ຊົມເຊີຍ! ປະຊາຊົນ 3 ບ້ານໃນເມືອງລະຄອນເພັງຮ່ວມສ້ອມແປງຂົວຂ້າມຫ້ວຍໄລ່

ຊົມເຊີຍ! ປະຊາຊົນ 3 ບ້ານໃນເມືອງລະຄອນເພັງຮ່ວມສ້ອມແປງຂົວຂ້າມຫ້ວຍໄລ່

16th June 2020 0 By Education

ຄວາມສາມັກຄີຄືພະລັງ ພ້ອມເປັນບໍ່ເກີດແຫ່ງຄວາມສໍາເລັດ ຫາກເປັນເຂດຊົນນະບົດແລ້ວແນ່ນອນວ່າພາບຄວາມສາມັກຄືຊ່ວຍກັນສ້າງສາສິ່ງຂອງຊົມໃຊ້ຕ່າງໆຍິ່ງປະກົດເຫັນຢູ່ເລື້ອຍ ຫຼ້າສຸດ ປະຊາຊົນ 3 ບ້ານໃນເມືອງລະຄອນເພັງ ແຂວງສາລະວັນ ສາມັກຄີກັນສ້ອມແປງຂົວຂ້າມຫ້ວຍໄລ່ ເພື່ອນໍາໃຊ້ໄປມາຫາສູ່ກັນ.

ໃນວັນທີ 15 ມິຖຸນາ 2020 ທ່ານ ໂອໄດ ໄຊສົມພອນ ຮອງຫົວໜ້າຫ້ອງວ່າການ ເມືອງລະຄອນເພັງ​ ແຂວງສາລະວັນ​ ຮ່ວມກັບ ທ່ານ ຄຳເພັດ ບຸນສົງການ ຫົວໜ້າຫ້ອງການ ຍ ທ ຂ ເມືອງ ໄດ້ສົມທົບກັບຫົວໜ້າຈຸດສຸມລົງກວດກາຕີດຕາມຊຸກຍູ້ ການສ້ອມແປງຂົວຂ້າມ​ ຫ້ວຍໄລ່​ລະຫວ່າງ​ ບ້ານດອນໄລ່​ ຫາ​ ບ້ານໜອງສີ່ແຈ ເຊິ່ງອຸປະກອນທີ່ນຳມາໃຊ້ແມ່ນ ປູນ,​ແຮ່,​ຊາຍ​ ຈຳນວນໜື່ງເພື່ອນໍາມາເທໃສ່ຕີນເສົາຄິດເປັນມູນຄ່າ 3ລ້ານກວ່າກີບ.

ແຮງງານທີ່ເຮັດຂົວ ຄັ້ງນີ້ ແມ່ນໄດ້ລະດົມເອົາປະຊາຊົນຈາກ3ບ້ານຄື: ບ້ານດອນໄລ່,ບ້ານໜອງສີ່ແຈ ແລະບ້ານຊະນະສົມບູນ ຂົວດັ່ງກ່າວມີຄວາມຍາວ 12 ແມັດ ກວ້າງ 4 ແມັດ ທັງນີ້ກໍ່ເພື່ອສະດວກສະບາຍໄປມາຫາສູ່ກັນບ້ານຕໍ່ບ້ານ ລະຫວ່າງເມືອງຕໍ່ເມືອງໃນການສັນຈອນເພື່ອແລກປ່ຽນຊື້ຂາຍສີນຄ້າ ເພື່ອແກ້ໄຂຊີວີດຂອງປະຊາຊົນດີຂື້ນເທື່ອລະກ້າວ.

ຂໍ້ມູນຈາກ: Media Laos