ຕາມນີ້! ເຜີຍສາເຫດແທ້ຈິງ ກໍລະນີປິດວັດໜອງພະຍາເມື່ອ 2ກັນຍາທີ່ຜ່ານມາ

ຕາມນີ້! ເຜີຍສາເຫດແທ້ຈິງ ກໍລະນີປິດວັດໜອງພະຍາເມື່ອ 2ກັນຍາທີ່ຜ່ານມາ

3rd September 2020 0 By Education

ຫຼັງຈາກທີ່ມີກະແສຂອງສັງຄົມພາກັນສົງໃສວ່າເປັນຫຍັງຄືມີການປິດ ວັດໜອງພະຍາ ເມື່ອວັນທີ 2 ກັນຍາ 2020 ທີ່ຜ່ານມາ ເນື່ອງຈາກກົງກັບວັນຫໍ່ເຂົ້າສະຫຼາກ ເຮັດໃຫ້ປະຊາຊົນຊາວພຸດ ເຂົ້າໄປໃສ່ບາດ ຫຼື ເຮັດບຸນບໍ່ໄດ້ ເນື່ອງຈາກມີການລັອກກະແຈປະຕູວັດແໜ້ນໜາ ພ້ອມມີກອງຫຼອນບ້ານ ແລະ ທະຫານມາເຝົ້າຍາມຢ່າງເຄັ່ງຄັດ.

ຕໍ່ກັບເຫດການດັ່ງກ່າວ ໃນມື້ດຽວກັນ ທ່ານ ບຸນວັນ ຈະສົ້ວກາວ ຮອງເຈົ້າເມືອງ ໄຊທານີ ໄດ້ອອກມາຕອບຂໍ້ສົງໃສທັງຫຼາຍກັບລາຍການໜຶ່ງຜ່ານວິທະຍຸກະຈາຍສຽງແຫ່ງຊາດລາວ ວ່າ: ການປິດປະຕູວັດໜອງພະຍາ ກໍ່ຍ້ອນວ່າເພື່ອຮັບປະກັນຄວາມປອດໄພຕໍ່ພຸດທະສາສະນິກກະຊົນ ຜູ້ມາເຮັດບຸນກຸສົນ ໃນວັດດັ່ງກ່າວ ເຊີ່ງພວມກຳລັງມີຂໍ້ຂັດແຍ່ງກັນມາແລ້ວກ່ອນໜ້ານີ້ປະມານ 4-5 ປີແລ້ວ ເພາະຄວາມບໍ່ເຂົ້າໃຈລະຫວ່າງຄູບາ ຜູ້ທີ່ເປັນເຈົ້າອະທິການວັດ ຊື່ ສົມປອງ ກັບອົງການຈັດຕັ້ງບ້ານ ໜອງພະຍາ.

ເຮັດໃຫ້ສະພາບການມີຄວາມຮຸນແຮງຂື້ນເລື້ອຍໆ ໂດຍທາງເມືອງ ໄຊທານີ ໄດ້ມີການສຶກສາອົບຮົມໃຫ້ທັງສອງຝ່າຍເຂົ້າໃຈກັນ ແຕ່ກໍ່ບໍ່ເປັນຜົນ ພ້ອມກັນນັ້ນທາງນະຄອນຫຼວງໄດ້ມີການເກັບກຳຂໍ້ມູນ, ຫຼັກຖານອື່ນໆເພີ່ມອີກ ຈື່ງສາມາດສະຫຼຸບໄດ້ວ່າເລື່ອງທັງໝົດນີ້ມາຈາກພຶດຕິກຳຂອງຄູບາ ສົມປອງ ເຊີ່ງເປັນຄວາມບໍ່ເໝາະສົມ, ມີລັກສະນະເຮັດຜິດສີນທຳຫຼາຍປະການ, ຜ່ານມາເຄີຍມີປະຫວັດ ຄູບາ ສົມປອງໄດ້ຮັບພະ, ສຳມະເນນ ແລະ ແມ່ຂ່າວເຂົ້າມາຈຳຢູ່ວັດ ໂດຍບໍ່ມີການແຈ້ງອຳນາດການປົກຄອງ ວ່າເປັນໃຜ, ມາແຕ່ໃສ ພ້ອມກັນນັ້ນກໍ່ຍັງເຄີຍໄລ່ ອຳນາດການປົກຄອງ ອອກຈາກວັດມາແລ້ວ.

ດັ່ງນັ້ນທາງອົງການພະພຸດທະສາສະໜາສຳພັນລາວ ຂັ້ນນະຄອນຫຼວງຈື່ງໄດ້ຕີລາຄາວ່າ ພຶດຕິກຳດັ່ງກ່າວນັ້ນ ມີຄວາມຜິດແທ້ດັ່ງນັ້ນຈື່ງໄດ້ອອກຂໍ້ຕົກລົງສະບັບເລກທີ່ 028/ອພສ.ນວ ລົງວັນທີ່ 24 ເດືອນ ສິງຫາ ປີ 2020 ໂດຍມີເນື້ອໃນໃຫ້ຜູ້ກະທຳຜິດດັ່ງກ່າວນັ້ນ ຍ້າຍອອກຈາກວັດດັ່ງກ່າວ ຍ້າຍອອກຈາກວັດບໍ່ໃຫ້ກາຍວັນທີ່ 30 ເດືອນ ສິງຫາ ປີ 2020 ແຕ່ຜູ້ກ່ຽວໄດ້ປະຕິເສດ ບໍ່ເຂົ້າຮ່ວມການອ່ານຂໍ້ຕົກລົງ; ມາຮອດວັນທີ 2 ກັນຍາ ປີ 2020 ຈື່ງຖືວ່າຜູ້ກ່ຽວໝົດສິດຢູ່ວັດດັ່ງກ່າວ ອຳນາດການປົກຄອງຈື່ງໄດ້ປະຕິບັດຕາມຂໍ້ຕົກລົງຕາມສະບັບດັ່ງກ່າວ ຄືບັງຄັບໃຫ້ຜູ້ກ່ຽວອອກຈາກວັດ.

ເພື່ອຫຼີກລ່ຽງບັນຫາການຕໍ່ຕ້ານຄືນຂອງ ຄູບາ ສົມປອງ ໂດຍຢ້ານວ່າຖືເອົາການໂຮມຊຸມນຸມເຮັດບຸນນັ້ນເປັນຂະບວນການໜື່ງມາຕໍ່ຕ້ານອຳນາດການປົກຄອງ ຈື່ງປ້ອງກັນບໍ່ໃຫ້ອອກຕົນຍາດໂຍມເຂົ້າໄປເຮັດບຸນຢູ່ວັດດັ່ງກ່າວ ເຊີ່ງກ່ອນໜ້ານີ້ອຳນາດການປົກຄອງໄດ້ມີການປະກາດແຈ້ງເລື່ອງອຳນວຍຄວາມສະດວກໃຫ້ໄປເຮັດບຸນຢູ່ອີກວັດໜື່ງຢູ່ພາຍໃນບ້ານດຽວກັນ ເຊີ່ງປະຊາຊົນສ່ວນຫຼາຍກໍ່ເຫັນດີ ແຕ່ກໍ່ຍັງມີຍາດໂຍມມາເຮັດບຸນໃນວັດດັ່ງກ່າວ ກໍ່ແມ່ນປະຊາຊົນທີ່ມາຈາກບ້ານອື່ນເທົ່ານັ້ນ.

ພ້ອມນີ້ຍັງຮຽກຮ້ອງໃຫ້ສັງຄົມເຂົ້າໃຈວ່າ ບັນຫານີ້ບໍ່ແມ່ນມີແຕ່ຝ່າຍອຳນາດການປົກຄອງ ເຮັດເກີນໜ້າທີ່ ແຕ່ກໍ່ຍ້ອນວ່າ ຄູບາ ສົມປອງ ບໍ່ປະຕິບັດຕໍ່ກົດລະບຽບຕໍ່ກົດໝາຍຂອງບ້ານເມືອງ ແລະ ຂໍ້ຕົກລົງຂອງຝ່າຍອົງການພະພຸດທະສາດສະໜານະຄອນຫຼວງວຽງຈັນ ພ້ອມກັນຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງວັດດັ່ງກ່າວອີກດ້ວຍ