ບໍ່ທຳມະດາ ທາງເຂົ້າບ້ານຫ້ວຍອີເລີດໃນລະດູຝົນ

ບໍ່ທຳມະດາ ທາງເຂົ້າບ້ານຫ້ວຍອີເລີດໃນລະດູຝົນ

8th September 2020 0 By Education

ອົດເອົາເດີ້ພີ່ນ້ອງ, ລະດູຝົນນີ້ປະກົດວ່າ ເສັ້ນທາງຫຼາຍເຂດແຂວງແມ່ນເຕັມໄປດ້ວຍຂີ້ຕົມການເດີນທາງໄປມາແມ່ນລຳບາກບໍ່ໜ້ອຍ ໃຜກໍ່ຈົ່ມທຸກຈົ່ມຍາກ ເຊັ່ນດຽວກັບທາງເຂົ້າບ້ານຫ້ວຍອີເລີດ ເມືອງຫີນເຫີບແຂວງວຽງຈັນ.

ສະພາບເສັ້ນທາງແມ່ນໜັກໜ່ວງ ! ປະຊາຊົນ ບ້ານຫ້ວຍອີເລີດ ເມືອງຫີນເຫີບ ແຂວງວຽງຈັນ ສົ່ງຮູບ ສະພາບເສັ້ນທາງ ໃນລະດູຝົນ ຂອງບ້ານ ຊຶ່ງເປັນເສັ້ນທາງ ເຊື່ອມຕໍ່ ເຂົ້າໄປຫາບ້ານຄອນແກ້ວ ແລະ ອີກຫລາຍໆຫມູ່ບ້ານທີ່ ຢູ່ເລິກເຂົ້າໄປ, ປະຈຸບັນ ເປັນອໍາມະພາດ ຕ້ອງແມ່ນລົດໄຖພຸ້ນແລຈັ່ງຊີ້ໄປໄດ້ແຕ່ກໍ່ຍັງຫຍຸ້ງຍາກຢູ່.

ອັນສຳຄັນແມ່ນ ລູກຫລານໃນຫມູ່ບ້ານບໍ່ສາມາດເດີນທາງໄປໂຮງຮຽນໄດ້ ຍ້ອນລົດບໍ່ສາມາດທຽວທາງ, ພະນັກງານ, ແພດຫມໍ ບໍ່ສາມາດໄປວຽກໄດ້ເຊັ່ນດຽວກັນ, ຊາວຄ້າຂາຍບໍ່ສາມາດເຂົ້າມາໃນເມືອງເພື່ອຊື້ເຄື່ອງໄປຄ້າຂາຍ ເພື່ອລ້ຽງຊີບຕົນເອງ ແລະ ຄອບຄົວໄດ້ ຖືວ່າຕິດນຳເສັ້ນທາງໄປໝົດ.

ສະພາບຄວາມຫຍຸ້ງຍາກນີ້ ແມ່ນເກີດຂຶ້ນ ທຸກປີ ແກ່ຍາວມາໄດ້ຫຼາຍສິບປີແລ້ວ ໂດຍ ຍາມຝົນ ປະຊາຊົນຕ້ອງໄດ້ທົນທຸກ ເດືອດຮ້ອນ ຈາກສະພາບ ຖະໜົນໝື່ນ ເປັນບວກ ເປັນຫຼຸມ ມີຂີ້ຕົມ ນໍ້າອັ່ງເດີນທາງລຳບາກ, ສ່ວນຕົກມາຍາມແລ້ງ ແມ່ນຕ້ອງໄດ້ພົບພໍ້ກັບ ສະພາບຝຸ່ນລະອອງ ຈາກລົດ ແລະ ຂີ້ຝຸ່ນ ຢູ່ບໍ່ຂາດສາຍ ຈົນເຮັດໃຫ້ເດັກນ້ອຍ ແລະ ຜູ້ໃຫຍ່ຫຼາຍຄົນ ມີປັນຫາ ທາງລະບົບຫາຍໃຈ.

ໃນໄລຍະຜ່ານມາ ຊາວບ້ານໄດ້ມີການໂອ້ລົມ ແລະ ຫ້າມລົດບັນທຸກໃຫຍ່ ທຽວທາງ ດັ່ງກ່າວ, ແຕ່ກະບໍ່ສຳເລັດ ຍ້ອນວ່າລົດບັນທຸກ ໄດ້ມີການຈ່າຍຄ່າທຳນຽມໃຫ້ກັບເມືອງໄປແລ້ວ.

ຈຶ່ງຂໍສົ່ງພາບ ມາເປັນຫຼັກຖານ ແລະ ຮຽກຮ້ອງໃຫ້ ຂະແໜງການທີ່ກ່ຽວຂ້ອງ ຈົ່ງໄດ້ເຫັນໃຈ ລົງມາຊ່ວຍປັບປຸງ ແບ່ງເບົາ ຫຼືແກ້ໄຂ ບັນຫານີ້ ຊ່ວຍປະຊາຊົນດ້ວຍ.

ພາບ-ຂ່າວ: ສຸພານິດ ວົງແສງທອງ