ອຸທາຫອນ! ເອົາໝອນໃຫ້ລູກທີ່ອາຍຸພຽງເດືອນປາຍໝູນ ສຸດທ້າຍສູນເສຍລູກໄປຕະຫຼອດການ

ອຸທາຫອນ! ເອົາໝອນໃຫ້ລູກທີ່ອາຍຸພຽງເດືອນປາຍໝູນ ສຸດທ້າຍສູນເສຍລູກໄປຕະຫຼອດການ

5th September 2020 0 By Education

ນັບເປັນອີກຂ່າວເສົ້າທີ່ສ້າງຄວາມສະເທືອນໃຈບໍ່ແມ່ນໜ້ອຍ ສໍາລັບເຫດການເດັກນ້ອຍໄວ 45ມື້ ເສຍຊີວິດຈາກເຫດທີ່ພໍ່ແມ່ມືໃໝ່ໃຫ້ລູກນອນໝອນສູງເກີນໄປ ສຸດທ້າຍເຫດບໍ່ຄາດຄິດເກີດຂຶ້ນ ເດັນນ້ອຍເສຍຊີວິດຄາບ່ອນນອນ.

ເຫດການທີ່ແອັດກ່າວມາຂ້າງເທິງ ແມ່ນເກີດຂຶ້ນທີ່ປະເທດໄທ ແຕ່ຍ້ອນເຫັນວ່າມັນເປັນເລື່ອງໃກ້ຕົວທີ່ບໍ່ຄວນເບິ່ງຂ້າມ ແອັດຈຶ່ງຂໍຍົກເອົາມາເຕືອນສະຕິແມ່ລູກອ່ອນທັງຫຼາຍໃຫ້ລະມັດລະວັງ ແລະ ມີສະຕິໃນການລ້ຽງດູ ເບິ່ງແຍງລູກນ້ອຍໃຫ້ຫຼາຍຂຶ້ນ.

ໂດຍເພຈຂ່າວຂອງຊ່ອງ 7 ເຜີຍວ່າ ເຫດການດັ່ງກ່າວເກີດຂຶ້ນເມື່ອວັນທີ 4 ກັນຍາ 2020  ໃນພື້ນທີ່ໝູ່ 7 ຕໍາບົນຄອງຂາມ, ອໍາເພີຢາງຕະຫຼາດ ຈັງຫວັດກາລະສິນ, ເຊິ່ງພໍ່ຂອງເດັກນ້ອຍຜູ້ເສຍຊີວິດເຜີຍວ່າ: ທຸກເຊົ້າຕົນເອງຈະຮີບຕື່ນເຊົ້າເພື່ອມາດູແລລູກ ແລະ ຫຼິ້ນກັບລູກ ແຕ່ເຊົ້າມື້ນີ້ ເມື່ອຕື່ນຂຶ້ນມາກັບພົບວ່າລູກຊາຍນອນຫງາຍຫຼັບຕານິ້ງ ບໍ່ດີ້ນແຕ່ຢ່າງໃດ ເມື່ອຈັບເບິ່ງກໍ່ພົບວ່າຄີງເຢັນໄປໝົດແລ້ວ ພ້ອມມີສີຂຽວຄໍ້າ ຕົນເອງ ແລະ ເມຍເກືອບຊັອກ ເຮັດຫຍັງບໍ່ຖືກເລີຍ ຈຶ່ງເອີ້ນພໍ່ແມ່ພີ່ນ້ອງໃຫ້ມາເບິ່ງ ແລະ ໂທແຈ້ງຕໍາຫຼວດທັນທີ.

ຈາກການກວດສອບເບື້ອງຕົ້ນ ແພດລະບຸສາເຫດເກີດຈາກເດັກນ້ອຍຂາດອາກາດຫາຍໃຈເປັນເວລາດົນ ເນື່ອງຈາກການໃຫ້ເດັກນ້ອຍນອນຫງາຍເທິງບ່ອນນອນນຸ່ມ ແລ້ວເອົາໝອນໝູນຫົວໃຫ້ສູງຂຶ້ນ ເຮັດໃຫ້ຊ່ວງລໍາຄໍເດັກທີ່ສັ້ນເກີດການພັບທັບຫຼອດລົມ ຈົນຫສາຍໃຈບໍ່ສະດວກ ເມື່ອນອນຢູ່ໃນທ່າດັ່ງກ່າວເປັນເວລາດົນ ເຊິ່ງເປັນຊ່ວງທີ່ເດັກນອນຫຼັບອີກ ເຮັດໃຫ້ຫາຍໃຈຕິດຂັດ ຈຶ່ງເປັນສາເຫດໃຫ້ຂາດອາກາດຫາຍໃຈ

ແນວໃດກໍ່ຕາມ ຂໍໃຫ້ທຸກຄົນເອົາເລື່ອງນີ້ເປັນບົດຮຽນ ໂດຍສະເພາະພໍ່ແມ່ມືໃໝ່ ຕອນກາງຄືນຕ້ອງໝັ່ນລຸກມາເບິ່ງລູກເປັນໄລຍະໆ ວ່າຈະຖືກຜ້າຫົ່ມ ຫຼື ໝອນປົກປິດໄວ້ບໍ່ ຫຼື ໃຫ້ເດັກນ້ອຍນອນໃນທ່ານອນຫົວສູງທີ່ອາດເຮັດໃຫ້ຂາດອາກາດຫາຍໃຈ ເພື່ອປ້ອງກັນບໍ່ໃຫ້ເກີດມີເຫດການເສົ້າແບບນີ້ອີກ.