ສາລະວັນເຮັດແທ້! ສ້າງແບບຢ່າງ ຈັບຜົວເມຍຫວຽດນາມມາສຶກສາອົບຮົມ ເຫດຂາຍເລກເຖື່ອນ

ສາລະວັນເຮັດແທ້! ສ້າງແບບຢ່າງ ຈັບຜົວເມຍຫວຽດນາມມາສຶກສາອົບຮົມ ເຫດຂາຍເລກເຖື່ອນ

25th August 2020 0 By Education

ເຫັນໄດ້ຢ່າງຊັດເຈນວ່າປັດຈຸບັນນີ້ ການຂາຍເລກເຖື່ອນເລີ່ມແຜ່ຫຼາຍໃນລາວເຮົາ ເຊິ່ງມີທັງແມ່ຄ້າທີ່ເປັນຄົນລາວເຮົາເອງ ແລະ ຄົນຕ່າງປະເທດປົນເປກັນ, ເຊິ່ງການຂາຍເລກເຖື່ອນແມ່ນຜິດກົດໝາຍ ແຕ່ກໍ່ຍັງພົບເຫັນຜູ້ລັກລອບຂາຍຢູ່, ຫຼ້າສຸດ ສາລະວັນເຮັດແທ້ ນໍາສອງຜົວເມຍຊາວຫວຽດນາມ ມາສຶກສາອົບຮົມ ຫຼັງພົບຂາຍເລກເຖື່ອນ.

ໃນວັນທີ 18 ສິງຫາ 2020 ທີ່ຜ່ານມາ ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ໄດ້ສຶກສາອົບຮົມ ຜົວ-ເມຍຊາວຫວຽດນາມ ທີ່ເຄື່ອນໄຫວຂາຍເລກເຖື່ອນ ( ເລກໄທ-ຫວຽດນາມ) ຢູ່ແຂວງສາລະວັນ.

ຮອ ອໍາພອນ ພົມມະຫາໄຊ ຫົວໜ້າພະແນກສືບສວນ-ສອບສວນຄະດີອາຍາ ປກສ ແຂວງສາລະວັນ ໃຫ້ຮູ້ວ່າ: ໄດ້ກັກຕົວ ທ້າວ ຫງຽນດ້າຍກິວ ອາຍຸ 40 ປີ ແລະ ນາງ ເລຮົງຢຸງ ອາຍຸ 38 ປີ ສັນຊາດຫວຽດນາມ ເປັນຜົວ-ເມຍ ພັກເຊົາຢູ່ບ້ານຫຼັກ 2 ເມືອງ ແລະ ແຂວງສາລະວັນ ໃຫ້ຂໍ້ຫາຂາຍເລກເຖື່ອນ ( ຫວຽດນາມ ແລະ ໄທ ) ມາແຕ່ປີ 2018; ເຊິ່ງການກະທໍາດັ່ງກ່າວຂອງພວກກ່ຽວ ແມ່ນຜິດຕໍ່ລະບຽບກົດໝາຍຂອງ ສປປ ລາວ ມາດຕາ 141 ຂອງປະມວນກົດກົດໜາຍອາຍາ ສະບັບປັບປຸງປີ 2017 ການຄ້າຂາຍເລກເຖື່ອນ.

ເຈົ້າໜ້າທີ່ ໄດ້ສຶກສາອົບຮົມ ໃຫ້ພວກກ່ຽວປ່ຽນແປງພຶດຕິກຳທີ່ຜິດຕໍ່ລະບຽບກົດໝາຍ ແລ້ວຫັນມາປະກອບອາຊີບທີ່ຖືກຕ້ອງ.ໃນກໍລະນີທີ່ພົບເຫັນການກະທໍາຜິດໃນຄັ້ງຕໍ່ໄປແມ່ນຈະຖືກດໍາເນີນຄະດີຕາມລະບຽບກົດໝາຍໂດຍບໍ່ມີການຍົກເວັ້ນ.