ສາວໄທ ສຸດຊວຍນັກເລງໄລ່ຍິງກັນຖືກລູກຫຼົງດັບຄາທີ່

ສາວໄທ ສຸດຊວຍນັກເລງໄລ່ຍິງກັນຖືກລູກຫຼົງດັບຄາທີ່

27th September 2020 0 By Education

ໄວລຸ້ນກວ່າ 40 ຄົນໄລ່ຍິງກັນກາງຖະໜົນ ໃນຂະນະທີ່ສາວ ມ4 ຊື່ນາງປອຍ ກຳລັງກັບຈາກງານປະກວດ ໂດຍຊ້ອນທ້າຍຄູ່ອາຄາດຂອງກຸ່ມທີ່ໄລ່ຍິງ ເຮັດໃຫ້ສາວປອຍຜູ້ຊ້ອນທ້າຍຖືກລູກຫຼົງດັບຄາທີ່, ໝູ່(ຜູ້ຂັບ)ໄດ້ຮັບບາດເຈັບສາຫັດ, ໜ້າສົງສານພໍ່ຂອງສາວປອຍຫາກໍ່ກັບຈາກຕ່າງປະເທດຍັງກັກໂຕຢູ່ບໍ່ຮູ້ເລື່ອງ.

ເຫດການດັ່ງກ່າວເກີດຂື້ນໃນເວລາ 1:10 ໂມງ ຂອງວັນທີ 26 ກັນຍາ 2020 ທີ່ຈັງຫວັດບູລີຣັມຂອງໄທ ຈາກການລົງກວດສອບຂອງເຈົ້າໜ້າທີ່ ພົບໄວລຸ້ນ 5-6 ຄົນກຳລັງພາກັນຊ່ວຍສາວຜູ້ເຄາະຮ້າຍ ທີ່ຖືກລູກ 9 ມມ ຍິງດ້ານຫຼັງຕັດຂົ້ວຫົວໃຈ ດັບຄາທີ່ໃນຈຸດເກີດເຫດ, ສ່ວນຊາຍໄວ 19 ປີທີ່ເປັນຄົນຂັບລົດຄັນເຄາະຮ້າຍຖືກກະສູນລູກດຽວກັນທະລຸຈາກສາວ 16 ໄປສອດໃສ່ແຜ່ນຫຼັງ ຖືກສົ່ງເຂົ້າໂຮງໝໍກ່ອນເຈົ້າໜ້າທີ່ໄປເຖິງ.


ນາງ ສາຍຝົນໄວ 38 ແມ່ຂອງສາວນ້ອຍຜູ້ເຄາະຮ້າຍເລົ່າວ່າ ລູກສາວຕົນເປັນຕົວແທນຂອງຕຳບົນໄປປະກວດນາງງາມຜ້າໄໝ ໃນຄືນວັນທີ 26 ກັນຍານັ້ນ ບໍ່ຄິດວ່າຈະຖືກລູກຫຼົງຂອງນັກເລງຈົນເຖິງແກ່ຊີວິດ ເລື່ອງນີ້ຢາກໃຫກົດໝາຍລົງໂທດໃຫ້ເຖິງທີ່ສຸດ.

ນອກຈາກລູກສາວທີ່ຕ້ອງຈາກໄປຢ່າງກະທັນຫັນຍ້ອນພວກຂີ້ເຫຍື້ອສັງຄົມແລ້ວ ພໍ່ຂອງສາວ 16 ຫາກໍ່ກັບຈາກເກົາຫຼີໄດ້ 2 ວັນກຳລັງຢູ່ໃນໄລຍະກັກຕົວ 14 ວັນບໍ່ຮູ້ວ່າຢູ່ສູນໃດຕິດຕໍ່ບໍ່ໄດ້ ເພິ່ນເປັນໂລກຫົວໃຈແດ່ ຈິ່ງເປັນຫ່ວງຫຼາຍຢາກໃຫ້ເຈົ້າໜ້າທີ່ຊ່ວຍປອບໃຈ ແລະແຈ້ງໃຫ້ຊາບວ່າລູກເສຍຊີວິດແລ້ວ.

ເຈົ້າໜ້າທີ່ໄດ້ສອບສວນເບື້ອງຕົ້ນຊາຍໜຸ່ມໄວ 19 ທີ່ຂັບລົດມາສົ່ງນາງສາວປອຍເຫຍື່ອຖືກຍິງໃນຄັ້ງນີ້ຊາບເລື່ອງວ່າ: ກ່ອນໜ້ານີ້ຕົນມີເລື່ອງບໍ່ລອງລອຍກັບເດັກຕ່າງບ້ານ ໃນຄືນເກີດເຫດຕົນກັບພວກປະມານ 6 ຄົນໄດ້ຂັບລົດກັບຈາກງານ ລະຫວ່າງນັ້ນເຫັນຄູ່ອາຄາດຂັບລົດຈັກປະມານ 40  ຄົນສວນມາ ຕົນເຫັນທ່າບໍ່ດີຈີ່ງຊິ່ລົດໜີ ແຕ່ຖືກກຸ່ມນັ້ນໄລ່ຕິດຕາມມາ ແລະມີສຽງປືນດັງເປັນໄລຍະ ຕໍ່ມາໄດ້ຍິງສຽງນ້ອງປອຍບອກວ່າບໍ່ຮູ້ແມ່ນຫຍັງຖືກກາງຫຼັງ ຕົນຮູ້ທັນທີວ່ານ້ອງຖືກຍິງແລ້ວຈິ່ງຂີ່ແວ່ເຮືອນພີ່ນ້ອງທີ່ຮູ້ຈັກເພື່ອເອີ້ນເຈົ້າໜ້າທີ່ມາຊ່ວຍ ແຕ່ນ້ອງບອກຫາຍໃຈບໍອອກກ່ອນສິ້ນໃຈໄປ.