ກາເຟ ສ້າງລາຍຮັບບໍ່ໜ້ອຍເລີຍປີລະ 100 ລ້ານໂດລາ

ກາເຟ ສ້າງລາຍຮັບບໍ່ໜ້ອຍເລີຍປີລະ 100 ລ້ານໂດລາ

10th November 2020 0 By Education

ກາເຟຖືເປັນພຶດເສດຖະກິດຊະນິດໜຶ່ງທີ່ປະຊາຊົນທາງພາກໃຕ້ໄດ້ຍຶດຖືເປັນອາຊີບມາຫຼາຍປີ ຫຼາຍຄອບຄົວໄດ້ມີຊີວິດການເປັນຢູ່ທີ່ປ່່ຽນໄປຫຼາຍສົມຄວນ ແລະປະຈຸບັນຫຼາຍບໍລິສັດກໍກຳລັງສືກສາທີ່ດິນທີ່ເໝາະສົມແກ່ການປູກກາເຟຢ່າງຕໍ່ເນື່ອງ, ຫຼ້າສຸດຂໍ້ມູນເປີດເຜີຍວ່າທີ່ຜ່ານມາກາເຟສາມາດສ້າງລາຍຮັບໄດ້ຫຼາຍເຖິງ 100 ລ້ານໂດລາສະຫະລັດ.

ກາເຟສາມາດເວົ້າໄດ້ວ່າ ໄດ້ກາຍເປັນຜະລິດຕະພັນທີ່ສຳຄັນ ແລະ ເປັນສິນຄ້າສົ່ງອອກ ທີ່ສ້າງລາຍຮັບມະຫາສານໃຫ້ແກ່ປະເທດລາວ ສະເລ່ຍ 100 ລ້ານໂດລາສະຫະລັດຕໍ່ປີ ລວມທັງການສ້າງວຽກເຮັດງານທຳໃຫ້ປະຊາຊົນໄດ້ເປັນຈຳນວນຫລວງຫລາຍ.

ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະ ອຸດສາຫະກຳແຂວງຫລວງພະບາງ ໄດ້ລາຍງານ ໃຫ້ຮູ້ໃນໂອກາດສະເຫລີມສະຫລອງງານກາເຟລາວ ເມື່ອບໍ່ດົນມານີ້ວ່າ: ສຳລັບປະເທດລາວ ໂດຍສະເພາະແມ່ນຢູ່ພາກໃຕ້ ເຂດພູພຽງບໍລະເວນ ການປູກກາເຟ ຖືວ່າໄດ້ຮັບການພັດທະນາທີ່ກ້າວໜ້າ ສາມາດຊ່ວຍເສີມສ້າງເສດຖະກິດ ແລະ ມີໂຄງສ້າງດ້ານການຈັດຕັ້ງການຜະລິດທຸລະກິດກາເຟ ຢ່າງກວ້າງຂວາງ, ສ່ວນຢູ່ພາກເໜືອ ເຫັນວ່າຍັງມີຫລາຍຢ່າງເປັນສິ່ງທ້າທາຍຫລາຍ ເປັນຕົ້ນ ພື້ນຖານໂຄງລ່າງມີຄວາມສູງຊັ້ນ, ເຫວເລິກ ບວກກັບຄວາມຮູ້ດ້ານວິຊາການ ດ້ານການພັດທະນາການປູກກາເຟ ຍັງມີຈຳກັດ.

ແນວໃດກໍ່ຕາມບ້ານເຮົາໂດຍລວມແມ່ນຍັງມີກາລະໂອກາດ ແລະ ສິ່ງເອື້ອອຳນວຍທີ່ບົ່ມຊ້ອນຫລາຍ ເຊັ່ນ: ດ້ານພະລັງງານການພັດທະນາ ບົນພື້ນຖານການພັດທະນາແບບຍືນຍົງ, ຍ້ອມມີຄວາມອຸດົມສົມບູນ ຊັບສົມບັດອັນລ້ຳຄ່າທາງດ້ານທຳມະຊາດ ເຊື່ອວ່າໃນອະນາຄົດຈະມີສວນກາເຟຢັ່ງຢາຍຢູ່ຫຼາຍເຂດແຂວງໃນປະເທດເຮົາ.


ຕາມຂໍ້ມູນໃຫ້ຮູ້ວ່າ: ມາຮອດປະຈຸບັນໃນທົ່ວປະເທດ ມີເນື້ອທີ່ປູກກາເຟ ປະມານ 1 ແສນເຮັກຕາ, ຜົນຜະລິດໄດ້ 1 ແສນກວ່າໂຕນຕໍ່ປີ. ໃນນີ້ 90% ແມ່ນຢູ່ພາກກາງ ແລະ ພາກໃຕ້, ສ່ວນພາກເໜືອຂອງລາວ ແມ່ນກວມເອົາພຽງ 10% ສະເພາະບັນດາແຂວງພາກເໜືອ ມີປະມານ 2 ໝື່ນ 5 ພັນ ຄອບຄົວ ໄດ້ຮັບຜົນປະໂຫຍດ ແລະ ປະມານ 3 ແສນຄົນ ທີ່ໄດ້ອອກແຮງງານ, ພ້ອມມີລາຍຮັບຈາກການຜະລິດ ແລະ ປຸງແຕ່ງກາເຟ.