ໂຄວິດຍັງບໍ່ເວັ້ນການບິນລາວຫ່ວງຜູ້ໂດຍສານ ຂໍເລື່ອນທຸກເສັ້ນບິນໄປກ່ອນ

ໂຄວິດຍັງບໍ່ເວັ້ນການບິນລາວຫ່ວງຜູ້ໂດຍສານ ຂໍເລື່ອນທຸກເສັ້ນບິນໄປກ່ອນ

7th June 2021 0 By Education

ອົດກັນອີກເຊັ່ນເຄີຍ ສຳລັບການເດີນທາງຈາກນະຄອນຫຼວງວຽງຈັນໄປຕ່າງແຂວງ ແລະຕ່າງແຂວງເຂົ້າມາ ເນື່ອງຈາກທັງຫຼົດໂດຍສານ ແລະສາຍການບິນລ້ວນປະກາດເລື່ອງການໃຫ້ບໍລິການຢ່າງບໍ່ມີກຳນົດ ເພາະເປັນຫ່ວງຜູ້ໂດຍສານ.

ເຊິ່ງກ່ອນໜ້ານີ້ທາງສະຖານີຂົນສົ່ງໂດຍສານສາຍໃຕ້ໄດ້ປະກາດຢຸດການບໍລິການເປັນການຊົ່ວຄາວ ເນື່ອງຈາກຄົນສ່ວນໃຫຍ່ທີ່ໄປໃຊ້ບໍລິການບໍໄດ້ຮັບວັກຊີນເທື່ອ ແລະຫຼ້າສຸດນີ້ ລັດວິສາຫະກິດການບິນລາວກໍ່ໄດ້ອອກແຈ້ງການສືບຕໍ່ເລື່ອນການປະຕິບັດຖ້ຽວບິນພາຍໃນປະເທດຕື່ມອີກ.

ໃນແຈ້ງການຂອງລັດວິສາຫະກິດການບິນລາວລະບຸວ່າ ອີງຕາມແຈ້ງການສະບັບເລກທີ 595/ຫສນຍ, ລົງວັນທີ 04 ມິຖຸນາ 2021,ວ່າດ້ວຍການສືບຕໍ່ປະຕິບັດມາດຕະການປ້ອງກັນ,ຄວບຄຸມ ແລະ ສະກັດກັ້ນການລະບາດຂອງພະຍາດ COVID-19. ແລະ ເນື່ອງຈາກຍັງມີຂໍ້ຈຳກັດໃນການເດີນທາງຫຼາຍຢ່າງ ລັດວິສາຫະກິດການບິນລາວຈິ່ງເຫັນວ່າ ມີຄວາມຈຳເປັນຕ້ອງສືບຕໍ່ເລື່ອນການປະຕິບັດຖ້ຽວບິນພາຍໃນປະເທດທຸກເສັ້ນທາງຈົນກວ່າຈະມີການແຈ້ງປ່ຽນແປງໃໝ່.

ແຕ່ທາງລັດວິສາຫະກິດການບິນລາວສາມາດໃຫ້ບໍລິການແບບເຊົ່າເໝົາລຳໄດ້ ຕາມເງື່ອນໄຂທີ່ທາງຄະນະສະເພາະກິດໄດ້ວາງອອກ ສ່ວນເງື່ອນໄຂ ແລະ ລາຍລະອຽດແມ່ນຈະແຈ້ງໃຫ້ຊາບຕາມພາຍຫຼັງ.

ແນວໃດກໍ່ຕາມ ຈຳນວນຜູ້ຕິດເຊື້ອຢູ່ປະເທດເຮົາແມ່ນນັບມື້ຫຼຸດລົງແລ້ວ ຖ້າປະຊາຊົນທຸກຄົນຮ່ວມມືກັນ ຫວັງວ່າອີກບໍດົນ ສປປ ລາວເຮົາຈະກັບຄືນສູ່ສະພາບປົກກະຕິໄດ້.