ເບິ່ງຊ່ວຍກັນ ຮ້ານອາຫານຕ້ອງປິດກ່ອນທ່ຽງຄືນ, ດ່ານ, ຍົນເຊົ່າເໝົາລຳໂຈະໄປກ່ອນ

ເບິ່ງຊ່ວຍກັນ ຮ້ານອາຫານຕ້ອງປິດກ່ອນທ່ຽງຄືນ, ດ່ານ, ຍົນເຊົ່າເໝົາລຳໂຈະໄປກ່ອນ

31st August 2020 0 By Education

ຫຼາຍວັນມາແລ້ວທີ່ປະເທດເຮົາບໍ່ພົບຜູ້ຕິດເຊື້ອເພີ່ມ ຂະນະທີ່ຜູ້ຕິດເຊື້ອກໍ່ປົວໃກ້ຈະປິ່ນປົວຫາຍໝົດແລ້ວຍັງພຽງກໍລະນີດຽວທີ່ຍັງນອນໂຮງໝໍ ແຕ່ສະຖານະການອ້ອມຮອບປະເທດເຮົາຍັງບໍ່ດີຂຶ້ນ ຫຼາຍປະເທດຍັງຄົງມີຕົວເລກຜູ້ຕິດເຊື້ອໂຄວິດ-19 ເພີ່ມຂຶ້ນເປັນລາຍວັນ ດັ່ງນັ້ນ ຄະນະສະເພາະກິດຈິ່ງມີທິດຊີ້ນຳໃຫ້ສືບຕໍ່ປິດບັນດາກິດຈະການຮ້ານບັນເທີງ, ດ່ານປະເພນີ-ດ່ານທ້ອງຖິ່ນ, ສືບຕໍ່ໂຈະການອອກວີຊ່າທ່ອງທ່ຽວ ແລະ ຢ້ຽມຢາມ ພ້ອມທັງໃຫ້ສືບຕໍ່ໂຈະຊົ່ວຄາວສຳລັບຍົນເຊົ່າເໝົາລຳລະຫວ່າງປະເທດ ແລະ ກຳນົດປິດຮ້ານອາຫານເວລາ 23:00 ໂມງ ໃນທົ່ວປະເທດ.


ທ່ານ ຮສ. ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຫົວໜ້າກອງເລຂາຄະນະສະເພາະກິດ ຖະແຫຼງໃນວັນທີ 31 ສິງຫາ 2020 ກ່ຽວກັບການສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ-19 ໃນໄລຍະແຕ່ວັນທີ 1- 30 ກັນຍາ 2020 ວ່າ: ເພື່ອສືບຕໍ່ເຂັ້ມງວດປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການລະບາດຂອງພະຍາດໂຄວິດ-19, ຄະນະສະເພາະກິດໄດ້ມີທິດຊີ້ນໍາດັ່ງນີ້:


1) ສືບຕໍ່ປິດບັນດາກິດຈະການຮ້ານບັນເທີງ, ຮ້ານຄາລາໂອເກະ ແລະ ຮ້ານເກມ. ສໍາລັບບັນດາຮ້ານບັນເທິງ ແລະ ຮ້ານຄາລາໂອເກະ ໃຫ້ພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ກວດກາ ຕາມຄຳສັ່ງຂອງລັດຖະບານ ຜ່ານມາ, ຖ້າເຫັນວ່າຍັງມີການລະເມີດ ໃຫ້ມີການກ່າວເຕືອນ, ຖ້າຍັງຝ່າຝືນ ກໍ່ໃຫ້ດຳເນີນການຖອນໃບອະນຸຍາດຊົ່ວຄາວ.


2) ສືບຕໍ່ປິດດ່ານປະເພນີ ແລະ ດ່ານທ້ອງຖິ່ນ ສຳລັບການເຂົ້າ-ອອກ ຂອງບຸກຄົນທົ່ວໄປ ແລະ ການຂົນສົ່ງສິນຄ້າ, ຍົກເວັ້ນບາງດ່ານປະເພນີ ຫຼື ດ່ານທ້ອງຖິ່ນ ທີ່ໄດ້ຮັບອະນຸຍາດຈາກລັດຖະບານ ໃຫ້ລົດຂົນສົ່ງສິນຄ້າ ເຂົ້າ-ອອກ ໄດ້. ສ່ວນດ່ານສາກົນ ສືບຕໍ່ປິດສຳລັບການເຂົ້າ-ອອກ ຂອງບຸກຄົນທົ່ວໄປ, ຍົກເວັ້ນ ພົນລະເມືອງລາວ ແລະ ຊາວຕ່າງປະເທດ ທີ່ມີຄວາມຈຳເປັນຮີບດ່ວນ ໃນການເດີນທາງເຂົ້າ-ອອກ ສປປ ລາວ ທີ່ໄດ້ຮັບອະນຸຍາດ ຈາກຄະນະສະເພາະກິດ. ສໍາລັບການຂົນສົ່ງສິນຄ້າ ຜ່ານດ່ານສາກົນ ແມ່ນສາມາດເຂົ້າ-ອອກໄດ້ຕາມປົກກະຕິ.


3) ສືບຕໍ່ໂຈະການອອກວີຊາທ່ອງທ່ຽວ ແລະ ຢ້ຽມຢາມ ສໍາລັບບຸກຄົນ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດໂຄວິດ-19. ສໍາລັບ ນັກການທູດ, ພະນັກງານອົງການຈັດຕັ້ງສາກົນ, ຊ່ຽວຊານ, ນັກລົງທຶນ, ນັກທຸລະກິດ, ວິຊາການ ແລະ ແຮງງານຕ່າງປະເທດ ທີ່ມີຄວາມຈໍາເປັນ ແລະ ຮີບດ່ວນ ສາມາດເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆໄດ້, ແຕ່ຕ້ອງຜ່ານການພິຈາລະນາເຫັນດີຈາກຄະນະສະເພາະກິດ.


4) ໃຫ້ສືບຕໍ່ໂຈະຊົ່ວຄາວສໍາລັບຍົນເຊົ່າເໝົາລໍາລະຫວ່າງປະເທດກ່ອນ ແລະ ໃຫ້ຄະນະສະເພາະກິດ ສົມທົບກັບກົມການບິນພົນລະເຮືອນ ແລະ ພາກສ່ວນກ່ຽວຂ້ອງ ສືບຕໍ່ອອກມາດຕະການໃໝ່ ໃຫ້ລະອຽດ ແລະ ຮັດກຸມ ສະເໜີມາຍັງລັດຖະບານ ເພື່ອຂໍການອະນຸມັດກ່ອນ ຈຶ່ງດຳເນີນການໄດ້.


2. ເຫັນດີໃຫ້ກໍານົດເອົາ ເວລາ 23:00 ໂມງ ຕາມດໍາລັດ ສະບັບເລກທີ 315/ລບ, ລົງວັນທີ 02 ຕຸລາ2017 ເປັນເວລາປີດຮ້ານອາຫານ ໂດຍໃຫ້ປະຕິບັດເປັນເອກະພາບໃນຂອບເຂດທົ່ວປະເທດ. ກ່ຽວກັບການປະຕິບັດບັນດາມາດຕະການປ້ອງກັນ, ຄວບຄຸມ ແລະ ສະກັດກັ້ນ ສໍາລັບຮ້ານອາຫານ ໃນໄລຍະຜ່ານມາ ທີ່ຍັງມີບາງທ້ອງຖິ່ນ ປະຕິບັດບໍ່ເປັນເອກະພາບກັນນັ້ນ, ມອບໃຫ້ຄະນະສະເພາະກິດ ອອກຄໍາແນະນຳສະເພາະ ໃຫ້ລະອຽດຕື່ມ.