ດີໃຈນໍາ ! ຫຼວງນໍ້າທາ ໄດ້ຮັບລາງວັນໂຮງແຮມຂຽວອາຊຽນ

ດີໃຈນໍາ ! ຫຼວງນໍ້າທາ ໄດ້ຮັບລາງວັນໂຮງແຮມຂຽວອາຊຽນ

11th February 2020 0 By Entertain

ໃນລະຫວ່າງວັນທີ 14-17 ມັງກອນ 2020 ເນື່ອງໃນໂອກາດງານມະຫາກໍາທ່ອງທ່ຽວອາຊຽນ ຄັ້ງທີ 23 ແລະ ກອງປະຊຸມປິ່ນອ້ອມ ອາຊຽນ +3 ( ສປ ຈີນ, ຍີ່ປຸ່ນ ແລະ ສ. ເກົາຫຼີ) ທີ່ ປະເທດ ບຣູໄນ. ໃນກອງປະຊຸມມີລັດຖະມົນຕີທ່ອງທ່ຽວ ອາຊຽນຈາກ 10 ປະເທດເຂົ້າຮ່ວມຕາມລໍາດັບ. ສະເພາະ ສປປ ລາວ ແມ່ນນໍາພາໂດຍ ທ່ານ ສຈ. ປອ. ກິແກ້ວ ໄຂຄໍາພິທູນ ລັດຖະມົນຕິກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ພາຍຫຼັງສໍາເລັດການຈັດຕັ້ງກອງ ປະຊຸມແລ້ວ ຄະນະຈັດຕັ້ງກອງປະຊຸມໄດ້ຈັດພິທີມອບຮັບລາງວັນດີເດັ່ນທາງດ້ານມາດຕະຖານທ່ອງທ່ຽວອາຊຽນ ຂອງແຕ່ລະປະເທດ ເຊິ່ງໄດ້ແບ່ງລາງວັນມາດຕະຖານທ່ອງທ່ຽວອາຊຽນ ສໍາລັບປີ 2020 ອອກເປັນ 4 ປະເພດ ຄື:


1 ມາດຕະຖານໂຮງແຮມຂຽວອາຊຽນ ເຊິ່ງເປັນມາດຕະຖານທໍາອິດ ທີ່ໄດ້ຮັບການຈັດຕັ້ງປະຕິບັດຢູ່ ຂອບຮ່ວມມືອາຊຽນ ນັບແຕ່ປີ 2008 ເປັນຕົ້ນມາ ເພື່ອປະກອບສ່ວນຊຸກຍູ້ບັນດາຫົວໜ່ວຍທຸລະກິດໂຮງແຮມ ແລະ ຣີສອດ ໃຫ້ມີການປົກປັກຮັກສາສິ່ງແວດລ້ອມ ລວມເຖິງການນໍາໃຊ້ຜະລິດຕະພັນ ທີ່ເປັນມິດກັບສິ່ງແວດລ້ອມ, ນໍາ ໃຊ້ພະລັງງານໄຟຟ້າ ແລະ ນໍ້າ ຢ່າງມີປະສິດທິຜົນ, ສົ່ງເສີມໃຫ້ປະຊາຊົນມີວຽກເຮັດງານທໍາ ພ້ອມທັງສົ່ງເສີມ ການນໍາໃຊ້ຜະລິດຕະພັນພາຍໃນປະເທດ.

ໃນປີ 2020 ນີ້ ມີທັງໝົດ 46 ລາງວັນ ໃນນັ້ນ ສປປ ລາວໄດ້ຮັບ 5 ລາງ ວັນ ຄື: ໂຮງແຮມພູແມນ ແຂວງຫຼວງພະບາງ, ໂຮງແຮມອິນທິຣາ ແຂວງວຽງຈັນ, ຣີສອດ ນໍ້າກັດຢໍລະປາ ແຂວງ ອຸດົມໄຊ, ຣິສອດພູວິລາ ແຂວງຫຼວງນໍ້າທາ ແລະ ໂຮງແຮມປາກຊ່ອງແດນງາມ ແຂວງຈໍາປາສັກ.


2 ມາດຕະຖານສະຖານທີ່ຈັດງານອາຊຽນ (ຫ້ອງປະຊຸມ) ມີທັງໝົດ 41 ລາງວັນ ເຊິ່ງລາວວັນນີ້ ໄດ້ ມອບໃຫ້ປະເທດອາຊຽນ ເປັນຄັ້ງທີ 2 ນັບແຕ່ປີ 2019 ທີ່ຊຽງໃໝ່, ປະເທດໄທ. ຈຸດປະສົງເພື່ອຍົກລະດັບມາດຕະ ຖານ ແລະ ຄຸນນະພາບຂອງຫ້ອງປະຊຸມ ໃນບັນດາປະເທດອາຊຽນ ໃຫ້ມີລະດັບທີ່ສາມາດແຂ່ງຂັນກັບສາກົນໄດ້.

ລາງວັນນີ້ ສໍາລັບ ສປປ ລາວໄດ້ຮັບ 5 ລາງວັນ ຄື: ໂຮງແຮມພູແມນ ແຂວງຫຼວງພະບາງ, ໂຮງແຮມຄຣາວພາຊຮາ ນະຄອນຫຼວງວຽງຈັນ, ຫໍປະຊຸມແຫ່ງຊາດ ນະຄອນຫຼວງວຽງຈັນ, ໂຮງແຮມຈໍາປາສັກແກຣນ ແຂວງຈໍາປາສັກ ແລະ ຫໍວັດທະນະທໍາ ແຂວງສະຫວັນນະເຂດ.


3 ມາດຕະຖານເມືອງທ່ອງທ່ຽວອາຊຽນ ມີທັງໝົດ 21 ລາງວັນ ເຊິ່ງຈັດຂຶ້ນເປັນຄັ້ງທີ 2 ເຊັ່ນດຽວກັນ ກັບລາງວັນມາດຕະຖານທີ່ກ່າວມາຂ້າງເທິງ ເພື່ອສົ່ງເສີມໃຫ້ມີການຮັກສາສິ່ງແວດລ້ອມ, ປ້ອງກັນບໍ່ໃຫ້ມີຜົນກະ ທົບຈາກການປ່ຽນແປງຂອງສະພາບອາກາດ ແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ໃຫ້ແກ່ບັນດາເມືອງທ່ອງທ່ຽວອາຊຽນ ໃຫ້ມີຄວາມຍືນຍົງ. ສໍາລັບ ສປປ ລາວໄດ້ຮັບ 1 ລາງວັນ ຄື: ເມືອງທ່ອງ ທ່ຽວນະຄອນຫຼວງວຽງຈັນ.


4 ມາດຕະຖານການທ່ອງທ່ຽວແບບຍືນຍົງອາຊຽນ ມີທັງໝົດ 18 ລາງວັນ ເຊິ່ງລາງວັນດັ່ງກ່າວນີ້ ແມ່ນຂໍ້ລິເລີ່ມຂອງ ສປປ ລາວ ໃນໄລຍະການເປັນປະທານອາຊຽນ ໃນປີ 2016 ເພື່ອເປັນການສ້າງແຮງຈູງໃຈໃຫ້ ແກ່ຈຸດໝາຍປາຍທາງການທ່ອງທ່ຽວອາຊຽນ ແນໃສ່ຮ່ວມກັນພັດທະນາການທ່ອງທ່ຽວ ແລະ ຫຼຸດຜ່ອນບັນດາ ສິ່ງແວກລ້ອມ, ວັດທະນະທໍາ-ສັງຄົມ ແລະ ເສດຖະກິດ ທີ່ເກິດຈາກການຂະຫຍາຍຕົວຂອງການທ່ອງທ່ຽວ ຢ່າງ ວ່ອງໄວ. ພ້ອມດຽວກັນ ທັງເປັນການປຸກຈິດສໍານຶກ ໃຫ້ແກ່ພາກລັດ ແລະ ພາກທຸລະກິດ ເພື່ອປັບປຸງຜະລິດຕະພັນ ແລະ ຍົກລະດັບການບໍລິການ ໃຫ້ຢູ່ໃນມາດຕະຖານທີ່ກໍານົດໄວ້.

ສໍາລັບ ສປປ ລາວໄດ້ຮັບ 2 ລາງວັນຄື: ສະຖານທີ່ ທ່ອງທ່ຽວວັດຊຽງທອງ ແຂວງຫຼວງພະບາງ (ຜະລິດຕະພັນການທ່ອງທ່ຽວໃນຕົວເມືອງ) ແລະ ສະຖານທີ່ທ່ອງ ທ່ຽວວັດພູຈໍາປາສັກ ແຂວງຈໍາປາສັກ (ຜະລິດຕະພັນການທ່ອງທ່ຽວໃນຊົດນະບົດ). ນອກນັ້ນ, ພາຍໃນງານຍັງມີການພົບປະຂອງພາກທຸລະກິດທ່ອງທ່ຽວຈາກບັນດາປະເທດອາຊຽນ, ພາກ ພື້ນ ແລະ ສາກົນ, ມີການວາງສະແດງຜະລິດຕະພັນການທ່ອງທ່ຽວຂອງບັນດາປະເທດອາຊຽນ ແລະ ການສະ ແດງສີລະປະວັນນະຄະດີຈາກປະເທດເຈົ້າພາບ ແລະ ປະເທດກໍາປູເຈຍ ເຊິ່ງຈະເປັນເຈົ້າພາບການ ຈັດງານມະ ຫາກໍາທ່ອງທ່ຽວອາຊຽນ ຄັ້ງທີ 24 ໃນຕົ້ນປີ 2021.