ບໍ່ທໍາມະດາ! ສາມັກຄີໄຊ ໄດ້ຮັບນາມະຍົດ ເປັນຕະຫຼາດມາດຕະຖານແຫ່ງທໍາອິດຂອງນະຄອນໄກສອນ

ບໍ່ທໍາມະດາ! ສາມັກຄີໄຊ ໄດ້ຮັບນາມະຍົດ ເປັນຕະຫຼາດມາດຕະຖານແຫ່ງທໍາອິດຂອງນະຄອນໄກສອນ

5th October 2020 0 By Education

ໃນທ້າຍເດືອນກັນຍາ 2020ຜ່ານມານີ້,ທີ່ຫ້ອງການຈັດສັນຕະຫຼາດສາມັກຄີໄຊ ນະ ໄກສອນພົມວິຫານ ແຂວງສ/ຂ.ໄດ້ມີພິທີ ໄດ້ຈັດພິທີເປີດຕະຫຼາດສາມັກຄີໄຊ ເປັນຕະຫຼາດມາດຕະຖານ ແຫ່ງທຳອິດ ຂອງນະຄອນ ໂດຍການເຂົ້າຮ່ວມຂອງທ່ານ ປອ ແສງທອງ ວັງແກ້ວມະນີ ເຈົ້ານະຄອນ ໄກສອນ ພົມວິຫານ,ທ່ານ ໂພສີສອຍ ກຸທິລາດ ຫົວໜ້າພະແນກອຸດສາຫະກຳແລະ ການຄ້າແຂວງພ້ອມດ້ວຍ ຫົວໜ້າບໍລິຫານຕະຫຼາດສາມັກຄີໄຊເຂົ້າຮ່ວມ.

ໂອກາດນີ້ ຜູ້ຕາງໜ້າເຈົ້າຂອງຕະຫຼາດໄດ້ລາຍງານວ່າ: ຕະຫຼາດສາມັກຄີໄຊ ຕັ້ງຢູ່ບ້ານດົງດວນ ເປັນຕະຫຼາດປະເພດກາງ ໂດຍຂື້ນກັບການຄຸ້ມຄອງຂອງຫ້ອງການອຸດສາຫະກຳ ແລະ ການຄ້ານະຄອນ ໄດ້ສ້າງຕັ້ງຂື້ນໃນປີ 1998 ມີຄະນະບໍຫານ3/1ທ່ານ, ປະກອບມີ 5 ໜ່ວຍງານຄື: ໜ່ວຍງານຈັດຕັ້ງ, ບໍລິຫານ-ການເງິນການບັນຊີ, ໜ່ວຍງານປ້ອງກັນຄວາມສະຫງົບສຸກ-ປ້ອງກັນອັກຄີໄຟ, ໜ່ວຍງານສຸຂະນາໄມ, ໜ່ວຍງານບໍລິຫານຈອດລົດແລະ ໜ່ວຍງານກວດກາ, ມີມູນຄ່າການກໍ່ສ້າງທັງໜົດ 3 ຕື້ 192 ລ້ານກວ່າກີບ ປະກອບມີອາຄານໃຫຍ່1ຫລັງ, ມີໂຕະວາງຂາຍສິນຄ້າຂະໜາດ1×1,5ແມັດ, ຈໍານວນ300ໂຕະ ແລະ ໄດ້ແບ່ງເຂດບໍລິການຄືເຂດຈໍາໜ່າຍເຄື່ອງອຸປະໂພກ ແລະ ເຂດຈໍາໜ່າຍເຄື່ອງບໍລິໂພກ.

ໄລຍະຜ່ານມາໂດຍໄດ້ຮັບການແນະນຳຈາກພາກສ່ວນກ່ຽວຂ້ອງເປັນຕົ້ນແມ່ນວິຊາການຈາກຫ້ອງການອຸດສາຫະກຳ ແລະ ການຄ້ານະຄອນແລະຄະນະກຳມະການຄຸ້ມຄອງແລະຈັດສັນຕະຫຼາດໄດ້ລົງມາຕິດຕາມຊຸກຍູ້ໃຫ້ມີການປັບປຸງແກ້ໄຂຕາມລະບຽບການຕ່າງໆທີ່ກ່ຽວຂ້ອງຖ້າທຽບໃສ່ກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໜ່ຕາມເນື້ອໃນມາດຖານ ແລະ ເງື່ອນໄຂຂອງການສ້າງຕະຫຼາດມາດຖານທີ່ຂັ້ນເທິງກຳນົດໄວ້.

ເຊິ່ງໄດ້ມີການປັບປຸງແກ້ໄຂຫຼາຍດ້ານເປັນຕົ້ນ ຄວາມປອດໄພ,ຄວາມສະອາດເປັນລະບຽບຮຽບຮ້ອຍດີ, ໄດ້ແກ້ໄຂຮ່ອງຄອງ,ນ້ຳອັ່ງຂັງ, ຄວາມເປີເປື້ອນ, ມີບ່ອນກຳຈັດຂີ້ເຫຍື້ອ ແລະ ມີປະເພດສິນຄ້າທີ່ມາວາງຂາຍປະເພດເຄື່ອງອຸປະໂພກ ແລະ ບໍລິໂພກ, ເຫັນວ່າໄດ້ຮັບຄວາມນິຍົມຫຼາຍພໍສົມຄວນ ໃນນັ້ນມີຈຸດບໍລິການວັດແທກ-ຊັ່ງຜອງສິນຄ້າແມ່ນໄດ້ຕິດຕັ້ງຊິງກາງມີ4ຈຸດ, ໂດຍໄດ້ຜ່ານການກວດກາມາດຕະຖານ,ມີຈຸດການກວດກາຄຸນນະພາບອາຫານສົດ,ຄຸນນະພາບສິນຄ້າ,ສຸຂະອານາໄມພືດແລະສັດ ແລະ ມີລະບົບປ້ອງກັນອັກຄີໄພ.

ຈາກນັ້ນ ທ່ານ ຄຳສີເພັດ ໄຊຍະວົງ ຫົວໜ້າຫ້ອງການອຸດສາຫະກຳ ແລະ ການຄ້ານະຄອນ ໄດ້ຕ່າງໜ້າຄະນະກຳມະການຄຸ້ມຄອງຈັດສັນຕະຫຼາດ ຜ່ານຂໍ້ລົງເລກທີ420/ຈນ.ກສແລະລາຍງານຜົນການລົງກວດກາຕະຫຼາດເພື່ອສ້າງເປັນຕະຫຼາດມາດຕະຖານຈາກນັ້ນວິຊາການຕ່າງໜ້າ ພະແນກອຸດສາຫະກຳແລະການຄ້າແຂວງກໍໄດ້ຂື້ນຜ່ານໃບຢັ້ງຢືນຕະຫຼາດມາດຕະຖານເລກທີ0666/ອຄ.ກຄພນ ວ່າດ້ວຍການມອບໃບຢັ້ງຢືນຕະມາດຕະຖານໃຫ້ຕະຫຼາດສາມັກຄີໄຊ ເປັນຕະຫຼາດມາດຕະຖານແຫ່ງທຳອິດ ຂອງນະຄອນໄກສອນ ພົມວິຫານ.