ສ່ອງ 3ມາດຕະການທີ່ຕ້ອງເຂັ້ມງວດຕໍ່ ຫຼັງລັດຖະບານປະກາດຜ່ອນຜັນໄລຍະ 4 ປະຕິບັດໝົດເດືອນໜ້າ

ສ່ອງ 3ມາດຕະການທີ່ຕ້ອງເຂັ້ມງວດຕໍ່ ຫຼັງລັດຖະບານປະກາດຜ່ອນຜັນໄລຍະ 4 ປະຕິບັດໝົດເດືອນໜ້າ

30th June 2020 0 By Education

ມາແລ້ວມາດຕະການຜ່ອນຜັນໄລຍະ 4 ຈາກກ່ອນໜ້ານີ້ ລັດຖະບານໄດ້ປະກາດຜ່ອນຜັນມາແລ້ວເຖິງ 3 ໄລຍະ ສໍາລັບມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19, ໂດຍຄັ້ງນີ້ ມີທັງການຜ່ອນຜັນບາງມາດຕະການລົງ ແຕ່ກໍ່ຍັງໃຫ້ເຂັ້ມງວດປະຕິບັດຕໍ່ 3 ມາດຕະການຄື 1 ສືບຕໍ່ປິດບັນດາກິດຈະການຮ້ານບັນເທີງ, ຮ້ານຄາຣາໂອເກະ ແລະ ຮ້ານເກມ, 2 ປີດດ່ານປະເພນີ, ດ່ານທ້ອງຖິ່ນ ແລະ 3 ໂຈະການອອກວີຊາທ່ອງທ່ຽວ ແລະ ຢ້ຽມຢາມ ເພື່ອປ້ອງກັນຄວບຄຸມ ແລະ ສະກັດກັ້ນ ການລະບາດ ຂອງພະຍາດໂຄວິດ-19.

ໃນວັນທີ 30 ມິຖຸນາ 2020 ທີ່ກະຊວງສາທາລະນະສຸກ ຄະນະສະເພາະກິດປ້ອງກັນຄວບຄຸມ ແລະ ສະກັດກັ້ນ ການລະບາດພະຍາດໂຄວິດ-19 ໄດ້ຖະແຫຼງມາດຕະການຜ່ອນຜັນໃໝ່ໄລຍະວັນທີ 1 ຫາ 31 ກໍລະກົດ 2020 ໂດຍ ທ່ານ ສຈ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີບັນດາສື່ມວນຊົນເຂົ້າຮ່ວມ.

ໃນໂອກາດດັ່ງກ່າວ ທ່ານ ສຈ ດຣ. ບຸນກອງ ສີຫາວົງ ກໍ່ໄດ້ໃຫ້ຮູ້ເຖິງບັນດາມາດຕະການຜ່ອນຜັນ ແລະ ບາງມາດຕະການທີ່ຕ້ອງສືບຕໍ່ຈັດຕັ້ງປະຕິບັດ ແຕ່ແອັດມິນຈະຍົກມາໃຫ້ແຟນເພຈໄດ້ຮູ້ນໍາກັນພຽງ 3ມາດຕະການທີ່ລັດຖະບານໃຫ້ສືບຕໍ່ເຂັ້ມງວດປະຕິບັດເທົ່ານັ້ນ ໂດຍເຫັນດີໃຫ້ສືບຕໍ່ປະຕິບັດຢ່າງເຂັ້ມງວດ ບາງມາດຕະການທີ່ໄດ້ກໍານົດໃນຄໍາສັ່ງ 06/ນຍ, ລົງວັນທີ 29 ມີນາ 2020 ດັ່ງນີ້:

1 ສືບຕໍ່ປິດບັນດາກິດຈະການຮ້ານບັນເທີງ, ຮ້ານຄາຣາໂອເກະ ແລະ ຮ້ານເກມ.

2 ສືບຕໍ່ປີດດ່ານປະເພນີ ແລະ ດ່ານທ້ອງຖິ່ນ ສຳລັບການເຂົ້າ-ອອກ ຂອງບຸກຄົນທົ່ວໄປ ແລະ ການຂົນສົ່ງສິນຄ້າ ຍົກເວັ້ນບາງດ່ານປະເພນີ ຫຼື ດ່ານທ້ອງຖິ່ນ ທີ່ໄດ້ຮັບອະນຸຍາດຈາກລັດຖະບານ ໃຫ້ລົດຂົນສົ່ງສິນຄ້າ ເຂົ້າ-ອອກໄດ້. ສ່ວນດ່ານສາກົນ ສືບຕໍ່ປີດສໍາລັບການເຂົ້າ-ອອກ ຂອງບຸກຄົນທົ່ວໄປ, ຍົກເວັ້ນ ພົນລະເມືອງລາວ ແລະ ຊາວຕ່າງປະເທດ ທີ່ມີຄວາມຈຳເປັນຮີບດ່ວນໃນການເດີນທາງເຂົ້າ-ອອກ ສປປ ລາວ ທີ່ໄດ້ຮັບອະນຸຍາດຈາກຄະນະສະເພາະກິດ, ສໍາລັບການຂົນສົ່ງສິນຄ້າ ຜ່ານດ່ານສາກົນ ແມ່ນສາມາດເຂົ້າ-ອອກໄດ້ຕາມປົກກະຕິ.

3 ສືບຕໍ່ໂຈະການອອກວີຊາທ່ອງທ່ຽວ ແລະ ຢ້ຽມຢາມ ສໍາລັບບຸກຄົນ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດໂຄວິດ-19. ສໍາລັບ ນັກການທູດ, ພະນັກງານອົງການຈັດຕັ້ງສາກົນ, ຊ່ຽວຊານ, ນັກລົງທຶນ, ນັກທຸລະກິດ, ວິຊາການ ແລະ ແຮງງານຕ່າງປະເທດ ທີ່ມີຄວາມຈໍາເປັນ ແລະ ຮີບດ່ວນ ສາມາດເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ໄດ້, ແຕ່ຕ້ອງຜ່ານການພິຈາລະນາເຫັນດີ ຈາກຄະນະສະເພາະກິດ, ສໍາລັບ ຂັ້ນຕອນໃນການປະຕິບັດຕົວຈິງກະຊວງການຕ່າງປະເທດ ຈະອອກຄໍາແນະນໍາຕ່າງຫາກ.

ແນວໃດກໍ່ຕາມບັນດາມາດຕະການທີ່ກຳນົດໄວ້ໃນໄລຍະຜ່ອນຜັນນີ້ ມີຜົນສັກສິດ ນັບແຕ່ວັນທີ 1 ຫາ 31 ກໍລະກົດ 2020. ໃນພາກປະຕິບັດຕົວຈິງ ຈະໄດ້ມີການປະເມີນ, ທົບທວນ ແລະ ດັດປັບ ໃຫ້ເໝາະສົມຕື່ມ, ກໍລະນີມີການປ່ຽນແປງ ລັດຖະບານຈະແຈ້ງໃຫ້ຊາບເປັນແຕ່ລະໄລຍະ. ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ.