ມາຮູ້ຈັກ MQ-9 Reaper ໂດຣນເພັດຊະຄາດ ທີ່ສັງຫານນາຍພົນຂອງອີຣານ

ມາຮູ້ຈັກ MQ-9 Reaper ໂດຣນເພັດຊະຄາດ ທີ່ສັງຫານນາຍພົນຂອງອີຣານ

11th January 2020 0 By Education

ຫຼັງຈາກທີ່ລັດຖະບານສະຫະລັດຢືນຢັນວ່າ ປະຕິບັດການປິດຊີບນາຍພົນຄົນສໍາຄັນຂອງອີຣານ ປະສົບຄວາມສໍາເລັດ ດ້ວຍໂດຣນພຽງລໍາດຽວຊື່ ເອັມຄິວ-9ຣິບເປີ (MQ-9 Reaper)ເຊື່ອວ່າຫຼາຍຄົນອາດຢາກຮູ້ຈັກເຈົ້າຂອງສົມຍານາມ “ໂດຣນທີ່ໜ້າເກງຂາມ” ລໍານີ້ແນ່ນອນ.


ເມື່ອບໍ່ດົນມານີ້ ເວັບໄຊວໍຊິງຕັນ ເອັກແຊມໄມເນີ (Washington Examiner) ລະບຸວ່າປະຕິບັດການໂດຣນລອບສັງຫານນາຍພົນກາເຊັມ ໂຊໄລມານີ ຜູ້ບັນຊາການກອງກໍາລັງຄຸດຜູ້ຊົງອິດທິພົນຂອງອີຣານ ເມື່ອວັນທີ 3 ມັງກອນ 2020 ທີ່ຜ່ານມາ ກໍາກັບດູແລໂດຍສໍານັກງານຂ່າວກອງກາງສະຫະລັດ(ຊີໄອເອ) ແລະ ຄວບຄຸມຈາກໄລຍະໄກ ໂດຍເຫຼົ່ານັກບິນກອງທັບອາກາດສະຫະລັດທີ່ຖານທັບອາກາດຄຣີສໃນລັດເນວາດາ.


ຂໍ້ມູນຈາກກອງທັບອາກາດສະຫະລັດລະບຸວ່າ: ໂດຣນເອັມຄິວ-9 ຣິບເປີ ຫຼື ເອີ້ນອີກຊື່ໜຶ່ງວ່າ (Predator B) ເປັນໂດຣນຄວບຄຸມໄລຍະໄກແບບຕິດອາວຸດຄົບເໝາະກັບພາລະກິດຫຼາກຫຼາຍບິນໃນຄວາມສູງລະດັບປານກາງ ແລະ ມີອາຍຸການໃຊ້ງານຍາວນານ. ໜ້າທີ່ຫຼັກຂອງຣິບເປີຄື ສັງຫານເປົ້າໝາຍແບບສາຍຟ້າແມບ ສ່ວນໜ້າທີ່ຮອງຄື ເກັບຂໍ້ມູນຂ່າວກອງ. ທັງນີ້, ໂດຣນລໍານີ້ຍັງມີຄວາມສາມາດໃນການໂຈມຕີ ແລະ ສອດແນມເປົ້າໝາຍລະດັບສູງ ຫາຕົວຈັບຍາກ ແລະ ມີເວລາຈໍາກັດ.


ສ່ວນສົມຍານາມ ໜຶ່ງໃນໂດຣນທີ່ໜ້າເກງຂາມທີ່ສຸດໃນໂລກ ຂອງໂດຣນລໍານີ້ບໍ່ໄດ້ມາຈາກຄວາມໄວ ແລະ ອາວຸດໜັກຂອງມັນເທົ່ານັ້ນ ແຕ່ຍັງມາຈາກການເຄື່ອນທີ່ທີ່ງຽບ ເອີ້ນໄດ້ວ່າແທບບໍ່ມີສຽງ ກ່ອນເປົ້າໝາຍຈະຮູ້ຕົວກໍ່ຄົງຈະສາຍໄປແລ້ວ ເນື່ອງຈາກໂດຣນຣິບເປີໃຊ້ເຄື່ອງຈັກແບບໃບພັດຕົວດຽວ ເຮັດໃຫ້ຍາກຕໍ່ການເບິ່ງເຫັນ ແລະ ຟັງສຽງເມື່ອຢູ່ໃນສະໝໍລະພູມ ເຖິງແມ່ນວ່າຈະບິນຢູ່ເໜືອເປົ້າໝາຍພຽງ 250-300ແມັດກໍ່ຕາມ.


ທັງນີ້ ຈອນ ເວນາເບີລ ນັກບິນກອງທັບອາກາດສະຫະລັດໄວກະສຽນ ເຊິ່ງປັດຈຸບັນເປັນນັກວິຊາການອາວຸໂສຂອງມູນນິທິເຮີຣິເທຈ ບອກວ່າ ສິ່ງທີ່ໜ້າຢ້ານຂອງຣິບເປີຄືການເຄື່ອນໄຫວຢ່າງມິດງຽບຈົນແທບບໍ່ໄດ້ຍິນສຽງ ເຮັດໃຫ້ເໝາະກັບພາລະກິດລອບໂຈມຕີທີ່ສຸດ, ໄລຍະການບິນ ໄລຍະເວລາລອຍຢູ່ກັບທີ່ ແລະ ຄວາມແມ່ນຢໍາໃນການໂຈມຕີຂອງເອັມຄິວ-9 ເຮັດໃຫ້ໂດຣນລຸ້ນນີ້ເປັນອຸປະກອນຕິດອາວຸດໃນອຸດົມຄະຕິສໍາລັບພາລະກິດເກັບຂໍ້ມູນຂ່າວກອງ, ກວດກາ ແລະ ລາດຕະເວນ(ໄອເອສອາ) ເມື່ອຢູ່ໃນສະພາບແວດລ້ອມທີ່ມີໄພຄຸກຄາມຕໍ່າ.


ສໍາລັບລາຄາຂອງເອັມຄິວ-9ປະມານ 16ລ້ານໂດລາ(ບໍ່ລວມຄ່າເຊັນເຊີ ລະບົບສື່ສານ ແລະ ອຸປະກອນສະໜັບສະໜູນ) ເຊິ່ງຜະລິດໂດຍ ບໍລິສັດ ເຈນເນີຣັລ ອະຕອມມິກສ໌ ປະຈໍາການໃນກອງທັບສະຫະລັດຕັ້ງແຕ່ປີ 2006, ເຊິ່ງລາຄາຂອງມັນເປັນທາງເລືອກທີ່ຖືກຫລາຍເມື່ອທຽບກັບຄວາມສາມາດດ້ານຂ່າວກອງ ແລະ ການໂຈມຕີທາງອາກາດ ອີກທັງຕິດຕັ້ງລະເບີດ ແລະ ຂີປະນາວຸດຫຼາຍປະເພດໄດ້ແກ່ ຂີປະນາວຸດເຮວໄຟລ໌ AGM-114, ລະເບີດນໍາວິຖີດ້ວຍເລເຊີ GBU-12 Paveway III ແລະ ລະເບີດເພື່ອໃຊ້ໂຈມຕີຮ່ວມ(JDAM) GB-38


ສ່ວນຂະໜາດ ຣິບເປີມີນໍ້າໜັກປະມານ 2.223ກິໂລກຣາມ(ເທົ່າກັບຊ້າງອາຟຣິກາ 1ໂຕ) ສ່ວນລະດັບຄວາມສູງຂະນະປະຕິບັດການຢູ່ທີ່ປະມານ 7.500ແມັດ ແຕ່ຄວາມຈິງສາມາດບິນສູງໄດ້ເຖິງ 15.000ແມັດ. ນອກຈາກນີ້ ຣິບເປີຍັງສາມາດບິນໄດ້ໄກປະມານ 1.931 ກິໂລແມັດ ແລະ ມີຄວາມໄວສູງສຸດເຖິງ 480ກິໂລແມັດຕໍ່ຊົ່ວໂມງ, ຂະນະທີ່ນັກບິນພຽງແຕ່ນັ່ງບັງຄັບຈາກຖານທັບທີ່ຢູ່ໄກອອກໄປອີກຫຼາຍພັນກິໂລແມັດ. ທັງນີ້ ສື່ອັງກິດລາຍງານວ່າ ໂດຣນລອບສັງຫານນາຍພົນໂຊໄລມານີຖືກສົ່ງມາຈາກຖານທັບອາກາດອັລ-ອູເດອິດໃນກາຕາ.


ເຖິງຢ່າງໃດກໍ່ຕາມ ພາລະກິດໃນກຸງແບກແດດບໍ່ແມ່ນຜົນງານອັນທໍາອິດຂອງໂດຣນ ເພັດຊະຄາດລຸ້ນນີ້ ແຕ່ເຄີບອອກປະຕິການໃນອັບການິສະຖານ, ອີຣັກ, ເຢເມນ, ລິເບຍ ແລະ ອີກຫຼາຍປະເທດມາແລ້ວ ໂດຍມີລາຍງານວ່າພາລະກິດສັງຫານຄັ້ງທໍາອິດເກີດຂຶ້ນເມື່ອວັນທີ 28 ຕຸລາ 2006 ທີ່ຣິບເປີຍິງຂີປະນາວຸດເຮວໄຟລ໌ໃສ່ກຸ່ມຕິດອາວຸດໃນອັບການິສະຖານ, ຫຼັງຈາກນັ້ນໃນປີ 2014 ຣິບເປີ ອອກປະຕິບັດການອີກຄັ້ງໃນພາລະກິດສັງຫານ ຍິຮາດີ ຈອນ ຊາຍຊາວອັງກິດທີ່ຜັນຕົວເປັນນັກຮົບກຸ່ມລັດອິດສະລາມ(ໄອເອສ)