ສ່ຽວກັນ ສາມັກຄີລັກລົດແຕ່ໄປບໍ່ລອດຍ້ອນຈີດີເອັກ

ສ່ຽວກັນ ສາມັກຄີລັກລົດແຕ່ໄປບໍ່ລອດຍ້ອນຈີດີເອັກ

3rd October 2020 0 By Education

ຢາກລອງຂອງແພງໄດ້ນອນຄຸກໄວ ຊື້ມາໝົດເງິນຫຼາຍແນ່ນອນເຈົ້າຂອງຕ້ອງປ້ອງກັນໄວ້ ບໍ່ປ່ອຍໃຫ້ຂີ້ເຫຍື້ອສັງຄົມໄດ້ເສບສຸກຍາວນານດອກເດີ້ ເບິ່ງລາຍນີ້ເປັນຕົວຢ່າງ ສອງສ່ຽວນອນຄຸກພຽງຂ້າມຄືນ ຫຼັງຮ່ວມມືລັກລົດຊູເມີເອັກໄປຂາຍ ແຕ່ບໍ່ທັນໄດ້ເຮັດຫຍັງຊ້ຳ ໄປກິນເຂົ້າລີງກ່ອນ.


ຜຼ້ກໍ່ເຫດຊື່ທ້າວ ພູທອນ (ແຫຼ້) ອາຍຸ 35 ປີ ແລະ ທ້າວ ສຸລິຍາ (ຍາ) ອາຍຸ 24 ປີ, ທັງສອງຄົນກໍາມະກອນ ຢູ່ບ້ານນາສ້າງໄຜ່ ເມືອງໄສເສດຖາ ນະຄອນຫຼວງວຽງຈັນ, ໄດ້ຮ່ວມກັນລັກເອົາລົດຈັກ ທີ່ຈອດໄວ້ແຄມທາງປ່າ ເຂດບ້ານນາສ້າງໄຜ່ໃນວັນທີ 3 ສິງຫາ ແລະ ຖືກຈັບໜຶ່ງວັນຕໍ່ມາຫຼັງກໍ່ເຫດ.


ຜ່ານການສືບສວນ-ສອບສວນຂອງເຈົ້າໜ້າທີ່ ປກສ ເມືອງໄຊເສດຖາ ທ້າວ ພູທອນ ແລະ ທ້າວ ສຸລິຍາ ໄດ້ຮັບສາລະພາບວ່າ: ພວກຕົນທັງສອງຄົນເປັນຄົນບ້ານດຽວກັນ ແລະ ຮັກແພງກັນແບບອ້າຍ-ນ້ອງ; ເຊິ່ງໃນວັນທີ 03 ສິງຫາ 2020, ເວລາ 9:00 ໂມງ ພວກຕົນໄດ້ຊວນກັນໄປເລາະເກັບເຫັດຢູ່ໃນປ່າ ເຂດໃກ້ບ້ານ, ໃນຂະນະທີ່ກໍາລັງຊອກເກັບເຫັດຢູ່ນັ້ນ ໄດ້ມີໄວລຸ້ນບໍ່ຮູ້ຈັກຊື່ຂັບຂີ່ລົດຈັກ ຍີ່ຫໍ້ຊູເມີເອັກ ສີຟ້າດໍາ ບໍ່ຈື່ປ້າຍທະບຽນ ມາຈອດໄວ້ຢູ່ແຄມທາງໃກ້ກັບບ່ອນພວກຕົນເກັບເຫັດ ແລ້ວຊາຍຄົນນັ້ນກໍຍ່າງເຂົ້າໄປໃນປ່າພວກຕົນ ຈຶ່ງເກີດມີແນວຄິດຢາກໄດ້ລົດໄປຂາຍ ເລີຍໄດ້ພາກັນຈູງເອົາລົດໄປຊຸກເຊື່ອງໄວ້ໃນປ່າບ່ອນໃໝ່.

ວັນທີ 04 ສິງຫາ 2020, ເວລາ 11:00 ໂມງ ຈຶ່ງໄດ້ຂັບຂີ່ລົດຈັກຄັນດັ່ງກ່າວ ໄປຫາໝູ່ຢູ່ເຂດບ້ານສີວິໄລ ເມືອງໄຊທານີ, ແຕ່ຖືກເຈົ້າໜ້າທີ່ ປກສ ເມືອງໄຊເສດຖາ ກັກຕົວໄວ້ ແລະ ຜ່ານມາທັງສອງເຄີຍເສບຢາບ້າມາແຕ່ປີ 2015; ເຊິ່ງຊື້ນໍາໄວລຸ້ນ ຢູ່ຮ້ານເກມອິນເຕີເນັດທົ່ວໄປ ຊື້ແຕ່ລະຄັ້ງຈໍານວນ 2-3 ເມັດ ແລ້ວເອົາໄປເສບຢູ່ໃນປ່າເຂດໃກ້ບ້ານ.


ເຈົ້າໜ້າທີ່ ປກສ ເມືອງໄຊເສດຖາ ໃຫ້ຮູ້ວ່າ: ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍໃນວັນທີ 03 ສິງຫາ 2020 ເວລາ 10:40 ໂມງວ່າ: ໄດ້ຂີ່ລົດຈັກ ຍີຫໍ້ຊູເມີເອັກ ສີຟ້າດໍາ ປ້າຍທະບຽນ ດລ 4980 ເພື່ອໄປຊອກເກັບເຫັດ ຢູ່ປ່າເຂດໃກ້ບ້ານ ແຕ່ຖືກຄົນຮ້າຍລັກລົດໄປ; (ລົດແມ່ນໄດ້ຕິດຕັ້ງສັນຍານ GPS) ເມື່ອເປັນແນວນັ້ນ ເຈົ້າໜ້າທີ່ ປກສ ເມືອງໄຊເສດຖາ, ຈຶ່ງໄດ້ນໍາກໍາລັງວິຊາສະເພາະລົງຕິດຕາມ. ພໍມາຮອດວັນທີ 04 ສິງຫາ 2020, ເວລາ 11:00 ໂມງ ກໍສາມາດເຂົ້າກັກຕົວຄົນຮ້າຍໄດ້ 2 ຄົນ ພ້ອມລົດຈັກຄັນດັ່ງກ່າວ ຢູ່ເຂດບ້ານສີວິໄລ ເມືອງໄຊທານີ; ສ່ວນລົດຈັກເຈົ້າໜ້າທີ່ໄດ້ຕິດຕໍ່ປະສານຫາເຈົ້າຂອງລົດນໍາເອົາເອກະສານມາພົວພັນ ເອົາເປັນທີ່ຮຽບຮ້ອຍແລ້ວ

ຂອບໃຈຂ່າວຈາກ: ປ້ອງກັນຄວາມສະຫງົບນະຄອນຫຼວງ