ອຸທາຫອນການເສບຂ່າວ! ເຫດຄົນນອນຢູ່ແຄມທາງ ບໍ່ກ່ຽວກັບໂຄໂຣນາ

ອຸທາຫອນການເສບຂ່າວ! ເຫດຄົນນອນຢູ່ແຄມທາງ ບໍ່ກ່ຽວກັບໂຄໂຣນາ

31st January 2020 0 By Education

ກ່ອນໜ້ານີ້ໄດ້ເກີດມີການແຊພາບຂອງຊາຍໜຸ່ມຄົນໜຶ່ງທີ່ນອນຢູ່ແຄມທາງຕໍ່ໜ້າທະນາຄານແຫ່ງໜຶ່ງ, ທັງນີ້ມີຫຼາຍກຸ່ມຄົນໄດ້ແຊພາບດັ່ງກ່າວອອກໄປພ້ອມລົງຄໍາເຫັນຕ່າງໆນາໆ ໂດຍສະເພາະແມ່ນມຸ່ງໃສ່ປະເດັນຕິດເຊື້ອໄວຣັສໂຄໂຣນາ ແລ້ວມານອນເສຍຊີວິດຢູ່ຈຸດດັ່ງກ່າວ.

ຫຼ້າສຸດ ເພຈດັງໂທລະໂຄ່ງໄດ້ອອກມາໂພສພາບພ້ອມອະທິບາຍເຖິງຂໍ້ເທັດຈິງເຫດການນີ້ວ່າ ເປັນພຽງຄົນເມົາທີ່ແວ່ນອນຢູ່ແຄມທາງເທົ່ານັ້ນ ຊາຍຄົນດັ່ງກ່າວບໍ່ໄດ້ເສຍຊີວິດແຕ່ຢ່າງໃດ

ເຊິ່ງໜ່ວຍກູ້ຊີບອົງການກາແດງລາວ ແຈ້ງໃຫ້ຮູ້ວ່າ ໃນວັນທີ 31 ມັງກອນ 2020 ເວລາ 12:30 ນາທີ.ໜ່ວຍກູ້ຊີບກາແດງລາວ1625 ໄດ້ຮັບແຈ້ງເຫດຈາກປະຊາຊົນວ່າມີຊາຍຕ່າງປະເທດນອນຢູ່ຂ້າງທາງ(ສີແຍກໄຟແດງໄອໂມບາຍໜ້າທະນາຄານລາວ-ຫວຽດ)​, ເມື່ອອອກກວດສອບເຫດໄດ້ພົບຊາຍໜຶ່ງຄົນແລ້ວທາງອາສາກູ້ໄພກໍໄດ້ມີການປຸກຊາຍດັ່ງກ່າວຂື້ນມາ, ຜູ້ຊາຍຕ່າງປະເທດມີສະຕິດີ,​ ເປັນຄົນສັນຊາດມົງໂກລີ ຈາການກວດສອບຊາຍຄົນນີ້ມີອາການມືນເມົາແລ້ວນອນຂ້າງທາງ, ສ່ວນອາການບາດເຈັບແມ່ນບໍ່ພົບເຫັນອາການໃດໆ

ນີ້ຖືເປັນໜຶ່ງອຸທາຫອນສໍາຄັນໃນສະພາບທີ່ທົ່ວໂລກມີຄວາມລະມັດລະວັງຕໍ່ການລະບາດຂອງເຊື້ອໄວຣັສໂຄໂຣນາ ຈາກສະພາບທີ່ຢ້ານກົວຢູ່ແລ້ວ ແຕ່ເມື່ອເສບຂ່າວທີ່ບໍ່ມີມູນຄວາມຈິງທີ່ຖືກເຜີຍແຜ່ອອກໄປ ຍິ່ງເປັນການບັ່ນທອນຈິດໃຈຂອງຕົນເອງ ແລະ ຂະຫຍາຍໄປເຖິງກຸ່ມຄົນວົງກ້ວາງເມື່ອມີການນໍາມາເປີດເຜີຍລົງສື່ອອນລາຍໂດຍປາສະຈາກຂໍ້ມູນຄວາມຈິງ, ດັ່ງນັ້ນ ການເສບຂ່າວ ຕ້ອງລະມັດລະວັງ ແລະ ມີສະຕິຕຶກຕອງໃຫ້ດີກ່ອນ.