ເລີ່ມຈາກຢາກຊ່ວຍຄູ ກາຍເປັນຜູ້ປະສົບຜົນສຳເລັດທາງທຸລະກິດ

ເລີ່ມຈາກຢາກຊ່ວຍຄູ ກາຍເປັນຜູ້ປະສົບຜົນສຳເລັດທາງທຸລະກິດ

12th September 2020 0 By Education

ແຂວງສະຫວັນນະເຂດມີນັກທຸລະກິດທີ່ກຳລັງຈະກ້າວມາເປັນນັກພັດທະນາເພີ່ມອີກຄົນ ນັ້ນຄືທ່ານ ສາຍສະໝອນ ກວານເມືອງຈັນ ຜູ້ອຳນວຍການສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳ ພັນແຂວງສະຫວັນນະເຂດ ເປັນນັກທຸລະກິດອີກຄົນໜຶ່ງ ທີ່ເລີ່່ມຕົ້ນຈາກແມ່ພິມຂອງຊາດ ກ່ອນຈະກ້າວສູ່ຜູ້ທີ່ປະສົບຄວາມສຳເລັດບົນເສັ້ນທາງການດຳເນີນທຸລະກິດສະຖາບັນການເງິນຈຸລະພາກ.


ທ່ານ ສາຍສະໝອນ ກວານເມືອງຈັນ ໄດ້ໃຫ້ສຳພາດຕໍ່ນັກຂ່າວຂອງໜັງສືພິມສະຫວັນພັດທະນາວ່າ: ເມື່ອກ່ອນ ຕົນເອງແມ່ນເປັນຄູສອນເລກ ແລະເຕີບໂຕມາໃນເສັ້ນທາງຂອງຄູ ເຊິ່ງເຫັນວ່າຊີວິດຂອງຄູ ແມ່ນມີຄວາມຫຍຸ້ງຍາກຫຼາຍສົມຄວນໃນການສ້າງເສດຖະກິດຄອບຄົວ ດັ່ງນັ້ນ, ມາໃນປີ 2001 ຈິ່ງໄດ້ຕັດສິນໃຈສ້າງຕັ້ງສະຫະ ກອນສິນເຊື່ອຂະໜາດນ້ອຍ ເພື່ອແກ້ໄຂຊີວິດການເປັນຢູ່ ແລະພັດທະນາເສດຖະກິດຄອບຄົວໝູ່ຄູ-ອາຈານດ້ວຍກັນ ໂດຍໄດ້ຮ່ວມທຶນກັບຄອບຄົວທ່ານ ສຳພັນໂຊກ ຣາຊພົນ ດ້ວຍເງິນເລີ່ມຕົ້ນພຽງ 100 ລ້ານກີບເທົ່ານັ້ນ ຊຶ່ງກໍ່ໄດ້ຮັບການຕອບຮັບຈາກລູກຄ້າດີພໍສົມຄວນ.

ຈາກນັ້ນ, ກໍ່ໄດ້ມີການຂະຫຍາຍການບໍລິການອອກໄປເລື້ອຍໆ ມາຮອດວັນທີ 31 ກໍລະກົດ 2007 ຈຶ່ງໄດ້ຮັບໃບອະນຸຍາດສ້າງຕັ້ງຊົ່ວຄາວ ແລະໄດ້ຖືວັນດັ່ງກ່າວເປັນວັນສ້າງຕັ້ງ ສກຈຮສສ ເຊິ່ງມີວິໄສທັດວ່າ: ຊື່ສັດ ຈິງໃຈ ຊ່ວຍແກ້ໄຂ ແລະຫຼຸດຜ່ອນຄວາມທຸກຍາກ ໂດຍປ່ອຍກູ້ຂະໜາດນ້ອຍ ເພື່ອໃຫ້ທຸກທ່ານເຂົ້າເຖິງແຫຼ່ງທຶນງ່າຍ, ບໍ່ມີຫຼັກຊັບຄ້ຳປະກັນ ແລະມີພຽງເງື່ອນໄຂດຽວ ຄືມີພະນັກງານລັດໜຶ່ງທ່ານມາຄ້ຳປະກັນ ກໍ່ສາມາດນຳເອົາເງິນອອກໄດ້ຢ່າງງ່າຍດາຍ.


ໃນຕະຫຼອດໄລຍະເວລາ 13 ປີຜ່ານມາ, ເຫັນວ່າສະຖາບັນການເງິນ ໄດ້ຂະຫຍາຍຕົວຢ່າງໄວວາທີ່ສຸດຫຼາຍຄົນໃນສັງຄົມ ກໍ່ຕັ້ງຄຳຖາມ ແລະບໍ່ເຂົ້າໃຈ ວ່າເປັນຫຍັງ ຈິ່ງເຕີບໂຕໄດ້ໄວວາແທ້? ຈາກເງິນ 6 ຕື້ກີບ ທີ່ປ່ອຍກູ້ໃນປີ 2007 ມາຮອດປີ 2020 ພວກເຮົາ ມີຍອດເຫຼືອເງິນກູ້ຫຼາຍກວ່າ 300 ຕື້ກີບ ແລະມີຊັບສົມບັດຫຼາຍກວ່າ 400 ຕື້ກີບ; ພາຍໃນເວລາ 13 ປີ ໄດ້ມີການປ່ຽນແປງຢ່າງຍິ່ງໃຫຍ່.

ເຊິ່ງທັງໝົດນີ້, ມັນແມ່ນຍ້ອນຫຼາຍຄົນໝັ້ນໃຈໃນການບໍລິຫານເງິນຂອງສະຖາບັນ  ທີ່ຈະບໍ່ເຮັດໃຫ້ເງິນສູນຫາຍ ແລະກໍ່ປ່ອຍກູ້ໄດ້ໄກ ນອກນີ້, ບັນດາທ່ານ ທີ່ຄ້າຂາຍ ແລະເຮັດທຸລະກິດພາຍໃນແຂວງ ໄດ້ຕັດສິນໃຈເອົາເງິນມາຝາກນຳສະຖາບັນຫຼາຍສຸດແມ່ນຮອດ 5 ຕື້ ຫາ10 ຕື້ກີບ; ເມື່ອເປັນແນວນັ້ນ, ການບໍລິຫານຂອງທາງສະຖາບັນຈຳເປັນຕ້ອງໄປຫາທຸກພາກສ່ວນໃນສັງຄົມ ພ້ອມຂະຫຍາຍສາຂາໃຫ້ບໍລິການໄປຍັງ ແຂວງຄຳມ່ວນ, ບໍລິຄຳໄຊ ແລະຊຽງຂວາງ.

ທ່ານ ສາຍສະໝອນ ກ່າວຕື່ມວ່າ: ຍ້ອນວ່າສະຖາບັນການເງິນພວກເຮົາ ແມ່ນເຕີບໃຫຍ່ຂະຫຍາຍຕົວມາໄດ້ ກໍ່ຍ້ອນສັງຄົມ ແລະເປົ້າໝາຍການສ້າງຕັ້ງ ກໍ່ແມ່ນຢາກຕອບແທນສັງຄົມ ດັ່ງນັ້ນ, ສກຈຮສສ ໄດ້ພະຍາຍາມນຳເອົາສິ່ງທີ່ເອີ້ນວ່າກຳໄລ ໄປຊ່ວຍເຫຼືອສັງຄົມ ໃນນີ້ ໄດ້ໄປຊ່ວຍທາງເມືອງນອງ ຍ້ອນເງື່ອນໄຂວ່າ: ໃນວັນທີ 13 ທັນວາ 2019 ຜ່ານມາ, ທ່ານເຈົ້າແຂວງສະຫວັນນະເຂດ ໄດ້ຈັດບັ້ນແຂ່ງຂັນຮັກຊາດ ແລະພັດທະນາ ເຊິ່ງໃນບັ້ນນີ້, ຕົນເອງ ກໍ່ເປັນອີກຜູ້ໜຶ່ງ ທີ່ໄດ້ເຂົ້າຮ່ວມໃນບັ້ນແຂ່ງຂັນ ຫຼັງຈາກນັ້ນ, ຈິ່ງໄດ້ຕັດສິນໃຈໄປຮ່ວມນຳທ່ານ ເກຍ ອູ໊ສິດທິເດດ ນັກພັດທະນາດີເດັ່ນແຫ່ງຊາດ ເພື່ອຮ່ວມກັນສ້າງຕັ້ງໂຄງການຮ່ວມໃຈສາຍໃຍໂລມາຄຳ ເປົ້າໝາຍແມ່ນເພື່ອຊ່ວຍແກ້ໄຂຄວາມທຸກຍາກຂອງປະຊາຊົນໃນ 2 ບ້ານຂອງເມືອງນອງຄື: ບ້ານຕາຢົງ ແລະບ້ານປະແນະ ໂດຍການອອກທຶນຜູ້ລະ 50% ເທົ່າກັນ.

ເບື້ອງຕົ້ນໄດ້ວາງເປົ້າໄວ້ໃນມູນຄ່າທັງໝົດ 1 ຕື້ກີບ ເຊິ່ງມາໃນວັນທີ 1/1/2020 ແຂວງ ໄດ້ອະນຸຍາດໃຫ້ລົງມືຈັດຕັ້ງປະຕິບັດ ແລະພາຍຫຼັງທີ່ລົງໄປເບິ່ງແລ້ວ ເຫັນວ່າຍັງມີຄວາມຫຍຸ້ງຍາກຫຼາຍດ້ານ ທີ່ຈະອຳນວຍຄວາມສະດວກໃຫ້ທັງ 2 ບ້ານດັ່ງກ່າວ ພັດທະນາຕົນເອງ ໃຫ້ຫຼຸດພົ້ນຈາກຄວາມທຸກຍາກໄດ້ ດັ່ງນັ້ນ, ທາງໂຄງການຈິ່ງໄດ້ຊ່ວຍໃນການກໍ່ສ້າງພື້ນຖານໂຄງລ່າງ ທີ່ຈຳເປັນໃຫ້ແກ່ 2 ບ້ານດັ່ງກ່າວເປັນຕົ້ນ: ກໍ່ສ້າງຝາຍນ້ຳລົ້ນ, ເຈາະນ້ຳບາດານ, ປັບປຸງໜອງສະໃຫຍ່ຂອງບ້ານ ແລະອື່ນໆ ທີ່ຈະເປັນເງື່ອນໃຫ້ແກ່ການແກ້ໄຂຊີວິດການເປັນຢູ່ຂອງປະຊາຊົນ ຮອດປະຈຸບັນ, ທາງໂຄງການ ໄດ້ຈ່າຍເງິນໄປແລ້ວຈຳນວນ 2 ຕື້ກວ່າກີບ ໃນນີ້ ທ່ານ ສາຍສະໝອນເອງກໍ່ໄດ້ປະກອບສ່ວນໄປເຄິ່ງໜຶ່ງຂອງມູນຄ່າ ໂດຍເປັນທຶນສ່ວນຕົວ ແລະທຶນຂອງ ສກຈຮສສ ອີກຈຳນວນໜຶ່ງ.


ຕໍ່ມາ, ກໍ່ມີແນວຄວາມຄິດຢາກພັດທະນາບ້ານເກີດເມືອງນອນຂອງຕົນເອງ ທີ່ເມືອງອາດສະພັງທອງ ບວກກັບທາງເມືອງ ກໍ່ໄດ້ສະເໜີມາວ່າແຜນບູລິມະສິດ ປີ 2020-2024 ແມ່ນຢາກປັບປຸງພື້ນຖານໂຄງລ່າງເສັ້ນທາງ ໂດຍຕົນເອງ ກໍ່ໄດ້ປຶກສາກັບທາງເມືອງ ວ່າຈະຊ່ວຍກໍ່ສ້າງເສັ້ນທາງເບຕົງ 2 ເສັ້ນໃນບ້ານດົງເຫັນ ທີ່ເປັນບ້ານເກີດເມືອງນອນ ເຊິ່ງຍາມຝົນແມ່ນມີຄວາມຫຍຸ້ງຍາກຫຼາຍ ໂດຍເສັ້ນທີ 1 ເລີ່ມຈາກທາງເລກທີ 9 ຫາຫ້ອງການບ້ານດົງເຫັນ, ມູນຄ່າ 170 ລ້ານກວ່າກີບ ແລະເສັ້ນທີ 2 ແຕ່ແຍກເຕົາດິນຈີ່ ຫາຕະຫຼາດ ມີມູນຄ່າ 297 ລ້ານກວ່າກີບ ເນື່ອງຈາກມັນຍັງບໍ່ຮອດເສັ້ນທາງເລກ 9 ດັ່ງນັ້ນ, ທ່ານ ເກຍ ອູ໊ສິດທິເດດ ຈິ່ງປະກອບສ່ວນສ້າງຕື່ມອີກໃນມູນຄ່າ 47,66 ລ້ານກີບ ທີ່ໄດ້ມີການເປີດນຳໃຊ້ຢ່າງເປັນທາງການໃນວັນທີ 29 ສິງຫາຜ່ານມານີ້.