ຄະນະທຸດົງກາຍພູ 9 ຫຼັກແລ້ວ, ໃກ້ເຖິງຈຸດໝາຍຫຼວງພະບາງເມືອງມໍລະດົກໂລກ

ຄະນະທຸດົງກາຍພູ 9 ຫຼັກແລ້ວ, ໃກ້ເຖິງຈຸດໝາຍຫຼວງພະບາງເມືອງມໍລະດົກໂລກ

20th April 2021 0 By Education

ຜ່ານໄປ 5 ເດືອນແລ້ວທີ່ຄະນະທຸດົງຈາກວັດອຳພາພອນ ເມືອງ ຊົນນະບູລີ ແຂວງສະຫວັນນະເຂດອອກເດີນທາງສູ່ຫຼວງພະບາງ, ທີ່ຕ້ອງໃຊ້ເວລາຍາວນານ ເນື່ອງຈາກຄະນະອາໄສການທຸດົງ(ຍ່າງ) ແລະພັກຍາວຢູ່ນະຄອນຫຼວງວຽງຈັນ ໃຫ້ບັນດາສຳມະເນນໄດ້ເຂົ້າກາບໄຫວ້ຄູບາອາຈານຫຼາຍວັດ ອາໄສຮຽນຮູ້ໄປນຳ.

ພະອາຈານ ສົມຄວນ ທຳມະວົງສາ ຜູ້ນຳພາຄະນະທຸດົງບອກວ່າຮອດຕອນນີ້ໄດ້ຜ່ານເຂດພູ 9 ຫລັກໄປດ້ວຍດີ ເຂດຕິດຕໍ່ກັນລະຫວ່າງເມືອງກາສີແຂວງວຽງຈັນ ແລະເມືອງນານແຂວງຫຼວງພະບາງ ເຖິງແມ່ນວ່າການເດີນທາງຈະມີຄວາມລຳບາກແຕ່ສຳມະເນນທຸກອົງກໍ່ສູ້ສູ່ຈຸດໝາຍຢ່າງເຕັມທີ່.

ຄະນະສົງຈາຣິກທຸດົງເດີນທາງໄປຫຼວງພະບາງຄັ້ງນີ້ກໍ່ເພື່ອບູຊາພະລັດຕະນະໄຕ ຄື ພະພຸດທະເຈົ້າ,ພະທຳມະເຈົ້າ,ພະສັງຄະເຈົ້າ,ບູຊາແຜ່ນດິນລາວທີ່ໄດ້ພັກພາອາໄສ.

ສຳລັບເສັ້ນທາງທີ່ຄະນະສົງທຸດົງຜ່ານແມ່ນມີ ແຂວງສະຫວັນນະເຂດ, ຄຳມ່ວນ, ບໍລິຄຳໄຊ, ນະຄອນຫຼວງວຽງຈັນ, ແຂວງວຽງຈັນ, ໄຊຍະບູລີ ແລະສິ້ນສຸດປາຍທາງທີ່ຫຼວງພະບາງ.

ຄະນະສົງນຳໂດຍ ພະອາຈານ ສົມຄວນ ທຳມະວົງສາ ພ້ອມສຳມະເນນອີກ 11 ອົງ ໄດ້ເລີ່ມອອກເດີນທາງແຕ່ວັນທີ 9 ພະຈິກ 2020 ນີ້ ຈາກວັດອຳພາພອນ ເມືອງຊົນນະບູລີ ແຂວງສະຫວັນນະເຂດເພື່ອໄປຫາເປົ້າໝາຍປາຍທາງ.’

ບຸນກຸສົນທີ່ເກີດຈາກການຍ່າງຈາຣິກທຸດົງໃນເທື່ອນີ້,ຂໍອຸທິດສ່ວນບຸນສ່ວນກຸສົນໃຫ້ແດ່ວີລະບຸລຸດ,ວິລະສະຕີໃນຜືນແຜ່ນດິນລາວ,ແລະສັບພະສັດທັງຫຼາຍໂດຍບໍ່ມີປະມານຈົ່ງມີສ່ວນແຫ່ງບຸນໃນເທື່ອນີ້ດ້ວຍໄດ້ພະນິບພານດ້ວຍກັນທຸກທ່ານດ້ວຍເຖີດ

ຂໍໃຫ້ທຸກທ່ານຈົ່ງພົບພຣະນິບພານທຸກທ່ານເທີ້ນ.​ແຜ່ເມດຕາຈິດແດ່ບິດາມານດາຄູອຸປັດຊາອາຈານແລະສັບພະສັດທັງຫລາຍທັງປວງໄດ້ບໍຣົມມະສຸກທຸກທ່ານເທິ້ນ.