ກຽມພິຊິດຈອມພູທີ່ສູງສຸດຂອງປະເທດເຮົາ

ກຽມພິຊິດຈອມພູທີ່ສູງສຸດຂອງປະເທດເຮົາ

17th November 2020 0 By Education

ພູເຈ້ຍໃຜເດປະຊາຊົນລາວຈະບໍ່ຮູ້ ແຕ່ຖາມວ່າໃຜທີ່ໄດ້ໄປຮອດໄປເຖິງຈອມພູທີ່ສູງສຸດແຫ່ງນີ້ ຄົງມີໜ້ອຍຄົນເນື່ອງຈາກທີ່ຜ່ານມາການເດີນທາງກໍ່ບໍ່ງ່າຍປານໃດ ພູເບ້ຍກໍ່ບໍ່ທັນໄດ້ຮັບການພັດທະນາໃຫ້ເປັນແຫຼ່ງທ່ອງທ່ຽວຈິ່ງເປັນການຍາກທີ່ຜູ້ຄົນຈະເຂົ້າເຖິງ ແຕ່ຫຼັງຈາກນີ້ບັນດາຜູ້ມັກການຍ່າງ, ການພະຈົນໄພໃນປ່າເລິກໄດ້ມ່ວນແທ້ແນ່ນອນ.

ເພື່ອກຽມພ້ອມຮອງຮັບບັນດາແຂກທີ່ຈະໄປຢ້ຽມຢາມພູເບ້ຍດິນແດນເໜືອນ້ຳທີ່ສູງສຸດຂອງປະເທດເຮົາ ປະຈຸບັນພາກສ່ວນກ່ຽວຂ້ອງກຳລັງກະກຽມພະນັກງານນຳພາທ່ຽວ ເພື່ອສືກສາລາຍລະອຽດຂອງພູເບ້ຍໃຫ້ສາມາດໃຫ້ຂໍ້ມູນທ່ານຫຼາຍກວ່າການໄປທ່ຽວເອົາຄວາມເພີດເພີນຊື່ໆ.


ຫຼ້າສຸດວັນທີ 13 ພະຈິກ 2020 ຜ່ານມານີ້, ພະນັກງານນໍາທ່ຽວແຂວງໄຊສົມບູນ ເຊິ່ງມີນ້ອງນັກສຶກສາຈາກຄະນະວິທະຍາສາດສັງຄົມ ແລະ ພາກສ່ວນທີ່ກ່ຽວຂ້ອງໄດ້ຂຶ້ນສຶກສາຂໍ້ມູນສໍາຄັນຕ່າງໆຂອງພູເບ້ຍ ໂດຍການນໍາພາ ຂອງທ່ານ ທົງສະຫວັນ ໂພສະລາດ, ຮອງຫົວໜ້າພະແນກ ຖວທ ແຂວງ, ຜູ່ຊີ້ນໍາວຽກງານທ່ອງທ່ຽວ, ທ່ານ ຮສ ສະເຫຼີມສັກ ພະບຸດດີ, ຮອງຄະນະບໍດີ, ຄະນະວິທະຍາສາດສັງຄົມ ແລະ ທ່ານ ຮສ ປອ. ວິຈິດ ລໍາໄຊ, ຊ່ຽວຊານຊີວະນາໆພັນ, ມະຫາວິທະຍາໄລແຫ່ງຊາດ

ໂດຍເປົ້າໝາຍແມ່ນເພື່ອສຶກສາຂໍ້ມູນທາງທໍາມະຊາດທີ່ກໍານົດເປັນສະຖານທີ່ທ່ອງທ່ຽວເຊັ່ນ: ຈຸດຊົມວິວ ເໜືອເມກປ້ອມປ່າກ້ວຍ, ຈຸດຊົມວິວ ພູ 5 ຊັ້ນນໍ້າທອງ, ຈຸດສີລາໜໍ່ແຮດ ແລະ ຄວາມມະຫັດສະຈັນຂອງພູເບ້ຍ ທີ່ເຕັມໄປດ້ວຍຕົ້ນໄມ້ນາໆຊະນິດ ທີ່ມີລັກສະນະເປັນເອກະລັກເພາະ.

ຫຼັງການສືກສາຈົບລົງສິ່ງຕໍ່ໄປຄືຜູ້ທີ່ສົນໃຈຈະໄດ້ຂຶ້ນກິນລົມຊົມວີວເທິງພູເບ້ຍຢ່າງເພີດເພີນໃຈ, ໄດ້ສຳຜັດທຳມະຊາດປ່າໄມ້ນາໆພັນທີ່ນັ້ນແບບຈຸໃຈ ນອກຈາກພູເບ້ຍແລ້ວການເດີນທາງໄປແຂວງໄຊສົມບູນຍັງຈະໄດ້ພັກສາຍຫູສາຍຕາກັບຄວາມງາມຂອງນີວຊີແລນເມືອງລາວພູຫົວລົ້ນທີ່ເຕັມໄປດ້ວຍປ່າຫຍ້າ ແລະຖ້າໄປຍາມໜາວຈະມີທັງສາຍໝອກກັບດອກກະຈຽວເບັ່ງບານຕາມສາຍພູໃຫ້ໄດ້ຊົມຢ່າງເຕັມອີ່ມແນ່ນອນ.