ວ້າວ! ບໍລິສັດດອກງີ້ວຄຳມອບງົວ 100 ກວ່າໂຕໃຫ້ ທະຫານແຂວງບໍ່ແກ້ວ

ວ້າວ! ບໍລິສັດດອກງີ້ວຄຳມອບງົວ 100 ກວ່າໂຕໃຫ້ ທະຫານແຂວງບໍ່ແກ້ວ

1st October 2020 0 By Education

ບໍລິສັດດອກງີ້ວຄຳປະກອບສ່ວນຊ່ວຍເຫຼືອສັງຄົມຢ່າງຕໍ່ເນື່ອງ ເຖິງວ່າບໍລິສັດເພິ່ນເອງຈະໄດ້ຮັບຜົນກະທົບຈາກໂຄວິດ-19 ບໍ່ຕ່າງຈາກທຸລະກິດອື່ນໆກໍ່ຕາມ, ແຕ່ເພື່ອຄວາມເຂັ້ມແຂງທາງເສດຖະກິດຂອງປະຊາຊົນກ່ອນໜ້ານີ້ກຸ່ມບໍລິສັດດອກງີ້ວຄຳໄດ້ນຳງົວຈຳນວນ 200 ກວ່າໂຕໄປມອບໃຫ້ແຂວງອຸດົມໄຊໃຫ້ນຳໄປແບ່ງປັນໃຫ້ປະຊາຊົນລ້ຽງ ແລະຫຼ້າສຸດໄດ້ມອບງົວອີກ 100 ກວ່າໂຕໃຫ້ກອງບັນຊາການທະຫານແຂວງບໍ່ແກ້ວເພື່ອເອົາໄປລ້ຽງອີກ ຫຼັງຈາກນັ້ນ ບໍລິສັດຈະຮັບຊື້ຄືນ.

ສ່ວນທີ່ມອບໃຫ້ແຂວງອຸດົມໄຊກ່ອນໜ້ານີ້

ພິທີມອບ-ຮັບງົວພໍ່ແມ່ພັນມີຂຶ້ນໃນວັນທີ 30 ກັນຍາ 2020 ທີ່ຟາມງົວ ບໍລິສັດ ດອກງິ້ວຄໍາ ເມືອງຕົ້ນເຜິ້ງ ແຂວງບໍ່ແກ້ວ  ລະຫວ່າງ ບໍລິສັດດອກງິ້ວຄຳ ແລະ ທ່ານ ພັນໂທ ສອນໄຊ ວົງພະຈັນ ຫົວໜ້າຫ້ອງພະລາທິການ ທະຫານແຂວງບໍ່ແກ້ວ.

ພິທີ ທັງສອງຝ່າຍກໍ່ໄດ້ເຊັນບົດບັນທຶກສັນຍາ ມອບ-ຮັບຢ່າງເປັນທາງການ ງົວທີ່ນຳມາມອບປະກອບມີ ແມ່ພັນງົວຈໍານວນ 100 ໂຕ (ມີອາຍຸ 3-5 ປີ) ແລະ ພໍ່ພັນງົວ ຈໍານວນ 10 ໂຕ (ມີອາຍຸ 2-5 ປີ) ລວມງົວທັງໝົດຈຳນວນ 110 ໂຕ.

ພ້ອມທັງອຸປະກອນບົດຫຍ້າ 1 ເຄື່ອງ, ຊ່ວຍຝຶກອົບຮົມຄວາມຮູ້, ດ້ານເຕັກນິກ, ວິທີການລ້ຽງ, ວິທີການໃຫ້ວັກຊີນກັນພະຍາດຕ່າງໆ ໃຫ້ແກ່ວິຊາການຂອງກອງບັນຊາການ ນີ້ເພື່ອເປັນການຊຸກຍູ້ ແລະ ສົ່ງເສີມເສດຖະກິດ ໃຫ້ກົມກອງມີລາຍຮັບທີ່ເຂັ້ມແຂງ, ຮັບປະກັນຊີວິດການເປັນຢູ່ ແລະ ສ້າງເສດຖະກິດໃຫ້ແກ່ພະນັກງານ-ນັກຮົບໃຫ້ດີຂຶ້ນຫຼັງຈາກນໍາໄປລ້ຽງແລ້ວ ເມື່ອສັດລ້ຽງເຕີບໃຫຍ່ທາງບໍລິສັດຈະເປັນຜູ້ຮັບເກັບຊື້ຄືນ ດ້ວຍລາຄາທີ່ຍຸຕິທຳ.


ສະຫາຍ ພັນໂທ ສອນໄຊ ວົງພະຈັນ ໄດ້ສະແດງຄວາມຂອບໃຈເປັນຢ່າງສູງມາຍັງບໍລິສັດ ດອກງິ້ວຄໍາ ທີ່ເຫັນຄວາມສຳຄັນໃນ ການພັດທະນາກົມກອງ ໂດຍການຜະລິດກະສິກຳເປັນສິນຄ້າ ເຊິ່ງສອດຄ່ອງກັບແນວທາງນະໂຍບາຍຂອງພັກ ເປັນຕົ້ນແມ່ນ 4 ປູກ 4 ລ້ຽງ ຂອງກອງທັບວາງອອກ ແລະ ໃຫ້ຄຳໝັ້ນສັນຍາວ່າຈະນຳເອົາງົວດັ່ງກ່າວໄປຂະຫຍາຍພັນໃຫ້ເກີດດອກອອກຜົນຍິ່ງໆຂື້ນ.

ໂດຍ: ສົມໄຊ ສີລາຈັນ