ລາວຈະເປີດໂຮງກັ່ນນ້ຳມັນແຫ່ງທຳອິດຂອງປະເທດ

ລາວຈະເປີດໂຮງກັ່ນນ້ຳມັນແຫ່ງທຳອິດຂອງປະເທດ

26th November 2020 0 By Education

ຕາມລາຍງານຂ່າວຂອງໜັງສືພິມຂ່າວສານປະເທດລາວ ໃຫ້ຮູ້ວ່າ: ລາວເຮົາກຳລັງຈະມີໂຮງງານກັ່ນນໍ້າມັນແຫ່ງທຳອິດຂອງປະເທດ ໂດຍຄາດວ່າຈະເປີດທົດລອງການຜະລິດ ໃນວັນທີ 30 ພະຈິກ 2020 ນີ້ ເພື່ອຊົມໃຊ້ຢູ່ພາຍໃນປະເທດດ້ວຍກຳລັງການຜະລິດ 1ລ້ານໂຕ່ນຕໍ່ປີ. ເມື່ອໂຮງງານແຫ່ງນີ້ເປີດບໍລິການແລ້ວຈະຊ່ວຍຫລຸດຜ່ອນການນຳເຂົ້ານ້ຳມັນເຊື້ອໄຟ ຈາກຕ່າງປະເທດ, ທັງຫລຸດຜ່ອນລາຄານ້ຳມັນໃນຕະຫລາດພາຍໃນນຳອີກ.

ທ່ານ ປານີ ພວງເພັດ ຮອງຜູ້ອຳນວຍການ ບໍລິສັດເປໂຕຣເຄມີລາວ ຈຳກັດ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 24 ພະຈິກ 2020 ນີ້ວ່າ: ໂຮງງານກັ່ນນໍ້າມັນ ຂອງບໍລິສັດເປໂຕຣເຄມີລາວ ຈຳກັດ ຕັ້ງຢູ່ເຂດພັດທະນາກວມລວມໄຊເສດຖາ ນະຄອນຫລວງວຽງຈັນ, ໄດ້ເລີ່ມກໍ່ສ້າງໃນປີ 2015 ໃນເນື້ອທີ່ທັງໝົດ 280.000 ຕາແມັດ, ໂດຍໃຊ້ເງິນລົງທຶນ 179 ລ້ານໂດລາສະຫະລັດ ພາຍໃຕ້ບໍລິສັດເປໂຕຣເຄມີ ລາວ-ຈີນ ແຂວງຢຸນນານ ກັບ ກຸ່ມບໍລິສັດ ກໍ່ສ້າງ ແລະ ລົງທຶນແຂວງຢຸນນານ ຮຸ້ນສ່ວນຈຳກັດ ຖືຮຸ້ນ 75%, ລັດວິສາຫະກິດນໍ້າມັນເຊື້ອໄຟລາວ ຖືຮຸ້ນ 20% ແລະ ບໍລິສັດຮ່ວມທຶນລາວ-ຈີນຈຳກັດ ຖືຮຸ້ນ 5%.

ສຳລັບ ສປປ ລາວ ທີ່ຜ່ານມາແມ່ນນຳເຂົ້ານ້ຳມັນເຊື້ອໄຟຫລາຍລ້ານໂຕນຕໍ່ປີ ໃນລາຄາທີ່ສູງຫລາຍ ສະນັ້ນ, ໂຄງການໂຮງງານກັ່ນນໍ້າມັນເປໂຕຣເຄມີ ຈະຊ່ວຍໃນການຫລຸດຜ່ອນການນຳເຂົ້ານ້ຳມັນ ແລະ ຫລຸດຜ່ອນທາງດ້ານລາຄາ. ພ້ອມນີ້, ມັນຍັງສາມາດສ້າງວຽກເຮັດງານທຳໄດ້ຫລາຍຕ່ຳແໜ່ງງານ, ເຊິ່ງປັດຈຸບັນ ມີພະນັກງານເຖິງ 400 ຄົນ, ຄົນລາວປະມານ 100 ຄົນ.

ທ່ານ ປານີ ພວງເພັດ ກ່າວຕື່ມວ່າ: ໂຮງງານຂອງພວກເຮົາ ຍັງມີສິ່ງທ້າທາຍຫລາຍຢ່າງ ໂດຍສະເພາແມ່ນ ດ້ານຕະຫລາດຈຳໜ່າຍ  ເນື່ອງຈາກວ່າທຸກບໍລິສັດ ກໍໄດ້ມີການແກ້ງແຍ່ງແຂ່ງຂັນກັນທາງດ້ານການຈັດຊື້ ແລະ ນຳເຂົ້ານ້ຳມັນເຊື້ອໄຟ ສະນັ້ນ, ຈະຕ້ອງໄດ້ມີການສຶກສາຕະຫລາດຢ່າງລະອຽດ ກ່ຽວກັບຄວາມຕ້ອງການຕົວຈີງເພື່ອຮັບປະກັນບັນຫາການຜະລິດລົ້ນຕະຫຼາດລວມເຖິມຄວາມປອດໄພ ແລະ ສິ່ງແວດລ້ອມນຳອີກ.
Cr: ຂ່າວ-ຮູບ: ມະນີທອນ