ຂ່າວດີ! ໂດຍສານແລ່ນໄດ້ແລ້ວ ທັງທາງບົກ ແລະ ອາກາດ ຈາກນະຄອນຫຼວງວຽງຈັນ ຫາ ຕ່າງແຂວງ

ຂ່າວດີ! ໂດຍສານແລ່ນໄດ້ແລ້ວ ທັງທາງບົກ ແລະ ອາກາດ ຈາກນະຄອນຫຼວງວຽງຈັນ ຫາ ຕ່າງແຂວງ

4th June 2021 0 By Education

ໃນວັນທີ 4 ມິຖຸນາ 2021 ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຖະແຫຼງຂ່າວກ່ຽວກັບ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດ ໂຄວິດ-19 ໃນໄລຍະວັນທີ 05-19 ມິຖຸນາ 2021.

ໃນບົດຖະແຫຼງຂ່າວແມ່ນປະກອບໄປດ້ວຍ 8ມາດຕະການໃຫ້ສືບຕໍ່ປະຕິບັດ ແລະ ມີ 12 ມາດຕະການຜ່ອນຜັນດ້ວຍກັນ.

ທັ້ງນີ້, ແອັດເຊື່ອວ່າ ມາດຕະການຜ່ອນຜັນທີ່ຫຼາຍຄົນຢາກຮູ້ໃນຕອນນີ້ແມ່ນເລື່ອງການຂົນສົ່ງໂດຍສານທາງບົກ ແລະ ທາງອາກາດເພື່ອເດີນທາງເຂົ້າ-ອອກລະຫວ່າງນະຄອນຫຼວງວຽງຈັນ ແລະ ບັນດາແຂວງ ໃນທົ່ວປະເທດ.

ເຊິ່ງໃນນີ້, ມາດຕະການຜ່ອນຜັນກ່ຽວກັບການເດີນທາງເຂົ້າ-ອອກມີດ້ວຍກັນ 3ຂໍ້ຄື ອະນຸຍາດໃຫ້ເດີນທາງເຂົ້າ-ອອກ ຢູ່ພາຍໃນທ້ອງຖິ່ນ ທີ່ບໍ່ມີການລະບາດໃນຊຸມຊົນ ໄດ້ປົກກະຕິ.

ອະນຸຍາດໃຫ້ດຳເນີນການຂົນສົ່ງໂດຍສານທາງບົກລະຫວ່າງແຂວງຕໍ່ແຂວງທີ່ບໍ່ມີການລະບາດໃນຊຸມຊົນໄດ້ໂດຍບໍ່ໃຫ້ກັກໂຕ, ແຕ່ຕ້ອງປະຕິບັດຕາມມາດຕະການ ຂອງຄະນະສະເພາະກິດ ວາງອອກຢ່າງເຂັ້ມງວດ ເປັນຕົ້ນ ແທກອຸນຫະພູມ, ການຮັກສາໄລຍະຫ່າງ ຢ່າງໜ້ອຍ 01 ແມັດ, ໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດ ໃສ່ສະບູ ຫຼື ເຈລລ້າງມື ຄັກແນ່.

ອີກມາດຕະການຜ່ອນຜັນແມ່ນ ອະນຸຍາດການຂົນສົ່ງໂດຍສານທາງບົກ ແລະ ທາງອາກາດ ລະຫວ່າງນະຄອນຫຼວງວຽງຈັນ ກັບບັນດາແຂວງທົ່ວປະເທດ ສຳລັບຜູ້ໂດຍສານທີ່ສັກວັກຊີນ ຄົບ 02 ເຂັມ ໄດ້ 01 ເດືອນຂຶ້ນໄປ ໂດຍບໍ່ໃຫ້ມີການກັກໂຕ 14 ວັນ, ແຕ່ພະນັກງານສາຍການບິນ, ພະນັກງານລົດຂົນສົ່ງ ຕ້ອງມີຄວາມຮັບຜິດຊອບໃນການແທກອຸນຫະພຸມ, ກວດກາການໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດ ໃສ່ສະບູ ຫຼື ເຈລລ້າງມື.