ເມືອງລະຄອນເພັງ ເລີ່ມຂຶ້ນທະບຽນພຣະພຸດທະຮູບ ທີ່ວັດພຣະບາດນາດູ່ ສາ​ທຸໆ

ເມືອງລະຄອນເພັງ ເລີ່ມຂຶ້ນທະບຽນພຣະພຸດທະຮູບ ທີ່ວັດພຣະບາດນາດູ່ ສາ​ທຸໆ

24th September 2020 0 By Entertain

ໃນວັນທີ 22 ກັນຍາ 2020 ນີ້, ທ່ານ ມະໄລວອນ ສີປະເສີດ ຮັກສາການຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງສາລະວັນ ໄດ້ລົງຕິດຕາມການຂື້ນທະບຽນພຣະພຸດທະຮູບຢູ່ທີ່ວັດພຣະບາດນາດູ່, ໃຫ້ກຽດເຂົ້າຮ່ວມໂດຍມີ ທ່ານຮອງເຈົ້າເມືອງ ຜູ້ຊີ້ນຳວຽກງານວັດທະນະທຳ-ສັງຄົມ, ເຈົ້າອະທິການວັດ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງ ຕະຫຼອດຮອດນາຍບ້ານ, ອົງການຈັດຕັ້ງຂັ້ນບ້ານ, ປກຊ-ປກສ ແລະພໍ່ແມ່ປະຊາຊົນເຂົ້າຮ່ວມ


ທ່ານ ແກ້ວປະສິດ ຊິນນະຈັກ ຮັກສາການຫົວໜ້າຂະແໜງວິຈິດສິນ ແລະມໍລະດົກ ກໍ່ໄດ້ລາຍງານກ່ຽວກັບແຜນເຄື່ອນໄຫວລົງເກັບກຳຂໍ້ມູນຂື້ນບັນຊີພຣະພຸດທະຮູບ ແລະວັດຖຸທີ່ມີຄ່າວັດພຣະບາດນາດູ່ ເມືອງລະຄອນເພັງ, ຊື່ງການລົງເຄື່ອນໄຫວຄັ້ງນີ້ ແມ່ນໄດ້ປະຕິບັດຕາມກົດໝາຍວ່າດ້ວຍມໍລະດົກແຫ່ງຊາດ ສະບັບປັບປຸງ ເລກທີ 44/ສພຊ ລົງວັນທີ 24 ທັນວາ 2013 ແລະ ອີງຕາມຂໍ້ຕົກລົງຂອງກະຊວງ ຖວທ ວ່າດ້ວຍການຈັດຕັ້ງ ແລະການເຄື່ອນໄຫວຂອງພະແນກ ຖວທ ແຂວງສາລະວັນ ເລກທີ 1491/ຖວທ.

ເພື່ອເປັນການປົກປັກຮັກສາມໍລະດົກຂອງຊາດກໍ່ຄືຂອງທ້ອງຖິ່ນໄວ້ ບໍ່ໃຫ້ຕົກເຮ່ຍເສຍຫາຍໄປ, ໄວ້ໃຫ້ເຊັນລູກ-ຫຼານ ແລະລຸ້ນຕໍ່ໆໄປໄດ້ເຄົາລົບ, ສັກກະລະບູຊາເປັນທີ່ເພີ່ງທາງດ້ານຈິດໃຈ ແລະໄວ້ເປັນສີ່ງສັກສິດຄູ່ບ້ານຄູ່ເມືອງຕະຫຼອດໄປ.

ການຂຶ້ນທະບຽນ ແມ່ນຈະໄດ້ເຮັດຢ່າງລະອຽດ, ພ້ອມທັງມີການບັນທຶກພາບພຣະພຸດທະຮູບແຕ່ລະອົງ ເພື່ອຕິດໃສ່ແບບຟອມ ແລະເກັບກຳຂໍ້ມູນປະຫວັດ, ປະເມີນອາຍຸ, ວັດແທກຂະໜາດ, ສັ່ງນຳໜັກຂອງພຣະພຸດທະຮູບແຕ່ລະອົງ, ພາຍຫຼັງທີ່ສຳເລັດກໍ່ຈະໄດ້ມີການສຳເນົານຳແຕ່ລະພາກສ່ວນທີ່ກ່ຽວຂ້ອງ, ການລົງເກັບກຳຂື້ນທະບຽນບັນຊີພຣະພຸດທະຮູບຢູ່ທີ່ວັດພຮະບາດນາດູຄັ້ງນີ້ ແມ່ນຈະໃຊ້ເວລາ 2 ອາທິດ ຈື່ງຈະສຳເລັດ ແລະ ເປັນແຫ່ງທີ 2 ຂອງແຂວງ, ພາຍຫຼັງໄດ້ສຳເລັດການຂຶ້ນທະບຽນພຣະພຸດທະຮູບແລ້ວຢູ່ ວັດສີມຸງຄຸນ(ວັດກາງ) ເມືອງ ແລະ ແຂວງສາລະວັນ.


ທ່ານ ບຸນປອນ ອິນທະສອນ ຮອງຫົວໜ້າພະແນກ ຖວທ ແຂວງ ໄດ້ໃຫ້ສຳພາດວ່າ: ຈຸດປະສົງຫຼັກທີ່ສຳຄັນອີກອັນໜຶ່ງໃນການຂື້ນທະບຽບບັນຊີພຣະພຸດທະຮູບແຫ່ງນີ້ ເພື່ອກຽມຮັບຮອງເອົາວັດພຣະບາດນາດູ່ ເປັນມໍລະດົກຂັ້ນທ້ອງຖີ່ນກໍ່ຄືຂອງແຂວງ ແລະ ເພື່ອເປັນຮັບປະກັນໃນເມື່ອວັດຖຸທີ່ມີການຕົກເຮ່ຍເສຍຫາຍ ຈະສາມາດນຳ ແລະທວງຄືນໄດ້ເພາະວ່າໄດ້ຂຶ້ນບັນຊີແລ້ວ. ນອກນັ້ນພາຍໃນວັດດັ່ງກ່າວ ກໍ່ຈະໄດ້ຈັດແບ່ງເປັນເຂດພັດທະນາ, ຂອບເຂດອະນຸລັກຮັກ ແລະ ເຂດຫວງຫ້າມ ເພື່ອສະດວກໃນການຄຸ້ມຄອງຈັດສັນ ແລະພັດທະນາດ້ານຕ່າງໆ.


ພາບ-ຂ່າວ: ສິດຕາ ເພັດວົງສາ