ຕົວເລກໜ້າເປັນຫ່ວງແຮງງານລາວຕົກວຽກເກືອບ 60.000 ຄົນ ຍ້ອນໂຄວິດ

ຕົວເລກໜ້າເປັນຫ່ວງແຮງງານລາວຕົກວຽກເກືອບ 60.000 ຄົນ ຍ້ອນໂຄວິດ

16th September 2020 0 By Education

ຫຼາຍໆຄົນທີ່ມີວຽກເຮັດງານທຳ ໄດ້ເງິນເດືອນທຸກເດືອນຈະໜ້ອຍຫຼືຫຼາຍບໍ່ສຳຄັນ ເທົ່າໄດ້ປະຈຳ ຈົ່ງກອດຈຸດນັ້ນໄວ້ໃຫ້ດີ ເພາະອີກຫຼາຍຄົນຢາກມີໂອກາດນັ້ນກໍ່ຍາກຈະໄຂວ່ຄວ້າໃນສະຖານະການແບບນີ້ ແລະທີ່ສຳຄັນເມື່ອມີຄົນວ່າງງານຫຼາຍເທົ່າໃດກໍ່ໝາຍເຖິງ ຜູ້ຈ້າງງານມີໂອກາດເລືອກຄົນທີ່ມີຄຸນນະພາບຫຼາຍເທົ່ານັ້ນ ຈິ່ງບໍ່ຄວນສຳຄັນໂຕເອງເກີນໄປຢ່າລືມວ່າເໝືອຟ້າຍັງມີຟ້າ.


ອີງຕາມສະຖິຕິການຂື້ນບັນຊີແຮງງານໃນ ສປປ ລາວຂອງ ກົມພັດທະນາສີມືແຮງງານ ແລະຈັດຫາງານ ກ່ຽວກັບຜູ້ວ່າງງານທັງໝົດ ທັງຢູ່ພາຍໃນ ແລະກັບຈາກຕ່າງປະເທດມາຮອດວັນທີ 16 ກັນຍາ 2020 ມີທັງໝົດ 58.796 ຄົນ ຍິງ 29.744 ຄົນ.

ໃນຈຳນວນຜູ້ວ່າງງານທັງໝົດເກືອບ 60.000 ຄົນນັ້ນສ່ວນໃຫຍ່ແມ່ນແຮງງານທີ່ກັບມາຈາກຕ່າງປະເທດມີ 46.525 ຄົນ, ຍິງ 24.000 ກວ່າຄົນ ແລະ ຜູ້ວ່າງງານພາຍໃນມີ 12.340 ຄົນ, ຍິງ 5.735 ຄົນ.


ຕົວເລກຜູ້ວ່າງງານທັງໝົດນັ້ນໄດ້ເກັບກຳຈາກ 17 ແຂວງທີ່ປະກອບມີ ນະຄອນຫຼວງວຽງຈັນ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ຫົວພັນ, ໄຊຍະບູລີ, ຊຽງຂວາງ, ແຂວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ, ອັດຕະປື ແລະ ແຂວງໄຊສົມບູນ ຍັງບໍ່ມີແຕ່ແຂວງຜົ້ງສາລີ.