ບອກຫ້າມກໍ່ຄືຫ້າມ, ຢ່າຝືນກົດສ່ຽງມາແລ້ວມັນຍາກ

ບອກຫ້າມກໍ່ຄືຫ້າມ, ຢ່າຝືນກົດສ່ຽງມາແລ້ວມັນຍາກ

18th April 2021 0 By Education

ແຕ່ນີ້ຫາທ້າຍເດືອນເມສາຍັງແມ່ນໄລຍະທີ່ສຸ່ມສ່ຽງຫຼາຍສຳລັບການລະບາດຂອງພະຍາດໂຄວິດ-19, ລັດຖະບານກໍ່ຄືຄະນະສະເພາະກິດຈິ່ງມີແຈ້ງການແນະນຳໃຫ້ປິດສະຖານບັນເທິງທຸກຮູບແບບ ສະຖານທີ່ໆບໍ່ສາມາດຮັກສາໄລຍະຫ່າງລະຫວ່າງຄົນເກີນກວ່າ 1 ແມັດຂຶ້ນໄປ ເຊິ່ງເຊື່ອເລີຍວ່າສຳລັບນ້ານອາຫານຮ້ານບັນເທິງບໍມີໃຜໄປຄົນດຽວ ແລະຢ່າງຫ່າງກັນເປັນ 2-3 ແມັດຢ່າງແນ່ນອນ ດ້ວຍເຫດນີ້ປິດໄວ້ດີກວ່າ.


ໃນວັນທີ 17 ເມສາ 2021 ເວລາ 21ໂມງ 55ນາທີ ເຈົ້າໜ້າທີ່ພະແນກຕຳຫຼວດທ່ອງທ່ຽວ ສົມທົບກັບກອງພັນປ້ອງກັນເຄື່ອນທີ່, ປກສ ເມືອງສີສັດຕະນາກ ແລະ ພາກສ່ວນທີ່ກ່ຽວຂ້ອງ ລົງກວດກາລາດຕະເວນພົບເຫັນ ຮ້ານອາຫານ ເຍົາວະຣາດ 2 ຕັ້ງຢູ່ທາງຕັດໃໝ່ ບ້ານໂພນປາເປົ້າ ເມືອງສີສັດຕະນາກ ນວ ໄດ້ເປີດໃຫ້ບໍລິການທີ່ຂັດກັບຄຳແນະນຳເພີ່ມເຕີມ ຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ເລກທີ 3443/ສພກ ລົງວັນທີ 12 ເມສາ 2021 ແລະ ລະເມີດຕໍ່ແຈ້ງການ ເລກທີ 0483/ຖວທ.ນວ ສະນັ້ນເຈົ້າໜ້າທີ່ຈຶ່ງໄດ້ເຂົ້າກວດກາເອກະສານນຳເຈົ້າຂອງຮ້ານຊື່ ທ້າວ ທັດສອນ ສຸດດາຣານິ ເຫັນວ່າບໍ່ມີໃບອະນຸຍາດດຳເນີນທຸລະກິດ ຈຶ່ງສ້າງບົດບັນທຶກກ່າວເຕືອນ ແລະ ໃຫ້ປິດບໍລິການຈົນຮອດວັນທີ 30 ເມສາ 2021 ຈົນກວ່າຈະມີຄຳສັ່ງ, ແຈ້ງການໃຫ້ສາມາດເປີດບໍລິການໄດ້ ພ້ອມທັງແນະນຳໃຫ້ໄປຂໍໃບອະນຸຍາດດຳເນີນທຸລະກິດຈາກພາກ ສ່ວນທີ່ກ່ຽວຂ້ອງກ່ອນຈຶ່ງສາມາດເປີດໃຫ້ບໍລິການໄດ້.


ຕໍ່ກັບບັນຫາດັ່ງກ່າວ ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດ, ຮ້ານບັນເທິງ, ຮ້ານຄາຣາໂອເກະ, ຮ້ານກິນດື່ມ, ຮ້ານອິນເຕີເນັດກາເຟຕ່າງໆ ໃຫ້ປິດສະຖານທີ່ໃຫ້ບໍລິການຂອງຕົນ ເພື່ອປ້ອງກັນສະກັດກັ້ນບໍ່ໃຫ້ພະຍາດໂຄວິດ-19 ມີການແຜ່ລະບາດໃນປະເທດເຮົາ ກໍ່ຄືຢູ່ນະຄອນຫຼວງວຽງຈັນ ແລະ ຕໍ່ກັບຜູ້ລະເມີດຖ້າກວດພົບແມ່ນໃຫ້ເຮັດບົດບັນທຶກກ່າວເຕືອນ, ຖ້າຍັງສືບຕໍ່ແມ່ນໃຫ້ຢຶດໂຈະໃບທະບຽນ, ປິດກິດຈະການ ພ້ອມທັງປັບໃໝຕາມບຽບການ.

ພ້ອມນີ້ຂໍຮຽກຮ້ອງມາຍັງພໍ່ແມ່ປະຊາຊົນທຸກຊັ້ນຄົນຈົ່ງຊ່ວຍກັນເປັນຫູເປັນຕາ ຖ້າພົບເຫັນວ່າສະຖານທີ່ໃດຫາກມີການລະເມີດຕາມໜັງສືແຈ້ງການ, ແລະ ມີການຊຸມນຸມທີ່ເປັນຄວາມສ່ຽງໃນການແຜ່ລະບາດຂອງພະຍາດໂຄວິດ-19 ນັບແຕ່ວັນທີ 13-30 ເມສາ 2021 ໃຫ້ແຈ້ງເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີວອດແອັບ 020​28899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.