ຈະເປັນແນວໃດຕໍ່ໄປຄືເຊື້ອພະຍາດມາດຸມາດັນແທ້

ຈະເປັນແນວໃດຕໍ່ໄປຄືເຊື້ອພະຍາດມາດຸມາດັນແທ້

23rd September 2020 0 By Education

ການລະບາດຂອງອະຫິວາໝູອາຟຣິກາໃນເມືອງຊຽງຮ່ອນຂອງແຂວງໄຊຍະບູລີແມ່ນຍັງບໍ່ສາມາດຄວບຄຸມໄດ້ ມີໝູນຕາຍແລ້ວເກືອບ 200 ໂຕ ແລະເຈົ້າໜ້າທີ່ໄດ້ນຳໄປທຳລາຍຖີ້ມ 200 ກວ່າໂຕ ຫຼັງຊຽງຮ່ອນປະກາດຕົນເປັນເຂດລະບາດຂອງອະຫິວາໝູອາຟຣິກາ ພ້ອມສັ່ງຫ້າມເຄື່ອນຍ້າຍ ໝູ ແລະຜະລິດຕະພັນໝູທຸກຊະນິດ.

ໂດຍໃນລະຫວ່າງວັນທີ 21-23 ກັນຍາ 2020 ນີ້ ພະແນກກະສິກຳ ແລະ ປ່າໄມ້ ແຂວງໄຊຍະບູລີ ໄດ້ລົງສົມທົບກັບຫ້ອງການ ກະສິກຳ ແລະ ປ່າໄມ້ເມືອງຊຽງຮ່ອນ ລົງເກັບກຳຈຳນວນຜູ້ລ້ຽງໝູ ແລະ ທຳລາຍໝູ ທີ່ຕິດເຊື້ອພະຍາດ ອະຫິວາໝູອາຟຣິກກາ ຢູ່ 2 ບ້ານຄື: ບ້ານ ແກ່ນ ແລະ ບ້ານສາມັກຄີໄຊ ເມືອງຊຽງຮ່ອນ ແຂວງໄຊຍະບູລີ ພາຍຫຼັງທີ່ໄດ້ຮັບຜົນກວດເລືອດ ແລະ ຊີ້ນສ່ວນຂອງໝູຢູ່ 2 ບ້ານດັ່ງກ່າວ ຈາກສູນວິໄຈພະຍາດສັດ ກະຊວງກະສິກຳ ແລະ ປ່າໄມ້ພົບວ່າຊີ້ນສ່ວນດັ່ງກ່າວກວດກາພົບເຫັນເຊື້ອໄວຣັດພະຍາດອະຫິວາໝູອາຟຣິກກາ ໃນຄັ້ງວັນທີ 16 ກັນຍາ 2020 ຜ່ານມາ.

ປະຈຸບັນວິຊາການໄດ້ລົງເກັບກຳຂໍ້ມູນ ການລະບາດຂອງພະຍາດ ພະຍາດດັ່ງກ່າວໄດ້ແຜ່ລາມໄວທີ່ສຸດ ແລະ ແຜ່ລາມແລ້ວ 13 ບ້ານພາຍໃນເມືອງຊຽງຮ່ອນຄື: ບ້ານ ແກ່ນ, ບ້ານສາມັກຄີໄຊ, ບ້ານ ດອນເຟືອງ, ບ້ານ ຂິ່ງ, ບ້ານ ລາວສະໂນ, ບ້ານ ນໍ້າກອກ, ບ້ານ ນາອອນ, ບ້ານ ຫົວນາ, ບ້ານ ດົງ, ບ້ານ ຫ້ວຍຮາກ, ບ້ານ ຊ້າງ, ບ້ານ ຄໍ້າ ແລະ ບ້ານ ນ້ຳຄ່ອມ ມີໝູຕາຍທັງໝົດ 195 ໂຕ.

ແນວໃດກໍ່ດີ ເພື່ອຄວາມປອດໄພ ທາງວິຊາການສັດຕະແພດ ແລະ ການນຳຂັ້ນເມືອງ ໄດ້ລົງລະດົມແນວຄິດ ຜູ້ທີ່ລ້ຽງໝູ ໃຫ້ການຮ່ວມມືກັບວິຊາການ ແລະ ອອກນິຕິກຳຕ່າງໆ ເພື່ອເປັນການສະກັດກັ້ນການແຜ່ລາມອອກເປັນວົງກວ້າງ ພ້ອມທັງທຳລາຍໝູທີ່ຕິດເຊື້ອຢູ່ບ້ານແກ່ນ ຈຳນວນ 216 ໂຕ ນ້ຳໜັກ 5.393 ກິໂລກຼາມ ແລະ ບ້ານ ສາມັກຄີໄຊ ຈໍານວນ 31 ໂຕ ນໍ້າໜັກ 804 ກິໂລກຼາມ ລວມມູນຄ່າໝູທີ່ທຳລາຍທັງໝົດ 200 ລ້ານກວ່າກີບ.

ໄລຍະຜ່ານມາເຫັນວ່າອຳນາດການປົກຄອງບ້ານ ແລະ ຂະແໜງການທີ່ກ່ຽວຂ້ອງ ຂັ້ນເມືອງ ເປັນຕົ້ນແມ່ນ ຫ້ອງການກະສິກຳ ແລະ ປ່າໄມ້ໄດ້ເອົາໃຈໃສ ເຝົ້າລະວັງ ແລະ ສະກັດກັ້ນການລະບາດຂອງພະຍາດສັດ ເນື່ອງຈາກສະພາບດິນຟ້າອາກາດ ມີການປ່ຽນແປງກະທັນຫັນ ສັດລ້ຽງມີການຂາດແຄນອາຫານ ເຈົ້າຂອງສັດຈຳນວນໜຶ່ງ ຍັງຖືເບົາຕໍ່ການຮັກສາສຸຂະພາບສັດ ຂອງຕົນເອງ, ຜູ້ປະກອບການບາງພາກສ່ວນ ບໍ່ໄດ້ເອົາໃຈໃສ່ ຕໍ່ການປະຕິບັດຕາມການຄຸ້ມຄອງ ການເຄື່ອນຍ້າຍສັດ ແລະ ຜະລິດຕະພັນສັດທີ່ວາງອອກ ຍັງມີການການ ຊື້ສັດມາຈາກບ່ອນທີ່ມີການລະບາດຂອງພະຍາດຈຶ່ງເປັນສາເຫດໃຫ້ມີ ການລະບາດ ຂອງພະຍາດເກືດຂື້ນ.