ເກີດຫຍັງຂຶ້ນນໍ້? ຫຼວງພະບາງເກີດເຫດເສົ້າພົບໜຸ່ມເສຍຊີວິດປິດສະໜາໃນຖັງຕົ້ມຢາງໝາກຕອຍ

ເກີດຫຍັງຂຶ້ນນໍ້? ຫຼວງພະບາງເກີດເຫດເສົ້າພົບໜຸ່ມເສຍຊີວິດປິດສະໜາໃນຖັງຕົ້ມຢາງໝາກຕອຍ

20th July 2020 0 By Education

ເປັນຂ່າວທີ່ໜ້າສະລົດໃຈຫຼາຍ ສໍາລັບກໍລະນີນີ້ ເມື່ອເຈົ້າໜ້າທີ່ແຈ້ງພົບຊາຍໜຸ່ມນອນເສຍຊີວິດປິດສະໜາຢູ່ໃນຖັງຕົ້ມຢາງໝາກຕອຍ ເຊິ່ງຄາດວ່າອາດເສຍຊີວິດມາໄດ້ 2-3 ວັນແລ້ວ ຂະນະທີ່ຂໍ້ມູນສ່ວນຕົວຜູ້ກ່ຽວທຸກຢ່າງກໍ່ບໍ່ມີຫຍັງເລີຍ.

ຫນ່ວຍກູ້ຊີບອົງການກາແດງລາວ ລາຍງານໃຫ້ຮູ້ວ່າ ໃນວັນທີ 20 ກໍລະກົດ 2020 ເວລາ 11:54 ນາທີ ໄດ້ຮັບແຈ້ງເຂົ້າເບີ 0711625 ວ່າມີຄົນເສຍຊີວິດຢູ່ທີ່ບ້ານ ສາມັກຄີໄຊ ເມືອງຊຽງເງິນ​ ເມື່ອທີມງານຫນ່ວຍກູ້ຊີບອົງການກາແດງລາວ ໄດ້ອອກກວດສອບເຫດພົບ​ຄົນເສຍຊີວິດເພດຊາຍ ​1 ຄົນ ຕົກຢູ່ໃນຖັງຕົ້ມຢາງຢາງຫມາກຕອຍ ຈາກສະພາບສົບຄາດວ່າຜູ້ກ່ຽວອາດຈະເສຍຊີວິດໄດ້2-3ວັນ ຕອນນີ້ແມ່ນຍັງບໍ່ມີໃຜຮັບຮູ້ຂໍ້ມູນສ່ວນຕົວຂອງຜູ້ກ່ຽວວ່າເປັນຄົນບ້ານ, ​ເມືອງ ຫຼື ແຂວງໃດ ເພາະບໍ່ພົບເຫັນຫລັກຖານຫລືເອກະສານໃດກ່ຽວກັບຜູ້ເສຍຊີວິດ ສ່ວນຮ່າງກາຍແມ່ນເປື່ອຍ ແລະເຫລືອແຕ່ບາງພາກສ່ວນເທົ່ານັ້ນ ສ່ວນສາເຫດຂອງການເສຍຊີວິດແມ່ນຢູ່ໃນການສອບສວນຂອງເຈົ້າຫນ້າທີ່ຕຳຫລວດ.

ທາງທີມງານຫນ່ວຍກູ້ຊີບອົງການກາແດງລາວຈື່ງໄດ້ທຳການຫໍ່ສົບແລ້ວນຳສົ່ງໄປ​ໂຮງ​ເຢັນ​ໂຮງໝໍ​ແຂວງ​ຫລວງພະບາງ​; ຂໍຄວາມຮ່ວມມືນຳບັນດາທ່ານຊ່ວຍກັນແຊເພື່ອຊອກຫາຍາດພີ່ນ້ອງແລະຄອບຄົວຂອງຜູ້ເສຍຊີວິດໃນຄັ້ງນີ້ດ້ວຍ, ແນວໃດກໍ່ຕາມ ທາງທີມງານຂອງພວກເຮົາຂໍສະແດງຄວາມເສຍໃຈມາຍັງຍາດຕິພີ່ນ້ອງຜູ້ເສຍຊີວິດດ້ວຍ.

ທີ່ມາ: ຫນ່ວຍກູ້ຊີບອົງການກາແດງລາວ ສາຂາຫລວງພະບາງ