ຜູ້ປ່ວຍໂຄວິດລົ້ນໂຮງໝໍ ຕ້ອງເສີມພາກສະໜາມອີກ 1.700 ຕຽງກຽມຮອງຮັບຜູ້ປ່ວຍໃໝ່

ຜູ້ປ່ວຍໂຄວິດລົ້ນໂຮງໝໍ ຕ້ອງເສີມພາກສະໜາມອີກ 1.700 ຕຽງກຽມຮອງຮັບຜູ້ປ່ວຍໃໝ່

1st May 2021 0 By Education

ຈະເວົ້າໄປແລ້ວໂຮງໝໍລັດຢູ່ບ້ານເຮົາກໍມີບໍ່ຫຼາຍ ໃນແຕ່ລະວັນມີພໍ່ແມ່ປະຊາຊົນໄປໃຊ້ບໍລິການເກືອບວ່າລົ້ນມືແພດໝໍ ແລະຕຽງສຳລັບຄົນເຈັບກໍ່ເກືອບຈະບໍມີຫວ່າງເລີຍ ແນວໃດກໍ່ຕາມໃນຂະນະທີ່ເກີດການລະບາດຂອງພະຍາດໂຄວິດ-19 ລັດຖະບານໄດ້ເລັ່ງໃຫ້ກະກຽມສະຖານທີ່ແຍກປ່ຽວໄດ້ຈຳນວນໜຶ່ງຢູ່ໂຮງໝໍມິດຕະພາບ 150 ຕຽງ ແຕ່ເນື່ອງຈາກຈຳນວນຜູ້ຕິດເຊື້ອເພີ່ມຂຶ້ນທຸກວັນດຽວນີ້ໄດ້ຂະຫຍາຍໄປຍັງໂຮງໝໍເສດຖາ ແລະ 103 ກໍຍັງບໍພໍໄດ້ພຽງ 200 ກວ່າຕຽງ ຕ້ອງເສີມໂຮງໝໍພາກສະໜາມອີກ 1.700 ກວ່າຕຽງ.

ຕາມຂໍ້ມູນຈາກທ່ານ ດຣ. ນາງ ບົວເທບ ພູມີນ ຮອງຫົວໜ້າກົມປີ່ນປົວ ແລະ ຟື້ນຟູໜ້າທີ່ການ, ກະຊວງສາທາລະນະສຸກ ທີ່ລາຍງານໃນວັນທີ 1 ພຶດສະພາ 2021 ໃຫ້ຮູ້ວ່າ: ການກະກຽມສາຍປິ່ນປົວຜູ້ຕິດເຊື້ອພະຍາດໂຄວິດ-19 ໃນປັດຈຸບັນແມ່ນໄດ້ກະກຽມ 3 ຫຼັກການໃຫຍ່ຄື:


1. ກະກຽມດ້ານສະຖານທີ່: ເຊິ່ງຈະມີ ໂຮງໝໍມິດຕະພາບ, ໂຮງໝໍເສດຖາທີຣາດ, ໂຮງໝໍສູນກາງກອງທັບ 103 ລວມທັງໝົດໄດ້ກຽມຕຽງໄວ 216 ຕຽງ, ຕຽງນີ້ເລີ່ມຕົ້ນກຽມໄວສໍາລັບກໍລະນີເບົາບາງ ແລະ ໜັກ, ແຕ່ຖ້າກໍລະນີມີຄົນເຈັບເພີ່ມຂຶ້ນຄືດັ່ງປັດຈຸບັນນີ້ ພວກເຮົາກຽມສໍາລັບຜູ້ທີ່ມີອາການສະແດງຈາກປານກາງ ຫາ ໜັກ, ການກະກຽມສະຖານທີ່ນອກຈາກໂຮງໝໍແຫ່ງຕ່າງໆ ເຫັນວ່າໂຮງໝໍແຫ່ງຕ່າງກໍ່ໄດ້ຮັບຄົນເຈັບເກືອບວ່າລົ້ນແລ້ວ.

ສະນັ້ນ, ພວກເຮົາໄດ້ກຽມໂຮງໝໍພາກສະໜາມ ເຊິ່ງມີຢູ່ຄື:
1) ສູນກິລາບານເຕະແຫ່ງຊາດ ຫ້ວຍຫົງ ຮັບໄດ້ 150 ຄົນ ປັດຈຸບັນໄດ້ເຂົ້າໄປຢູ່ແລ້ວ,
2) ສະໜາມຍິງປືນກອງທັບ ຫຼັກ 27 ຈຳນວນຕຽງທີ່ກຽມໄວ 300-500 ຄົນ,
3) ສູນກິລາໃນຮົ່ມລານຊ້າງອິນທາ ຮັບໄດ້ປະມານ 300 ເຊິ່ງປັດຈຸບັນພາກສ່ວນທີ່ກ່ຽວຂ້ອງກໍາຂຸ້ນຂ້ຽວຈັດສະຖານທີ່ດັ່ງກ່າວ.


ສະໜາມກິລາຫຼັກ 16 ເປັນສະຖານທີ່ກວ້າງ, ສາມາດຮັບຄົນເຈັບໄດ້ 500 ຄົນ, ໂຮງແຮມດອນຈັນພາເລດ ທີ່ໄດ້ໄປເບິ່ງລ່າສຸດ ຮັບໄດ້ປະມານ 250 ຄົນ ແລະ ຍັງຈະມີສະຖານທີ່ອື່ນໆຕື່ມອີກຖ້າຫາກມີກໍລະນີຄົນຕິດເຊື້ອເພີ່ມຂຶ້ນອີກ.


2. ກະກຽມບຸກຄະລາກອນ: ພວກເຮົາແມ່ນໄດ້ເລີ່ມມາແຕ່ປີ 2020 ໄດ້ຝືກໃຫ້ທີມແພດຫຼັກທີ່ຈະປິ່ນປົວໂຄວິດ-19 ຢູ່ໃນສູນກາງ 650 ທ່ານ, ຢູ່ຕ່າງແຂວງ 17 ແຂວງ ມີທັງໝົດ 425 ທ່ານ.

ໃນນີ້, ຍັງໄດ້ກະກຽມທີມເສີມໂດຍເອົາທ່ານໝໍທີ່ບໍ່ແມ່ນທ່ານໝໍພາຍໃນ ຄືເອົາທ່ານໝໍເດັກ, ທ່ານໝໍປະສູດ, ໝໍຫູ, ໝໍດັງ, ໝໍຄໍອື່ນໆ ທີ່ພວກເຮົາເອີ້ນວ່າທີມເສີມຢູ່ສູນກາງ 240 ທ່ານ ແລະ ຢູ່ຕ່າງແຂວງ 466 ທ່ານ.

ນອກຈາກນີ້, ຍັງໄດ້ກະກຽມທີມປ້ອງກັນການຕິດເຊື້ອ, ບໍ່ໃຫ້ເຊື້ອແຜ່ກະຈາຍໃນວົງກວ້າງແບບມີອາຊີບໃນທ່ົວປະເທດ 263 ທ່ານ. ທີມຄຸ້ມຄອງກໍລະນີເຈັບໜັກຢູ່ຫ້ອງໄອຊີຢູ ໃນ 3 ພາກທົ່ວປະເທດ ທັງໝົດ 80 ຄົນ, ຝຶກອົບຮົມໃຫ້ທີມເມືອງ 2 ເມືອງຕໍ່ແຂວງ ລວມ 34 ເມືອງໃນທົ່ວປະເທດ ພະນັກງານເຂົ້າຮ່ວມທັງໝົດ 680 ຄົນ.


3. ດ້ານອຸປະກອນການແພດ: ແມ່ນໄດ້ຮັບການຊ່ວຍເຫຼືອຈາກພາຍໃນ ແລະ ຕ່າງປະເທດ ເລີ່ມແຕ່ປີ 2020 ຮອດປັດຈຸບັນ ໄດ້ຖືກແຈກຢາຍໄປເກືອບທົ່ວທຸກບ່ອນ ລົງຮອດໂຮງໝໍເມືອງ ແລະ ສ້າງຄູ່ມືປິ່ນປົວໄດ້ເລີ່ມແຕ່ເຫຼັ້ມ 1 ຮອດ ເຫຼັ້ມ 4 ໃນປັດຈຸບັນ, ນອກນັ້ນຍັງໄດ້ສ້າງວີດີໂອສັ້ນ ວີທີປິ່ນປົ່ວໄປຝຶກໃຫ້ທີມເມືອງຕື່ມອີກ.