ຄວາມຫວັງຂອງປະຊາຊົນ! ຫສນຍ ແຈ້ງໃຫ້ກະຊວງພະລັງງານ ແລະ ບໍ່ແຮ່ ປັບປຸງລາຄາໄຟຟ້າຄືນໃໝ່

ຄວາມຫວັງຂອງປະຊາຊົນ! ຫສນຍ ແຈ້ງໃຫ້ກະຊວງພະລັງງານ ແລະ ບໍ່ແຮ່ ປັບປຸງລາຄາໄຟຟ້າຄືນໃໝ່

11th June 2020 0 By Education

ຄວາມຫວັງໃໝ່ຂອງຜູ້ຊົມໃຊ້ໄຟຟ້າ ຫຼັງເດືອນຜ່ານມາຕ້ອງຈ່າຍຄ່າໄຟໃນລາຄາທີ່ແພງຂຶ້ນເທົ່າໂຕ ເມື່ອຫ້ອງວ່າການສໍານັກງານນາຍົກ ອອກແຈ້ງການໃຫ້ກະຊວງພະລັງງານ ແລະ ບໍ່ແຮ່ ຄົ້ນຄ້ວາປັບປຸງລາຄາໄຟຟ້າ ປີ 2020-2025 ຄືນໃໝ່.

ຫຼ້າສຸດ, ຫ້ອງວ່າການສໍານັກງານນາຍົກ ໄດ້ອອກແຈ້ງການ ສະບັບເລກທີ 637/ຫສນຍ, ລົງວັນທີ 9 ມິຖຸນາ 2020 ເຖິງທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ເລື່ອງທິດຊີ້ນໍາກ່ຽວກັບການຄົ້ນຄ້ວາ ແລະ ປັບປຸງລາຄາໄຟຟ້າ ປີ 2020-2025 ຄືນໃໝ່.

ໃນແຈ້ງການໃຫ້ຮູ້ວ່າ: ຫ້ອງວ່າການສໍານັກງານນາຍົກລັດຖະມົນຕີ ຂໍແຈ້ງການຊີ້ນໍາຂອງກອງປະຊຸມນາຍົກ-ຮອງນາຍົກລັດຖະມົນຕີ ດັ່ງນີ້:

1 ໃຫ້ກະຊວງພະລັງງານ ແລະ ບໍ່ແຮ່ ສົມທົບລັດວິສາຫະກິດໄຟຟ້າລາວ ແລະ ພາກສ່ວນກ່ຽວຂ້ອງ ຄົ້ນຄ້ວາການຫຼຸດລາຄາໄຟຟ້າ ເພື່ອປະຕິບັດນະໂຍບາຍຕໍ່ຜູ້ຊົມໃຊ້ໃນໄລຍະການແຜ່ລະບາດຂອງພະຍາດໂຄວິດ-19.

2 ໃຫ້ກະຊວງພະລັງງານ ແລະ ບໍ່ແຮ່ ເປັນໃຈກາງສົມທົບກັບລັດວິສາຫະກິດໄຟຟ້າລາວ ແລະ ພາກສ່ວນກ່ຽວຂ້ອງ ຄົ້ນຄ້ວາປັບປຸງລາຄາໄຟຟ້າພາກທີ່ຢູ່ອາໄສ ທີ່ລັດຖະບານໄດ້ຮັບຮອງເອົາແລ້ວຜ່ານມາ ຕາມແຈ້ງການສະບັບເລກທີ 394/ຫສນຍ, ລົງວັນທີ 19 ມີນາ 2020 ຄືນໃໝ່ ໂດຍສະເພາະລາຄາໄຟຟ້າ ຂອງກຸ່ມຜູ້ຊົມໃຊ້ໄຟຟ້າໃນລະຫວ່າງ 151-460 ກິໂລວັດໂມງຕໍ່ເດືອນ ທີ່ໄດ້ຮັບຜົນກະທົບຈາກການປັບປຸງລາຄາໄຟຟ້າ ແລ້ວລາຍງານຕໍ່ກອງປະຊຸມລັດຖະບານສະໄໝສາມັນປະຈໍາເດືອນ ມິຖຸນາ 2020.