ເສຍເງິນຟຣີເພາະຄວາມມັກງ່າຍ ຢ່າຖີ້ມຂີ້ເຫຍື້ອຊະຊາຍ

ເສຍເງິນຟຣີເພາະຄວາມມັກງ່າຍ ຢ່າຖີ້ມຂີ້ເຫຍື້ອຊະຊາຍ

10th November 2020 0 By Education

ນະຄອນຫຼວງວຽງຈັນຍັງເຂັ້ມງວດຕໍ່ຜູ້ທີ່ຝ່າຝືນກົດການຖີ້ມຂີ້ເຫຍື້ອຊະຊາຍ ອັນສ້າງຄວາມສົກກະປົກ ແລະຄວາມບໍ່ເປັນລະບຽບຮຽບຮ້ອຍແກ່ສັງຄົມ ແລະສິ່ງແວດລ້ອມ, ຫຼ້າສຸດໄດ້ປັບໃໝຜູ່ລັກລັກເອົາຂີ້ເຫຍື້ອມາຖີ້ມຕາມສະຖານທີ່ສາທາລະນະເປັນເງິນ 6 ລ້ານກີບ.

ການປັບໃໝດັ່ງກ່າວແມ່ນສືບເນື່ອງມາຈາກໃນວັນທີ 20 ຕຸລາ 2020 ໄດ້ມີພົນລະເມືອງດີລົງຂ່າວທາງ facebook ກ່ຽວກັບ ການລັກຖີ້ມຂີ້ເຫຍື້ອຢູ່ເສັ້ນທາງໜອງບົວທອງ-ໜອງບຶກ ເມືອງສີໂຄດຕະບອງ, ນະຄອນຫລວງວຽງຈັນ.ຈາກນັ້ນ, ຫ້ອງການ ຄບຕ ຈື່ງໄດ້ແຕ່ງພະນັກງານ ລົງສົມທົບກັບອຳນາດການປົກຄອງບ້ານ, ເມືອງ ແລະ ພາກສ່ວນກ່ຽວຂ້ອງ ພ້ອມທັງລົງກວດກາສະຖານທີ່ຕົວຈິງ ຊອກຫາຜູ້ກະທຳຜິດ.

ມາຮອດວັນທີ 5 ພະຈິກ 2020 ຈື່ງຮູ້ວ່າຜູ້ກະທຳຜິດເປັນເຈົ້າຂອງຮ້ານຂາຍເຄື່ອງເຮືອນປະເພດສະແຕນເລດ ຕັ້ງຢູ່ຖະໜົນອາຊຽນ, ເຂດໜອງດ້ວງ ແລະ ໄດ້ເຊີນຜູ້ກ່ຽວມາສຶກສາອົບຮົມ ພ້ອມປັບໃໝຕາມລະບຽບເປັນເງິນ 6.000.000 ກີບ, ພ້ອມໃຫ້ເຮັດອະນາໄມສະຖານທີ່ດັ່ງກ່າວໃຫ້ມີຄວາມສະອາດ.

ສະນັ້ນ, ຈື່ງຮຽກຮ້ອງມາຍັງຄົນໃນສັງຄົມ ຈົ່ງມີສ່ວນຮ່ວມຊ່ວຍກັນຮັກສາຄວາມສະອາດ ແລະ ຖືວ່າວຽກງານດັ່ງກ່າວເປັນໜ້າທີ່ຂອງໝົດທຸກຄົນ. ພ້ອມດຽວກັນນີ້, ກໍລະນີພົບເຫັນຄົນລັກຖີ້ມຂີ້ເຫຍື້ອຊະຊາຍ ກະລຸນາແຈ້ງມາຍັງ ຫ້ອງການ ຄບຕ ໝາຍເລກໂທລະສັບ: 030 5829 366 ດ້ວຍ.