ຮູ້ໄວ້ບາງດ່ານທີ່ລັດອະນຸຍາດໃຫ້ບໍລິການແລ້ວ

ຮູ້ໄວ້ບາງດ່ານທີ່ລັດອະນຸຍາດໃຫ້ບໍລິການແລ້ວ

4th November 2020 0 By Education

ນັບແຕ່ມີການລະບາດຂອງພະຍາດໂຄວິດ-19 ປະເທດເຮົາໄດ້ມີການປິດດ່ານປະເພນີ ແລະດ່ານທ້ອງຖິ່ນທຸກແຫ່ງ ຍົກເວັ້ນແຕ່ດ່ານສາກົນ ແມ່ນສາມາດຜ່ານໄປມາໂດ້ ແຕ່ຕ້ອງເປັນລົດຂົນສົ່ງເທົ່ານັ້ນ, ກໍລະນີເປັນການເຂົ້າ-ອອກຂອງຄົນທົ່ວໄປແມ່ນຕ້ອງໄດ້ຮັບການເຫັນດີຈາກຄະນະສະເພາະກິດເທົ່ານັ້ນ ແຕ່ເພື່ອເປັນການອຳນວຍຄວາມສະດວກແກ່ການສ້າງສາພັດທະນາປະເທດຊາດ ເດືອນນີ້ລັດຖະບານໄດ້ອະນຸຍາດໃຫ້ເປີດບາງດ່ານປະເພນີແລ້ວ.

ດ່ານປະເພນີທີ່ໄດ້ຮັບອະນຸຍາດໃຫ້ເປີດຊົ່ວຄາວໃນບາງແຂວງປະກອບມີດ່ານປະເພນີໜອງມ້າ, ເມືອງບົວລະ ພາ, ແຂວງຄໍາມ່ວນ, ດ່ານບ້ານວັງ, ເມືອງໝື່ນ, ແຂວງວຽງຈັນ, ດ່ານປະເພນີທ່າສະອາດ ຢູ່ເມືອງປາກກະດິງ, ແຂວງບໍລິຄໍາໄຊ ຊົ່ວຄາວ ແລະ ດ່ານທ້ອງຖິ່ນປາງໄຮ, ເມືອງສິງ, ແຂວງຫລວງນໍ້າທາ.

ໂດຍຫ້ອງວ່າການສຳນັກງານຍາຍົກລັດຖະມົນຕີ ໄດ້ມີແຈ້ງການ ອີງຕາມແຈ້ງການເລກທີ 1131/ຫສນຍ, ລົງວັນທີ 15 ຕຸລາ 2020 ກ່ຽວກັບມາດຕະການຜ່ອນຜັນ ໃນໄລຍະການລະບາດຂອງ ພະ ຍາດໂຄວິດ-19, ເຊິ່ງໄດ້ມີການແຈ້ງເປີດດ່ານຊົ່ວຄາວໃນບາງແຂວງ ທີ່ມີຄວາມຈໍາເປັນ ແລະ ສໍາຄັນຕໍ່ການພັດທະນາ ດັ່ງຕໍ່ໄປນີ້: ເຫັນດີອະນຸມັດ ໃຫ້ເປີດດ່ານທ້ອງຖີ່ນປາງໄຮ, ແຂວງຫລວງນໍ້າທາ ສໍາລັບຂົນສົ່ງສິນຄ້າເຂົ້າ-ອອກ ສປປ ລາວ ທີ່ມີຄວາມຈໍາເປັນ ນັບແຕ່ວັນທີ 1 ພະຈິກ ຫາ 30 ມິຖຸນາ 2021 ຕາມການສະເໜີ ແຕ່ໃຫ້ປະຕິບັດຕາມລະບຽບການຂົນສົ່ງສິນຄ້າເຂົ້າ-ອອກ ທີ່ສອງຝ່າຍໄດ້ຕົກລົງ ແລະ ປະຕິບັດຜ່ານມາ ໃນໄລຍະທີ່ປະຕິບັດມາດຕະການປ້ອງກັນການລະບາດຂອງພະຍາດໂຄວິດ-19.

ເຫັນດີອະນຸມັດໃຫ້ບໍລິສັດ ຍິງເມົາ ສົ່ງເສີມປູກອ້ອຍ ຂາອອກ-ຂາເຂົ້າ ຈໍາກັດ ນໍາເຂົ້າແຮງງານ ຈໍານວນ 148 ຄົນ (ພະນັກງານຄຸ້ມຄອງ ແລະ ບໍລິຫານໂຄງການຈາກ ສປ ຈີນ 17 ຄົນ ແລະ ຄົນຂັບລົດ 131 ຄົນ) ແລະ ລົດຮັບໃຊ້ ຈໍານວນ 136 ຄັນ (ລົດຮັບໃຊ້ບໍລິຫານ 5 ຄັນ ແລະ ລົດບັນທຸກອ້ອຍ 131 ຄັນ) ເຂົ້າມາ ສປປ ລາວ ຕາມລະບຽບການຂອງຂະແໜງການກ່ຽວຂ້ອງ ໂດຍຜ່ານດ່ານທ້ອງຖິ່ນປາງໄຮ, ເມືອງສິງ, ແຂວງຫລວງນໍ້າທາ ເພື່ອກະກຽມສົ່ງອ້ອຍອອກໄປ ສປ ຈີນ, ແຕ່ໃນການປະຕິບັດຕົວຈີງ ໃຫ້ບໍລິສັດສ້າງແຜນສົ່ງອອກສິນຄ້າດັ່ງກ່າວໃຫ້ລະອຽດ.