ອັບເດດອາການນ້ອງນ້ຳຝົນ ແຝດຍິງທີ່ຖືກທຳຮ້າຍຮ່າງກາຍ

ອັບເດດອາການນ້ອງນ້ຳຝົນ ແຝດຍິງທີ່ຖືກທຳຮ້າຍຮ່າງກາຍ

10th December 2020 0 By Education

ຫຼາຍຄົນຄົງຈື່ໄດ້ກັບເຫດການທີ່ບໍ່ປາຖະໜາທີ່ເກີດກັບເດັກຝາແຝດໄວ 6 ປີ ເມື່ອຕົ້ນເດືອນຕຸລາ 2020 ຜ່ານມາ ເຊິ່ງແຝດຍິງທັງສອງແມ່ນຖືກທຳຮ້າຍຮ່າງກາຍຈົນສາຫັດເຮັດໃຫ້ແຝດເອື້ອຍຊື່ນ້ຳຟ້າບໍ່ສາມາດທົນກັບຄວາມເຈັບປວດໄດ້ຈິ່ງເສຍຊີວິດໄປ ສ່ວນນ້ອງນ້ຳຝົນໄດ້ຮັບການຊ່ວຍເຫຼືອຈາກສັງຄົມມາປິ່ນປົວຢູ່ນະຄອນຫຼວງວຽງຈັນ ຕອນນີ້ໄດ້ກັບຄືນບ້ານເກີດແລ້ວ.

ຕາມລາຍງານຂອງອ້າຍກູ່ ຜູ້ປະສານງານຫຼັກທັງເປັນຜູ້ທີ່ໄປຮັບນ້ອງນ້ຳຝົນມາປົວຢູ່ນະຄອນ
ຫຼວງວຽງຈັນ ໄດ້ອັບເດດອາການລ່າສຸດຂອງນ້ອງ ນ້ຳຝົນ ເດັກແຝດທີ່ຖືກທຳຮ້າຍຮ່າງກາຍ ໃນມື້ນີ້ ເພື່ອໃຫ້ທຸກຄົນທີ່ໄດ້ໃຫ້ການຊ່ວຍເຫລືອນ້ອງໄດ້ຮັບຮູ້ອາການຄືບໜ້າປະຈຸບັນຂອງນ້ອງ.


ອ້າຍກູ່ແຈ້ງວ່າ ປະຈຸບັນແມ່ນນ້ອງ ນ້ຳຝົນ ໄດ້ກັບໄປພັກຮັກສາໂຕຢູ່ທີ່ບ້ານເກີດເພື່ອຟື້ນຟູກາຍຍະບຳບັດທັງຮ່າງກາຍແລະຈິດໃຈຢູ່ບ້ານທີ່ແຂວງໄຊຍະບູລີແລ້ວ ຫຼັງຈາກກັບໄປຮອດແລ້ວທາງພໍ່ແມ່ພ້ອມຍາດພີ່ນ້ອງກໍ່ໄດ້ເຮັດພິທີສູດສູ່ຂັວນມັດແຂນຕາມຮີດຄອງໃຫ້ແກ່ນ້ອງ ແລະ ອາການຂອງນ້ອງປະຈຸບັນແມ່ນຄ່ອຍພັດທະນາການທີ່ດີຂຶ້ນກວ່າເກົ່າຫຼາຍ.

ນ້ອງໄດ້ມີການຕອບຮັບແລະລົມນຳເວລາສື່ສານໄປຫານ້ອງຖືວ່າດີຫລາຍກວ່າເກົ່າຫຼາຍແຕ່ຍັງບໍ່ສາມາດຍ່າງໄດ້ປົກກະຕິເທື່ອ ຕ້ອງໄດ້ໃຊ້ເວລາຟື້ນຟູໄປໄລຍະຫນຶ່ງເຊິ່ງພໍ່ແມ່ກໍ່ໄດ້ພານ້ອງ ນ້ຳຝົນ ຮຽນຍ່າງຮຽນຖີບລົດກໍ່ຄື ການກາຍຍະບຳບັດທາງຮ່າງກາຍນ້ອງຕາມທີ່ທາງແພດໝໍໄດ້ສັ່ງບອກໄວ້.

ເຊິ່ງທ່ານໝໍທີ່ປິ່ນປົວນ້ອງໄດ້ນັດໃຫ້ມາກວດເຊັກຄືນຮ່າງກາຍສະໝອງທີ່ຖືກກະທົບພາຍໃນ ວັນທີ 14-16 ເດືອນ 12 ປີ 2020 ນີ້ ຈິ່ງຂໍແຈ້ງໃຫ້ທຸກທ່ານທີ່ໃຫ້ການຊ່ວຍເຫຼືອນ້ອງ ນ້ຳຝົນ ໄດ້ຮັບຮູ້ສະພາບອາການຂອງນ້ອງປະຈຸບັນແລະຂໍຂອບໃຈແທນຄອບຄົວຂອງນ້ອງ ກັບທຸກພະລັງແຮງໃຈຈາກສັງຄົມທຸກໆທ່ານ ທີ່ໃຫ້ການຊ່ວຍເຫຼືອແລະໃຫ້ກຳລັງໃຈນ້ອງນ້ຳຝົນແລະຄອບຄົວນ້ອງຕະຫຼອດມານະທີ່ນີ້ດ້ວຍ.