ປາດໂທ! 2ສ່ຽວຮັກກໍ່ເຫດລັກງາຊ້າງ ໄປບໍ່ລອດຕ້ອງກອດຄໍກັນເຂົ້າຄຸກ

ປາດໂທ! 2ສ່ຽວຮັກກໍ່ເຫດລັກງາຊ້າງ ໄປບໍ່ລອດຕ້ອງກອດຄໍກັນເຂົ້າຄຸກ

10th September 2020 0 By Education

ເອົາແຕ່ຊິເຮັດໄປແລ້ວ ໂຈນທຸກມື້ນີ້ມາທຸກຮູບແບບ ລັກທຸກຢ່າງທີ່ຂວາງໜ້າ ຂໍພຽງໄດ້ເງິນ ໂດຍບໍ່ຄໍານຶງເຖິງຄົນອື່ນ ແລະ ຜົນທີ່ຕາມມາ. ດັ່ງ 2 ໜຸ່ມຄູ່ຫູນີ້ ທມີ່ກໍ່ເຫດລັກງາຊ້າງ ແຕ່ສຸດທ້າຍ ໜີບໍ່ລອດຖືກຈັບມາດໍາເນີນຄະດີ ກຽມຮັບໂທດຕາມລະບຽບກົດໝາຍຂອງບ້ານເມືອງ.

ທ້າວ ສໍາລານ ອາຍຸ 25 ປີ ຢູ່ບ້ານໂຊກໃຫຍ່ ແລະ ທ້າວ ຄໍາສີ ອາຍຸ 25 ປີ ທັງ 2ຄົນ ຢູ່ບ້ານໂນນສະຫວັນ; ເມືອງໄຊເສດຖາ ນະຄອນຫຼວງວຽງຈັນ ຖືກເຈົ້າໜ້າທີ່ ປກສ ເມືອງໄຊເສດຖາ ຈັບຕົວໃນວັນທີ 7 ກັນຍານີ້ ຂໍ້ຫາລັກງາຊ້າງຈໍານວນ 2 ຄູ່ ໄປດຳເນີນຄະດີ.

ຜູ້ຖືກຫາທັງສອງຄົນ ຮັບສາລະພາບວ່າ: ປີ 2018 ໄດ້ເຄື່ອນໄຫວມົ້ວສຸມສິ່ງຜິດກົດໝາຍມາໂດຍຕະຫຼອດ. ຈາກນັ້ນ, ມາເດືອນມິຖຸນາ 2020 ທ້າວ ດໍາ ຢູ່ບ້ານໂຊກໃຫຍ່ ໄດ້ມາຫາທ້າວ ສໍາລານ ຢູ່ເຮືອນ ແລ້ວຊັກຊວນກັນໄປລັກຊັບພົນລະເມືອງ ໂດຍພາກັນຂີ່ລົດເລາະຕາມເສັ້ນທາງ. ພໍໄປຮອດເຂດບ້ານໄຊສະຫວ່າງ ເມືອງໄຊທານີ ເຮືອນວິນລາ 2 ຊັ້ນ ໄດ້ພາກັນເຂົ້າສັງເກດພົບວ່າ ບໍ່ມີຄົນຢູ່ເຮືອນ ຈຶ່ງພາກັນປີນກໍາແພງເຂົ້າໄປໄຂປະຕູເຮືອນ ທີ່ບໍ່ໄດ້ໃສ່ລ໋ອກ ພົບເຫັນງາຊ້າງຕິດໂຊຢູ່ໃນຝາເຮືອນ 1 ຄູ່ ຈຶ່ງພາກັນເອົາໄມ້ງັດເອົາງາຊ້າງດັ່ງກ່າວ ແລ້ວກັບອອກມານຳໄປຊຸກເຊື່ອງໄວ້ຢູ່ເຮືອນຂອງທ້າວ ສໍາລານ.

ມາເດືອນກໍລະກົດ 2020, ທ້າວ ດໍາ ແລະ ທ້າວ ຄໍາສີ ໄດ້ພາກັນມາຫຼິ້ນນໍາທ້າວ ສໍາລານ ຢູ່ເຮືອນ ແລະ ໄດ້ລົມກັນກ່ຽວກັບງາຊ້າງ ພ້ອມທັງຊວນກັນໄປລັກງາຊ້າງຢູ່ເຮືອນຫຼັງດັ່ງກ່າວອີກ ເມື່ອຕົກລົງກັນແລ້ວທັງ 3 ຄົນ ກໍໄດ້ພາກັນຂີ່ລົດຊ້ອນກັນໄປ; ເມື່ອໄປຮອດເຮືອນຫຼັງດັ່ງກ່າວ ກໍພາກັນປີນຮົ້ວເຂົ້າໄປງັດເອົາງາຊ້າງ 1 ຄູ່ ເມື່ອໄດ້ແລ້ວກໍນຳໄປໄວ້ເຮືອນທ້າວ ສໍາລານ ອີກ. ມາຮອດວັນທີ 27 ກໍລະກົດ, ທັງສອງຄົນ ກໍຖືກເຈົ້າໜ້າທີ່ກັກຕົວໄປດໍາເນີນຄະດີຕາມກົດໝາຍ ພ້ອມທັງເກັບກູ້ຄືນໄດ້ງາຊ້າງ ຈໍານວນ 2 ຄູ່ ສ່ວນທ້າວ ດໍາ ແມ່ນໄດ້ເອົາຕົວຫຼົບໜີ.

ນອກນີ້, ພວກກ່ຽວຍັງສາລະພາບຕື່ມອີກວ່າ: ໄລຍະຜ່ານມາ, ໄດ້ເຄື່ອນໄຫວລັກຊັບພົນລະເມືອງມາແລ້ວຫຼາຍຄັ້ງ ເຊິ່ງແຕ່ລະຄັ້ງແມ່ນໄດ້ເອົາໄປຂາຍໄດ້ເງິນຈໍານວນໜຶ່ງ ພາຍຫຼັງທີ່ໄດ້ເງິນມາແລ້ວ ກໍພາກັນນໍາໄປຊື້ສິ່ງຜິດກົດໝາຍ ແລະ ຈໍານວນໜຶ່ງກໍເອົາໄປຫຼິ້ນການພະນັນ-ເຕີມເຊີ້ຈົນໝົດ.