນາການທີ່ດີຂຶ້ນຕາມລໍາດັບ. ມາຮອດມື້ນີ້ ຜູ້ເປັນແມ່ບອກວ່າ ຂອບໃຈຕົນເອງທີ່ຕັດສິນໃຈເຊື່ອຕົນເອງ ໃຫ້ໂອກາດລູກໄດ້ສູ້ ຂອບໃຈລູກທີ່ສູ້ໄປກັບແມ່ ເຖິງຈະເກີດມາໂຕນ້ອຍໆ ແຕ່ໃຈສູ້ເກີນຮ້ອຍ ຂໍໃຫ້ແມ່ໆທີ່ມີພາວະແທ້ງຄຸກຄາມ ເກີດກ່ອນກໍານົດທີ່ກໍາລັງທໍ້ ຂໍໃຫ້ສູ້ເພື່ອລູກ ຈັບມືລູກໄວ້, ຢ່າທໍ້, ຢ່າເອົານໍ້າຕາ ແລະ ຄວາມໂສກເສົ້າໄປຫາລູກ ເພາະເຂົາຮູ້ສຶກໄດ້ ເປັນກໍາລັງໃຈໃຫ້ ແມ່ເຊື່ອວ່າປະຕິຫານມີຈິງ ຄືກັບລູກສາວໃບບຸນຂອງຕົນເອງ ທີ່ເກີດມາຄົບທຸກຢ່າງ, ບໍ່ພິການ, ບໍ່ມີໂລກປະຈໍາຕົວຫຍັງເລີຍ ເຊິ່ງຖືເປັນໂຊກດີທີ່ສຸດ.

ທີ່ມາ: ໄທລັດ