ອອກພັນສາແລ້ວ ຈະບູຊາພະນາກນາກແບບໃດຈິ່ງໄດ້ບຸນ?

ອອກພັນສາແລ້ວ ຈະບູຊາພະນາກນາກແບບໃດຈິ່ງໄດ້ບຸນ?

1st October 2020 0 By Education

ເປັນປະເພນີມາແດ່ດຶກດຳບັນແລ້ວ ເມື່ອຮອດບຸນອອກພັນສາປະ​ວໍລະນາແຕ່ລະປີ, ຄົນລາວເຮົາ ຕ່າງກໍ່ພາກັນໄຫລເຮືອໄຟ ບູຊາແມ່ນໍ້າ ​ໂດຍເຊື່ອວ່າມີສິ່ງສັກສິດຢູ່​​​ໃຕ້ນໍ້າ ນັ້ນກໍ່ຄື ພະຍານາກ, ​ແຕ່​ໃນ​ທາງ​​ວິທະຍາ​ສາດ​ ​ໃຫ້​ຄວາມ​ໝາຍຂອງ​ຄຳວ່າ ​ນາກ​ທີ່​ແທ້​ຈິງ​ຄືຜູ້​ທີ່​ນັບຖື​ສາສະໜາ, ​ເປັນຜູ້​ທີ່​ຖື​ສິນ​ຖື​ທຳ.


ພະ ຫລັກ​ຄຳ ​ໂພທິ​ປັນຍານັນ​ທິ ຫລື ປອ ດາວ​ສະ​ເດັດ ​ເລີດ​ມະນີ ກຳມະການ​ສູນ​ກາງ ອພສ, ຮອງ​ຫົວໜ້າ​ກຳມາ​ທິການ​ຕ່າງປະ​ເທດ ອພສ, ​ເຈົ້າ​ອະທິການ​ວັດ​ໃໝ່​ໂຊກ​ຄຳ ​ອະທິບາຍ​ວ່າ: ນາກ ຕິດພັບກັບພຸດທະສາສະໜາໂດຍກ່າວກັນວ່າ:ຄັ້ງເມື່ອຄາວພະພຸດທະເຈົ້າຈະຕັດສະຮູ້ນັ້ນ ໄດ້ມີພະຍານາກມຸດຈະ ຣິນ ລອຍຂຶ້ນມາຂົດໂຕໃຫ້ພະພຸດທະເຈົ້ານັ່ງ ແລະ ບັງບໍ່ໃຫ້ຝົນຖືກພະພຸດທະເຈົ້າ.

ສ່ວນວ່ານາກ ຕິດພັນກັບຊົນຊາດລາວໂດຍປາກົດມີນາກ 15 ຕະກຸນສ້າງເມືອງວຽງຈັນ ຈຶ່ງເຮັດໃຫ້ຄົນລາວນັບຖືທີ່ສຸດວ່ານາກ​ເຫລົ່ານີ້ເປັນຜູ້ອຸປະຖຳບຳລຸງ ​ແລະ ສົ່ງ​ເສີມພະພຸດທະ​ສາສະໜາ ​ແລະ ຄົນ​ລາວ​ເຮົາ​ເກືອບ 90% ​ເຊື່ອ​ວ່າ​ພະຍາ​ນາກ ມີ​ຈິງທີ່​ປາກົດ​ກາຍ​ຂຶ້ນ​ມາ​ຕິດ​ພັນ​ກັບ​ພຸດທະ​ສາສະໜາ. ​ເຮົາ​ຈະ​ສັງເກດ​ເຫັນ​​ວ່າ​ຢູ່​ວັດວາອາ ຣາມ​ໂດຍ​ສະ​ເພາະ​ຢູ່​ໃນ​ສິມ, ຫໍ​ແຈກ, ຂັ້ນ​ໄດ ​ແລະ ບໍລິ​ເວນ​ອື່ນໆ​​ໃນ​ວັດ ມີ​ທັງຮູບ​​ແຕ້ມ ​ແລະ ຮູບ​ປັ້ນ​ໂຕ​ນາກ

​ໂດຍ​ເຊື່ອ​ວ່າ​ຮູບ​ນາກ​ຄື​ຜູ້​ຮັບ​ໃຊ້​ພະພຸດທະ​ສາສະໜາ ​ເພາະວ່າ​ໃນ​ສະ​ໄໝ​ພຸດທະການ​ນັ້ນ,ພະຍາ​ນາກ​ໄດ້​ປອມ​ໂຕ​​ເປັນ​ຄົນເຂົ້າ​ມາຂໍບ​ວດ ​ແລະ ​ເມື່ອ​ໄດ້​ບວດ​ແລ້ວມີ​ມື້ໜຶ່ງຮ່າງກາຍ​ກໍ່​ກັບ​ມາ​ເປັນ​ນາກ​ຄື​ເກົ່າ.​ເມື່ອ​ເປັນ​ແນວ​ນັ້ນ, ພະພຸດທະ​ເຈົ້າ ​ຈຶ່ງ​ໄດ້​ຮ້ອງ​ມາ​ຖາມ​ວ່າ:​ເຈົ້າ​ເປັນ​ສັດ​ເດຍລະສານ​ບໍ່? ພະຍາ​ນາກ​ກໍ່ຕອບ​ວ່າ ​ແມ່ນ​ແລ້ວ​ຂະນ້ອຍ​ເປັນ​ສັດ​ເດຍລະສານ.ພະພຸດທະເຈົ້າຕັດວ່າ: ຖ້າ​ເປັນ​ສັດ​ເດຍລະສານ ​ເຈົ້າ​ບໍ່​ສາມາດ​ຈະ​ບວດ​ໃນ​ທາງ​ພຸດທະ​ສາສະໜາ​ໄດ້, ແຕ່​ເຈົ້າ​ສາມາດຮັກສາ​ສິນ 5 ຫລື ຮັບ​ໃຊ້​ພຸດທະ​ສາສະໜາ​ນີ້​ໄດ້.


​ຄຳ​ວ່າ ​ນາກ​ທີ່​ແທ້​ຈິງ​ຄືຜູ້​ທີ່​ນັບຖື​ສາສະໜາ, ຜູ້​ທີ່​ຖື​ສິນ​ຖື​ທຳ ​ແລະ ​ເມື່ອ​ອອກ​ພັນ​ສາ​ແລ້ວຢູ່ສະຖານ​ທີ່​ຕ່າງ​ໆ​ໂດຍ​ສະ​ເພາະ​ຕາມ​ລຳ​ແມ່​ນ້ຳຂອງ, ບາງ​ບ່ອນ​ຈະ​ເຫັນ​ແສງ​ໄຟ​ຂຶ້ນ​ ຫລືຕາມ​ໜອງຕາມ​ບຶງທີ່​ຫລາຍ ​ຄົນ​ເຊື່ອ​ກັນ​ວ່າ ບັ້ງ​ໄຟ​ພະຍາ​ນາກ, ​ແຕ່​​ຫລັກ​​ວິທະຍາສາດ​ແລ້ວ​​ບໍ່​ທັນ​ພິສູດ​ໄດ້ 100% ວ່າ​ແມ່ນ​ບັ້ງ​ໄຟ​ພະ ຍາ​ນາກ ​​ໝາຍຄວາມການ​ທີ່​ເຫັນແສງ​ໄຟ​ຂຶ້ນ​ກາງ​ນ້ຳຂອງ ຫລື ຕາມ​ໜອງ​ຕາມ​ບຶງນັ້ນ​ອາດຈະ​ເປັນ​ແກ໊ສທຳ​ມະ​ຊາດ.

ແນວ​ໃດ​ກໍ່​ດີ ປາກົດການນີ້ມັກ​​ເກີດ​ຂຶ້ນ​​ໃນ​​ເດືອນ 11 ​ເພັງ ​ຊຶ່ງ​ເປັນ​ມື້​ອອກ​ພັນ​ສາ​ ດັ່ງ​ທີ່​ເຮົາ​ຮູ້ ຈັນ​ທະລະ​ຄະຕິມື້​ດວງ​ຈັນ​ເຕັມ​ດວງ ຕາມ​ຫລັກ​ວິທະຍາສາດ​ມັນ​ຈະ​​ດູດ ແລະ ໂລກ​ກັບ​ດວງ​ຈັນ​ຈະ​ມີ​ຄວາມ ​ສຳພັນ​ກັນດັ່ງ​ນັ້ນ ​ຖ້າວ່າ​ມີ​ສິ່ງ​ລຶກລັບ ຫລື ສິ່ງ​ທີ່​ມີ​ຊີວິດ​ບາງ​ອັນຈະ​ເກີດ​ປະຕິ​ກີ​ລິ​ຍາ​ທາງ​ທຳ​ມະ​ຊາດຈະ​ເປັນ​ແສງ​ໄຟ​ອອກ​ມາ​ເພາະວ່າສັດ​ທາງ​ພຸດທະ​ສາສະໜາ​ນີ້​ມີ 4 ຢ່າງ​ຄື ສັດ​ທີ່​ເປັນ​ຄົນ, ສັດ​ສີ່​ຂາ, ສັດ​ທີ່​ບໍ່​ມີ​ຂາ ​ແລະ ສັດ​ທີ່​ເກີດ​ຂຶ້ນ​ມາ​ໃນ​ເວລາ​ໃດ​​ໜຶ່ງ​​ເອີ້ນວ່າ:​ ເທວະ​ດາ

​ຊຶ່ງພະພຸດທະ​ເຈົ້າ​ຍັງ​ເທດ​ວ່າ:​ ເທວະ​ດາ ອາດ​ຈະ​ເປັນ​ນາກ, ອາດ​ຈະ​ເປັນ​ສິ່ງ​ສັກສິດ​ທັງຫລາຍ​ທັງ​ປວງດັ່ງ​ນັ້ນ​ກໍ່ຂໍໃຫ້​ພິຈາລະນາ​ຕາມ​ຄວາມ​ເຊື່ອ​ຂອງ​ບຸກຄົນ. ​ແນວ​ໃດ​ກໍ່​ດີ ຄວາມ​ເຊື່ອ​ເຫລົ່າ​ນັ້ນຂໍ​ໃຫ້​ຜະໜວກ​ເຫດຜົນ​ຕາມ​ຫລັກ​ພຸດທະ​ສາສະໜາຂໍ​ໃຫ້​ມີ​ສິນ​ເປັນ​ປົກກະ ຕິ, ມີ​ສັດທາ​ ​ເຊື່ອ​ໝັ້ນ​​ຫລັກ​ຄຳ​ສອນ ​ແລະ ​ເຊື່ອ​ໝັ້ນ​ຕາມ​ແນວທາງ​ນະ​ໂຍບາຍ​ຂອງ​ພັກ-ລັດຖະບານແລະ ​ເປັນ​ວິທະຍາສາດ ທີ່​ເຊື່ອ​ວ່າ​ນາກ​ນັ້ນ​ມີ​ຈິງ ​ຊຶ່ງນາກ ທາງ​ວິທະຍາສາດ​ນັ້ນ​ແມ່ນ​ນາກ​ທີ່​ມີ​ສິນ​ມີ​ທຳ, ​ເປັນ​ຜູ້​ເຄົາລົບ​ນອບ​ນ້ອມ, ​ເຊື່ອ​ຖື ຖ້າ​ໃຜ​ບູຊາ​ພະຍາ​ນາກ ກໍ່​ໃຫ້​ບູຊາ​ແບບ​ທຳ​ມະ​ຊາດ​​ເປັນ​ຕົ້ນກ້ວຍ, ອ້ອຍທີ່​ເປັນ​ທຳ​ມະ​ຊາດ ບໍ່​ໃຫ້​ເປັນ​ປລາ​ສະ​ຕິກ ບູຊາ​ຕາມ​ລຳ​ແມ່​ນ້ຳຂອງ ນາກ​ກໍ່ຈະ​ເປັນ​ຊື່ວ່າ​ນາກ​ແທ້​ຈິງ, ຖ້າ​ບຸກຄົນ​ໃດ​ທຳລາຍ​ທຳ​ມະ​ຊາດ ​ເອົາ​ປລາ​ສະ​ຕິກ ມາບ​ວງສວາງ​ສິ່ງ​ບໍ່​ຖືກຕ້ອງ ຫລື ວ່າ​ເຮັດ​ໃຫ້​ແມ່​ນ້ຳ​ເປື້ອນ​ ນາກ​ເຫລົ່າ​ນັ້ນ​ກໍ່ຈະ​ບໍ່​ຢູ່​ໃນ​ແມ່​ນ້ຳ​ ບູຊາ​ຫລາຍ​ເທົ່າ​ໃດ​ກໍ່ຈະ​ບໍ່​ໄດ້​ບຸນ.


ພະ ຫລັກ​ຄຳ ​​ກ່າວ​ຕື່ມ​ວ່າ: ການ​ບູຊາ​ທີ່​ແທ້​ຈິງ ຄື​ການ​ບູຊາ​ທີ່​ຖືກຕ້ອງ​ຄື ສິ່ງ​ທີ່​ບູຊາຕ້ອງ​ບູຊາ​ຢ່າງ​ວິທະ​ຍາ​ສາດ ບູຊາ​ດ້ວຍ​ທຳ​ມະ​ຊາດ ​ໂດຍສະ​ເພາະຕົ້ນ​ກວ້ຍ, ຕົ້ນ​ອ້ອຍ​ ທີ່​ສາມາດ​ລະລາຍ​ໄດ້​ງ່າຍ,ຖ້າ​ເອົາ​ປລາ​ສະຕິ​ກ ຫລື ​ໂຟມ​ມາ​ໃສ່​ສິ່ງຂອງບູຊາ​ແມ່​ນ້ຳ ມັນ​ຈະ​ລະລາຍ​ຍາກ ​ເຮັດ​ໃຫ້​ແມ່​ນໍ້າ​ເປື້ອນ​ ສິ່ງ​ສັກສິດ​ທີ່​ເຮົາ​ເຊື່ອ​ຖື​ກໍ່​ຈະ​ບໍ່​ຢູ່ ລວມທັງ​ປູ​ປາ​ນາ​ນ້ຳ​ທີ່​ອາ​ໄສ່ຢູ່​​ແມ່​ນ້ຳ ກໍ່​ຈະ​ສູນຫາຍ.

ທີ່ມາ: ຂປລ