ພົບບໍ່ຜະລິດຢາແດງ ເຈົ້າໜ້າທີ່ຢືດລຽບ

ພົບບໍ່ຜະລິດຢາແດງ ເຈົ້າໜ້າທີ່ຢືດລຽບ

3rd November 2020 0 By Education

ຫຼາຍປີຜ່ານມາບ້ານເຮົາເຖິງແມ່ນຈະມີບັນຫາສານເບື່ອເມົາລະບາດຫຼາຍ ແຕ່ສ່ວນໃຫຍ່ຍັງແມ່ນການນຳເຂົ້າ ແຕ່ 1-3 ປີມານີ້ເຈົ້າໜ້າທີ່ເລີ່ມພົບແຫຼງຜະລິດເອງຢູ່ພາຍໃນ ເຊິ່ງເປັນເລື່ອງທີ່ໜ້າຄິດຫຼາຍ ແລະບໍໄກຕົວອີກແລ້ວ ຖ້າປະຊາຊົນຄົນລາວບໍ່ຢັບຢັ້ງຊັ່ງໃຈ ແລ້ວຍັງຢາກລອງຢາກລວຍໄປກັບຢາພວກນັ້ນຢູ່ກໍ່ມີໂອກາດທີ່ຈະພາຕົນເອງສູ່ນະລົກທັງເປັນບໍ່ວ່າໃນ ຫຼື ນອກຄຸກກໍ່ຕາມ.


ດັ່ງກໍລະນີທີ່ກວດພົບໃນວັນທີ 22 ຕຸລາ 2020, ເຈົ້າໜ້າທີ່ວິຊາສະເພາະຫ້ອງຕໍາຫຼວດ ປກສ ແຂວງອຸດົມໄຊ ສົມທົບອຳນາດການປົກຄອງບ້ານ ແລະ ພາກສ່ວນກ່ຽວຂ້ອງ ເຂົ້າກວດຄົ້ນເຮືອນເປົ້າ ໝາຍຢາເສບຕິດ ຢູ່ 3 ຈຸດ ເຂດບ້ານດອນໄຊ ແລະ ບ້ານພູຂຽວ ເມືອງໄຊ.ເຊິ່ງສາມາດກັກຕົວເປົ້າໝາຍໄດ້ 1 ຄົນ ພ້ອມຢາຈໍານວນຫຼາຍ ພ້ອມຫົວຕອກອີກ 87 ຫົວ.


ເຈົ້າໜ້າທີ່ ປກສ ແຂວງອຸດົມໄຊ ເປີດເຜີຍວ່າ: ຜ່ານການກວດກາເຮືອນຂອງເປົ້າໝາຍ ຊື່ທ້າວ ຈີນູລີ ອາຍຸ 29 ປີ ຢູ່ບ້ານດອນໄຊ, ຜ່ານການກວດຄົ້ນເຮືອນເປົ້າໝາຍ ຈຸດທີ1 ຢູ່ເຂດບ້ານດອນໄຊ ພົບຢາ 34.000 ເມັດ ໜັກ 3,8 ກິໂລກຼາມ, ເຮໂຣອິນ 1 ຫໍ່ນ້ອຍ ໜັກ 153 ກຼາມ, ແປ້ງຝຸ່ນສີຂາວ ແລະ ສີແດງ ໜັກ 2,5 ກິໂລກຼາມ, ເຄື່ອງອັດ ຢາ 1 ເຄື່ອງ ແລະ ພົບຢາ 439.000 ເມັດ ໜັກ 49,5 ກິໂລກຼາມ ໃນລົດເກງສີດຳ ໝາຍເລກທະບຽນ ນມ 9000 ກໍາແພງນະຄອນ, ພ້ອມເຮໂຣອິນ 1 ແທ່ງ ໜັກ 387 ກຼາມ.

ຈາກນັ້ນໄດ້ກວດຄົ້ນຈຸດທີ 2 ພົບຂອງກາງ ປະເພດແປ້ງຝຸ່ນສີຂາວ1 ຖົງ ໜັກ 3,3 ກິໂລກຼາມ, ສໍາລັບກວດຄົ້ນຈຸດທີ 3 ຢູ່ຈຸດບ້ານພູຂຽວ ເມືອງໄຊ ໄດ້ກວດກາພົບເຫັນເຄື່ອງຂອງກາງປະເພດຢາແດງ 256 ເມັດ ນ້ຳໜັກ 25,7 ກຼາມ, ແປ້ງຝຸ່ນສີຂາວ ໜັກ 210,7 ກຼາມ.

ໃນນີ້, ລວມເຄື່ອງຂອງກາງທີ່ກວດກາພົບ ແລະ ຢຶດໄດ້ທັງໝົດ ມີຢາ 473.256 ເມັດ ໜັກ 53,5 ກິໂລກຼາມ,ເຮໂຣອິນ ໜັກ 540 ກຼາມ,ແປ້ງຝຸ່ນປະສົມສານໜັກ 6 ກິໂລກຼາມ, ເຄື່ອງອັດ 1 ເຄື່ອງ ແລະ ຫົວຕອກ 87 ຫົວ ປັດຈຸບັນຄະດີຢາເສບຕິດດັ່ງກ່າວ, ເຈົ້າໜ້າທີ່ວິຊາສະ ເພາະ ປກສ ແຂວງອຸດົມໄຊ ກໍາລັງດໍາເນີນການສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການ ເພື່ອຕິດຕາມກັກຕົວດຳເນີນຄະດີຕາມກົດໝາຍ.