ກົດ 10 ຂໍ້ຂອງການຕະຫຼາດເທິງໂຊຊ່ຽວມີເດຍ

ກົດ 10 ຂໍ້ຂອງການຕະຫຼາດເທິງໂຊຊ່ຽວມີເດຍ

18th January 2020 0 By Admin

ປະຕິເສດບໍ່ໄດ້ເລີຍວ່າປະຈຸບັນ ໂລກກຳລັງຢູ່ໃນຍຸກຂອງ ໂຊຊຽວຢ່າງແທ້ຈິງ ມັນຈຶ່ງກາຍເປັນອີກໜຶ່ງພື້ນທີ່ຂະໜາດໃຫຍ່ ທີ່ສ້າງໂອກາດໃຫ້ທຸລະກິດຈະເລີນເຕີບໂຕ. ການສື່ສານທີ່ສະດວກສະບາຍຂຶ້ນ ເຮັດໃຫ້ ເຮົາສາມາດຮັບຟັງຄວາມຄິດເຫັນຂອງຜູ້ບໍລິໂພກຕໍ່ສິນຄ້າ ແລະ ບໍລິການຕ່າງໆ ເພື່ອນຳມາປັບປຸງພັດທະນາຜະລິດຕະພັນໄດ້ທັນທ່ວງທັນ ຈຶ່ງບໍ່ແປກທີ່ “Social Network Marketing” ຫຼື ການຕະຫຼາດອອນ ລາຍເທິງໂຊຊ່ຽວເນັດເວີກ ເຂົ້າມາມີຄວາມສຳຄັນກັບທຸລະກິດທັງຂະໜາດນ້ອຍ, ກາງ ໄປເຖິງໃຫຍ່ ໄດ້.


Nicki Jenns ບ໊ອກເກີ້ສາວ ແລະ ຜູ້ປະກອບການດ້ານອອນລາຍ ໄດ້ເຜີຍເຄັດລັບການຕະຫຼາດອອນລາຍໄວ້ເທິງເວບໄຊ Yourstory ວ່າການສ້າງຄອນເທັນ ແລະ ການຕະຫຼາດອອນລາຍສາມາດຊ່ວຍຂະຫຍາຍຖານລູກຄ້າໄດ້ ແຕ່ຄວນຈະເລີ່ມແນວໃດ? ຖ້າທ່ານບໍ່ເຄີຍມີພື້ນຖານດ້ານນີ້ມາກ່ອນ. ມື້ນີ້ທ່ານ ຈຶ່ງຄວນຮູ້ໄວ້ ກ່ຽວກັບການສ້າງຕະຫຼາດເທິງໂຊຊ່ຽວມີເດຍ.

ອີກໜຶ່ງສິ່ງສຳຄັນທີ່ທ່ານຄວນຮູ້ຄື ທ່ານຈະເຈາະກຸ່ມລູກຄ້າເປົ້າໝາຍປະເພດໃດໄດ້ເຕັມປະສິດທິພາບທີ່ສຸດ ຜ່ານໂຊຊ່ຽວ? ຕົວຢ່າງ ຖ້າທ່ານຂາຍເສື້ອຜ້າສຳລັບໄວລຸ້ນ ນັ້ນແປວ່າ ທ່ານຕ້ອງໃຫ້ກຸ່ມນັກຮຽນ ມັດທະຍົມເທິງເຟສບຸ໊ກນີ້ແຫຼະເປັນກະບອກສຽງໃຫ້ກັບສິນຄ້າຂອງທ່ານ ດ້ວຍການຫຼຸດລາຄາໃຫ້ເຂົາເຈົ້າ ລວມເທິງແຊຣລິ້ງເພສເຟສບຸກຂອງທ່ານໄວ້ເທິງເວບໄຊຫຼັກ ຫຼື ກຸ່ມຕ່າງໆ ເທິງເຟສບຸກອີກ. ດັ່ງນັ້ນທ່ານຄວນຮູ້ກົດ 10 ຂໍ້ຂອງການຕະຫຼາດເທິງໂຊຊ່ຽວມີເດຍ.

1. ເວົ້າໜ້ອຍ ຮັບຟັງຫຼາຍ
ການຕະຫຼາດທີ່ຍົກຄຸນນະພາບຂອງຄອນເທັນ Content Marketing ເທິງໂຊຊ່ຽວມີເດຍຈະປະ ສົບຄວາມສຳເລັດໄດ້ນັ້ນ ຕ້ອງອາໄສການຮັບຟັງເປັນຫຼັກ. ທ່ານຕ້ອງສຶກສາຂໍ້ມູນອອນລາຍຂອງກຸ່ມ ເປົ້າໝາຍຫາໃຫ້ເຫັນວ່າສິ່ງສຳຄັນສຳລັບລູກຄ້າແມ່ນຫຍັງ ຈາກນັ້ນຈຶ່ງຄ່ອຍໆສື່ສານກັບລູກຄ້າ ແລະ ສ້າງມູນຄ່າເພີ່ມໃຫ້ຄອນເທັນຂອງທຸລະກິດທ່ານ.
2. ກົງປະເດັນ
ທ່ານຄວນສ້າງຄອນເທັນທີ່ກະທັດຮັດ ແລະ ກົງປະເດັນ ເນັ້ນສ້າງພາບລັກຂອງແບຣນ ໃຫ້ເຂັ້ມ ແຂງເພື່ອຊະນະໃຈລູກຄ້າກຸ່ມໃໝ່ໆ ບໍ່ເນັ້ນໂປຣໂມດແບບຫວ່ານແຫ.


3. ຄຸນນະພາບ ມາກ່ອນປະລິມານ
ແນ່ນອນວ່າການມີເພື່ອນ (friends) ພຽງ 1.000 ຄົນທີ່ອ່ານ ແລະແບ່ງປັນ(ແຊຣ)ຄອນເທັນຂອງທ່ານໃຫ້ຄົ ອື່ນໆ ຍ່ອມດີກວ່າມີເພື່ອນ20.000 ຄົນ ທີ່ບໍ່ໄດ້ໃສ່ໃຈກັບຄອນເທັນຂອງທ່ານເລີຍ ແລະ ຢ່າເພິ່ງພາພຽງແຕ່ການຊື້ໂຄສະນາຂອງເຟສບຸກ ວ່າສາມາດເຂົ້າເຖິງຜູ້ໃຊ້ເປັນໝື່ນລາຍໃນເວລາອັນສັ້ນອີກ.
4. ມີຄວາມອົດທົນ
ການເຮັດ content marketing ເທິງໂລກໂຊຊຽວ ບໍ່ອາດເຮັດໃຫ້ທ່ານທະລຸເປົ້າໄດ້ໃນວັນ ດຽວ ເຖິງວ່າໂຄສະນາຈະເປັນສິ່ງທີ່ຫຼາຍໆທ່ານເລືອກເຮັດ ແຕ່ສິ່ງສໍາຄັນຄືການລົງທຶນລົງແຮງເພື່ອຜົນປະໂຫຍດໃນໄລຍະຍາວທີ່ຈັບຕ້ອງໄດ້ແທ້.
5. ຊ້າໆໄດ້ພ້າເຫຼັ້ມງາມ
ຕັ້ງໃຈໂພສຄອນເທັນດີໆ ທີ່ຊະນະໃຈກຸ່ມລູກຄ້າເປົ້າໝາຍໃຫ້ໄດ້ກ່ອນ ແລະ ແບຣນຂອງທ່ານຈະ ມີຊື່ສຽງ ຕາມການແຊຣຜ່ານທະວິດເຕີ, ເຟສບຸກ ຫຼື ເວບໄຊອື່ນໆ ດ້ວຍກຸ່ມລູກຄ້າຂອງທ່ານນັ້ນເອງ ທ້າຍທີ່ສຸດແລ້ວຊື່ຂອງແບຣນທ່ານຈະປາກົດຢູ່ຕາມເຊີດເອັນຈິນຕ່າງໆ ຈົນຄົນຈຳນວນຫຼາຍຈະສາມາດ ເຂົ້າເຖິງໄດ້ງ່າຍ.


6. ຫາບຸກຄົນທີ່ມີຊື່ສຽງເທິງສື່ໂຊຊ່ຽວ ຫລື Influencer
ໃນທາງການຕະຫຼາດຄຳວ່າ Influencer ໝາຍເຖິງ ບຸກຄົນທີ່ມີຊື່ສຽງເທິງສື່ໂຊຊ່ຽວ ແລະ ມີ ອິດທິພົນຕໍ່ພຶດຕິກຳຂອງກຸ່ມບໍລິໂພກຈຳນວນໜຶ່ງ ລອງໃຊ້ເວລາສຶກສາເບິ່ງວ່າ Influencer ສຳລັບ ການຕະຫຼາດຂອງທ່ານຄວນເປັນແບບໃດ ສ້າງສຳພັນທີ່ດີກັບ Influencer ເຫຼົ່ານັ້ນ ເພື່ອໃຫ້ແບຣນ ຂອງທ່ານເຂົ້າເຖິງກຸ່ມຜູ້ຕິດຕາມຂອງພວກເຂົາອີກທາງໜຶ່ງ ຖ້າຄອນເທັນຂອງທ່ານໜ້າເຊື່ອຖື ແລະ ໜ້າສົນໃຈພໍ ທ້າຍທີ່ສຸດທຸລະກິດຂອງທ່ານຈະໄດ້ລູກຄ້າກຸ່ມໃໝ່ໆ ແລະ ມີໂອກາດໃໝ່ໆໃນການເຕີບ ໂຕເພີ່ມຂຶ້ນ.
7. ເພີ່ມພູນມູນຄ່າ
ການສຸ່ມໃສ່ການໂຄສະນາໂປຣໂມດສິນຄ້າ ແລະ ບໍລິການຂອງທ່ານອາດເຮັດໃຫ້ຄົນເບື່ອໜ່າຍ, ໝົດຄວາມສົນໃຈ ດັ່ງນັ້ນການສ້າງມູນຄ່າເພີ່ມຈຶ່ງເປັນເລື່ອງສຳຄັນ, ໂຟກັສບ່ອນຂາຍໃຫ້ໜ້ອຍລົງ ແລ້ວຫັນໄປນຳສະເໜີຄອນເທັນທີ່ໂດດເດັ່ນກວ່າ ພ້ອມກັບການພັດທະນາຄວາມສຳພັນກັບເຫຼົ່າ Influencer ເມື່ອເວລາຜ່ານໄປການໂປຣໂມດຈະເກີດຂຶ້ນເອງແບບປາກຕໍ່ປາກ ໂດຍທີ່ທ່ານບໍ່ຕ້ອງ ເຮັດເອງເລີຍ.
8. ສ້າງເຄືອຂ່າຍ
ໃຫ້ຄວາມສຳຄັນກັບການສ້າງເຄືອຂ່າຍຕິດຕໍ່ກັນເທິງພື້ນທີ່ອອນລາຍ ຄືທີ່ທ່ານເຮັດໃນຊີວິດຈິງ ການສ້າງ ແລະ ຮັກສາຄວາມສຳພັນກັບຜູ້ຄົນທີ່ຕິດຕາມທຸລະກິດທ່ານ ຖືເປັນສິ່ງສຳຄັນອັນດັບຕົ້ນໆ ຂອງການຕະຫຼາດຜ່ານໂຊຊ່ຽວມີເດຍທີ່ປະສົບຄວາມສຳເລັດ.
9. ຄວາມສະໝ່ຳສະເໝີ
ຢ່າໂພສຄອນເທັນແລ້ວມິດງຽບໄປເລີຍ ທ່ານຕ້ອງມີສ່ວນຮ່ວມໃນການໂຄສະນາກັບຜູ້ຄົນທີ່ ສົນໃຈຄອນເທັນນັ້ນ ທ່ານບໍ່ສາມາດຄາດເດົາໄດ້ວ່າຈະມີຜູ້ໃຊ້ງານອອນລາຍເຂົ້າມາເບິ່ງຄອນເທັນຂອງທ່ານຕອນໃດ. ດັ່ງນັ້ນຈຶ່ງກຽມພ້ອມສະເໝີເພື່ອພວກເຂົາ ຖ້າຫາກມິດໄປໃນໜ້າເພສເປັນອາທິດ ລູກຄ້າກໍ່ຍ່ອມຈະຫາຍໄປເຊັ່ນດຽວກັນ.


10. “ໃຫ້” ເພື່ອທີ່ຈະ “ຮັບ”
ຢ່າຄິດວ່າຄົນອື່ນຈະແຊຣຄອນເທັນ ຫຼື ເວົ້າເຖິງແບຣນຂອງທ່ານ ຖ້າທ່ານຍັງບໍ່ສົນໃຈແບຣນ ອື່ນໆເລີຍ ສະນັ້ນທ່ານຈຶ່ງຄວນແບ່ງເວລາສ່ວນໜຶ່ງເທິງໂຊຊ່ຽວເນັດເວີກມາໄວ້ແຊຣ ແລະ ຕິດຕາມຄອນເທັນຂອງຄົນອື່ນໆນຳ ສ່ວນໜຶ່ງກໍ່ເພື່ອຮຽນຮູ້ຕະຫຼາດ ແລະ ຫາວິທີເຮັດໃຫ້ແບຣນຂອງທ່ານ ໂດດເດັ່ນກວ່າຄົນອື່ນໆອີກ.
ສະຫຼຸບ
ຈົ່ງສ້າງຄວາມໂດດເດັ່ນໃຫ້ບໍລິສັດຂອງທ່ານ ເຈາະກຸ່ມລູກຄ້າໃໝ່ໆ ແລະ ຮັກສາສຳພັນກັບລູກຄ້າ ໃນໄລຍະຍາວ ຖ້າທ່ານສ້າງຄອນເທັນທີ່ໜ້າສົນໃຈ ເຂົ້າເຖິງງ່າຍ ແລະ ມີຄວາມເປັນມືອາຊີບໄດ້ ພຽງເທົ່ານີ້ ຄວາມສຳເລັດເທິງໂຊຊ່ຽວເນັດເວີກຈະເກີດຂຶ້ນບໍ່ຍາກ.