ຕົກກະໃຈ! ຄ່າໄຟຈາກເຄີຍຈັກຫຼັກສິບກາຍເປັນຫຼັກລ້ານຢ່າງຕົວບໍ່ທັນ

ຕົກກະໃຈ! ຄ່າໄຟຈາກເຄີຍຈັກຫຼັກສິບກາຍເປັນຫຼັກລ້ານຢ່າງຕົວບໍ່ທັນ

10th May 2021 0 By Education

ປາໂທ!!! ອຸທານແບບບໍ່ໄດ້ຕັ້ງໃຈ ມັນມາແຕ່ໃສຄ່າໄຟຄືມາຫຼາຍແທ້ ຫຼື ວ່າໂທລະສັບມີບັນຫາ ໄທສະຫວັນບໍ່ເຂົ້າໃຈກົດເຂົ້າໄປຈະຊຳລະຄັກໆໂຕເລກອອກມາຈັກແມ່ນຫຍັງ ຈົນສຸດທ້າຍຈິ່ງຮູ້ວ່າ ມັນເປັນນຳເຕັກນິກ ຈັ່ງໃດກໍ່ເອົາໃຈຊ່ວຍທຸກຢ່າງມັນຜິດພາດກັນໄດ້.

ທັງໝົດນັ້ນ ໄຟຟ້າສະຫວັນນະເຂດຍອມຮັບວ່າເປັນຍ້ອນຂໍ້ຜິດພາດທາງເຕັກນິກ ກໍ່ຄືລະບົບທະນາຄານຂັດຂ້ອງຈິ່ງເປັນໄປຕາມທີ່ເຫັນ ແຕ່ໄຟຟ້າເອງກໍ່ບໍໄດ້ນີ້ງນອນໃຈ ຈະຮີບຮ້ອນແກ້ໄຂໃຫ້ໄວທີ່ສຸດ.

ອີງຕາມແຈ້ງການດ່ວນ, ຂອງລັດວິສາຫະກິດໄຟຟ້າລາວ ສາຂາ ແຂວງສະຫວັນນະເຂດ ເຖິງລູກຄ້າທີ່ຊໍາລະຄ່າກະແສໄຟຟ້າ ຜ່ານລະບົບທະນາຄານໃຫ້ຮັບຊາບວ່າ ເກີດຂໍ້ຂັດຂ້ອງທາງດ້ານຂໍ້ມູນການຄິດໄລ່ເງິນຂອງລູກຄ້າ, ເຮັດໃຫ້ຈຳນວນຍອດເງິນຂອງລູກຄ້າມີຄ່ານໍາໃຊ້ກະແສໄຟຟ້າສູງຜິດປົກກະຕິ.

ສະນັ້ນ ທາງສາຂາລັດວິສາຫະກິດໄຟຟ້າລາວແຂວງສະຫວັນນະເຂດ ກໍາລັງດໍາເນີນການແກ້ໄຂລະບົບຂໍ້ມູນ ຂອງລູກຄ້າໃຫ້ສໍາເລັດ ແລະ ກັບຄືນມາໃຊ້ງານເປັນປົກກະຕິ.

ດັ່ງນັ້ນ, ຈຶ່ງແຈ້ງມາຍັງຜູ້ຊົມໃຊ້ໄຟຟ້າທຸກທ່ານ ພາຍໃນ ແຂວງສະຫວັນນະເຂດ ເພື່ອຮັບຊາບ ແລະຂໍອະໄພໃນຄວາມບໍ່ສະດວກມານະທີ່ນີ້ດ້ວຍ, ຖ້າຫາກວ່າບັນດາທ່ານມີຂໍ້ສົງໄສ ຫຼື ຂໍ້ມູນການຊົມໃຊ້ໄຟບໍ່ຖືກຕ້ອງ ໃຫ້ເຂົ້າມາພົວພັນກັບ ສາຂາລັດວິສາຫະກິດໄຟຟ້າລາວ ແຂວງສະຫວັນນະເຂດ ແລະ ສູນບໍລິການປະຈໍາເມືອງ ຕ່າງໆ.