ດ່ວນ! ສາທາຢືນຢັນ ພົບຜູ້ຕິດເຊື້ອໂຄວິດ-19 ເພີ່ມອີກ 1 ຄົນ ເຕືອນທຸກຄົນຢ່າຖືເບົາ

ດ່ວນ! ສາທາຢືນຢັນ ພົບຜູ້ຕິດເຊື້ອໂຄວິດ-19 ເພີ່ມອີກ 1 ຄົນ ເຕືອນທຸກຄົນຢ່າຖືເບົາ

24th July 2020 0 By Education

ປັດຈຸບັນ ສປປ ລາວ ມີຜູ້ຕິດເຊື້ອໂຄວິດ-19 ເພີ່ມຂຶ້ນອີກ 1 ຄົນ ເຊິ່ງເປັນເພດຊາຍ ອາຍຸ 32 ປີ, ສັນຊາດເກົາຫຼີ, ອາຊີບ ວິຊາການໄຟຟ້າ, ບ່ອນເຮັດວຽກແມ່ນເຂື່ອນໄຟຟ້ານໍ້າງຽບ (ຜູ້ກ່ຽວຍັງບໍ່ທັນໄດ້ໄປເຮັດວຽກຢູ່ເຂື່ອນເທື່ອ ເພາະຍັງກັກໂຕຕາມລະບຽບການ) ເຊິ່ງຜູ້ກ່ຽວກັກຕົວຢູ່ໂຮງແຮມທີ່ກຳນົດເປັນບ່ອນກັກກັນໃນນະຄອນຫຼວງ.

ຕາມການລາຍງານຂອງຜູ້ກ່ຽວກ່ອນເດີນທາງມາ ສປປ ລາວ ແມ່ນບໍ່ມີອາການຫຍັງ ແລະ ໄດ້ກວດໂຄວິດ-19 ດ້ວຍ RT-PCR ແມ່ນໃຫ້ຜົນລົບ, ໂດຍກ່ອນໜ້ານີ້ແມ່ນໄດ້ອາໄສຢູ່ນຳຄອບຄົວ ແລະ ບໍ່ມີພີ່ນ້ອງເປັນພະຍາດໂຄວິດ-19, ໃນວັນທີ 18 ກໍລະກົດ 2020 ໄດ້ເດີນທາງຈາກປະເທດຍີ່ປຸ່ນ (ໂອຊາກາ ຫາ ໂຕກຽວ) ຜ່ານ ສ.ເກົາຫຼີ (ອິນຊອນ) ມາ ສປປ ລາວ ຜ່ານທາງສະໜາມບິນວັດໄຕ ດ້ວຍຖ້ຽວບິນ QV 922A ມີຜູ້ໂດຍສານຮ່ວມທັງໝົດ 109 ຄົນ, ເດີນທາງຈາກສະໜາມບິນມາໂຮງແຮມດ້ວຍລົດຕູ້ເຊົ່າ ມີທັງໝົດ 6 ຄົນທີ່ນັ່ງລົດຕູ້ຄັນດັ່ງກ່າວ.

ນັບແຕ່ວັນທີ 18-23 ກໍລະກົດ ຜູ້ກ່ຽວບໍ່ໄດ້ເດີນທາງອອກຈາກຫ້ອງ, ກິນອາຫານຢູ່ໃນຫ້ອງໂດຍມີພະນັກງານນຳອາຫານ ແລະ ເຄື່ອງດື່ມໄປໄວ້ໜ້າຫ້ອງໃຫ້ ແລະ ບໍ່ມີໃຜເຂົ້າໄປໃນຫ້ອງ, ໄດ້ວັດແທກອຸນຫະພູມທຸກມື້ໆລະ 2 ຄັ້ງເຊົ້າໍ-ແລງ (ອຸນຫະພູມສະເລ່ຍ 36,3 ຫາ 36,6 ອົງສາເຊ) ໂດຍແມ່ນພະນັກງານໂຮງແຮມວັກແທກໃຫ້ ແຕ່ກໍ່ບໍ່ໄດ້ເຂົ້າໃກ້ກັນ ພ້ອມຮັກສາໄລຍະຫ່າງ 1 ແມັດ. ຂະນະດຽວກັນກໍ່ບໍ່ມີພະນັກງານເຂົ້າໄປອະນາໄມຫ້ອງນອນໃຫ້ ເພາະກົດລະບຽບຂອງໂຮງແຮມຄືຜູ້ກ່ຽວຕ້ອງຮັບຜິດຊອບເອງ, ທາງໂຮງແຮມໄດ້ກະກຽມອຸປະກອນທີ່ຈຳເປັນໄວ້ໃນຫ້ອງພັກໃຫ້ຜູ້ກ່ຽວຕາມກຳນົດ 14 ວັນ.

ໃນວັນທີ 22 ກໍລະກົດ 2020 ທີມງານ ສູນວິເຄາະ ແລະ ລະບາດວິທະຍາ (ສວລ) ຮ່ວມກັບພະແນກສາທານະຄອນຫຼວງ, ຫ້ອງການສາທາເມືອງສີໂຄດຕະບອງໄດ້ໄປເກັບຕົວຢ່າງຢູ່ໂຮງແຮມ ຕໍ່ມາວັນທີ 23 ກໍລະກົດ 2020 ເວລາປະມານ 21:00 ໂມງ ຜົນກວດອອກມາພົບເຊື້ອໂຄວິດ-19 ເຊິ່ງຄົນເຈັບດັ່ງກ່າວທາງໂຮງໝໍໄດ້ໄປຮັບເອົາມາປິ່ນປົວຢູ່ໂຮງໝໍມິດຕະພາບແລ້ວ, ສ່ວນຜູ້ສຳຜັດໃກ້ຊິດທີ່ໄຈ້ແຍກໃນເບື້ອງຕົ້ນແມ່ນ 17ຄົນ.