ຝາກເພງແທນໃຈໃຫ້ພໍ່ທີ່ຢູ່ເທິງຟ້າ ກຽມຟັງເພງໃໝ່ ” ວັນນີ້ບໍ່ມີພໍ່ ” ຈາກນ້ອງບິກ  ລູກຊາຍ ກິ ດາວເພັດ ໜູຫ່ວງ

ຝາກເພງແທນໃຈໃຫ້ພໍ່ທີ່ຢູ່ເທິງຟ້າ ກຽມຟັງເພງໃໝ່ ” ວັນນີ້ບໍ່ມີພໍ່ ” ຈາກນ້ອງບິກ ລູກຊາຍ ກິ ດາວເພັດ ໜູຫ່ວງ

10th June 2020 0 By Education

ນ້ອງບິກ ວິລະຍຸດ ໜູຫ່ວງ ລູກຊາຍອີກໜຶ່ງຄົນຂອງ ອາຈານ ກິ ດາວເພັດ ໜູຫ່ວງ ລາຊາເພັງລູກທົ່ງບ້ານນາ ທີ່ຫາກໍ່ເສຍຊີວິດໄປເມື່ອທ້າຍເດືອນເມສາທີ່ຜ່ານມາ, ເວົ້າແລ້ວ ນ້ອງບິກ ຖືເປັນລູກທີ່ໄດ້ຮັບການຖ່າຍທອດຄວາມສາມາດມາຈາກພໍ່ແບບເຕັມໆ ເນື່ອງຈາກມີສຽງຄໍອັນມ່ວນຫູ ສ້າງຄວາມຄວາມສຸກ ຄວາມມ່ວນຊື່ນໃຫ້ກັບຜູ້ຟັງ ແລະ ມໍ່ໆນີ້ກໍ່ກຽມປ່ອຍເພງໃໝ່ທີ່ຖ່າຍທອດອາລົມການສູນເສຍພໍ່ມາແບບເຕັມໆ ດ້ວຍເພງ ວັນນີ້ບໍ່ມີພໍ່.

ແນວໃດກໍ່ຕາມ ຜູ້ເປັນພໍ່ຈາກໄປແລ້ວ ແຕ່ແນ່ນອນວ່າ ນັກຮ້ອງລະດັບຕໍານານແບບນີ້ຍ່ອມຕ້ອງມີຜູ້ສືບທອດຄວາມສາມາດ ໂດຍສະເພາະກໍ່ແມ່ນລູກຊາຍທັງ 4ຄົນຂອງເພິ່ນ ແລະ ມັນກໍ່ເປັນຈິງ ນ້ອງ ບິກ ວິລະຍຸດ ໜູຫ່ວງ ໄດ້ພໍ່ມາແບບເຕັມໆ ໂດຍມີສຽງຄໍອັນສະເນາະຫູ ຂັບລໍາຮ້ອງເພງໄດ້ທຸກຮູບແບບ ຈົນມິດຮັກແຟນເພງຕ່າງກໍ່ບອກເປັນສຽງດຽວກັນວ່າ ນີ້ຄືຜູ້ສືບທອດລາຊາເພງລູກທົ່ງບ້ານນາ ກິ ດາວເພັດໜູຫ່ວງ.

ຫຼ້າສຸດ, ບໍ່ລໍຊ້າ ຜູ້ໃຫຍ່ໃຈດີກຽມພ້ອມສະໜັບສະໜູນແຕ່ງບົດເພງໃໝ່ໃຫ້ນ້ອງບິກໄດ້ຂັບຮ້ອງດ້ວຍຕົນເອງ, ເຊິ່ງບົດເພງດັ່ງກ່າວມີຊື່ວ່າ ວັນນີ້ບໍ່ມີພໍ່ ທີ່ສື່ເຖິງການສູນເສຍພໍ່ອັນເປັນທີ່ຮັກ ເຊິ່ງເຂົ້າກັບສະຖານະການຂອງຄອບຄົວໜູຫ່ວງທີ່ພົບພໍ້ຢູ່ຕອນນີ້.

ທີ່ສໍາຄັນ ບົດເພງນີ້ ໄດ້ ທ່ານ ນາງ ພິໄລວັນ ເມກອາລຸນ ລາຊິນີສຽງເພງບ້ານນາ ເປັນຄົນຂີດຂຽນເພງນີ້ໃຫ້ກັບມື ໂດຍໃຊ້ເວລາ 1ອາທິດ ແລະ ຕອນນີ້ ເພງດັ່ງກ່າວຢູ່ໃນຂັ້ນຕອນເຂົ້າອັດສຽງເປັນທີ່ຮຽບຮ້ອຍ ໃຫ້ທຸກຄົນລໍຖ້າຕິດຕາມໄດ້ເລີຍ.