ດີໃຈຕົວເລກຜູ້ຕິດເຊື້ອໂຄວິດ-19 ໃກ້ເປັນສູນ ແຕ່ເສົ້າໃຈຍັງຊອກຫາຜູ້ຕິດເຊື້ອ 1ຄົນມື້ນີ້ບໍ່ໄດ້ເທື່ອ

ດີໃຈຕົວເລກຜູ້ຕິດເຊື້ອໂຄວິດ-19 ໃກ້ເປັນສູນ ແຕ່ເສົ້າໃຈຍັງຊອກຫາຜູ້ຕິດເຊື້ອ 1ຄົນມື້ນີ້ບໍ່ໄດ້ເທື່ອ

9th June 2021 0 By Education

ນັບວ່າເປັນຂ່າວດີໃນຮອບຫຼາຍເດືອນທີ່ຜ່ານມາ ເມື່ອຕົວເລກຜູ້ຕິດເຊື້ອໂຄວິດ-19 ໃນລາວເລີ່ມຫຼຸດລົງ ໂດຍມີນີ້ ພົບຜູ້ຕິດເຊື້ອໂຄວິດ-19 ໃໝ່ ພຽງ 1ກໍລະນີ ແຕ່ສຸດເສົ້າໃຈເມື່ອຕອນນີ້ຍັງຊອກຕົວຜູ້ກ່ຽວບໍ່ເຫັນ ວອນສັງຄົມຊ່ວຍກັນຕາມຫາ ໃຫ້ຜູ້ກ່ຽວເຂົ້າຮັບການປິ່ນປົວ ເພື່ອຫຼີກເວັ້ນການແຜ່ເຊື້ອໄປເປັນວົງກວ້າງ.

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ໂຄວິດ-19 ຖະແຫຼງຂ່າວ ປະຈຳວັນພູດ ວັນທີ 09 ມີຖຸນາ ປີ 2021 ພົບຜູ້ຕິດເຊື້ອໂຄວິດ-19 ເພີ່ມອີກ 1ກໍລະນີ ເຮັດໃຫ້ຍອດສະສົມເພີ່ມເປັນ
1.971 ກໍລະນີ. ຂະນະດຽວກັນ ປິ່ນປົວຫາຍດີແລ້ວ 1.795 ກໍລະນີ, ກໍາລັງປິ່ນປົວ 173 ກໍລະນີ ແລະ ມີຜູ້ເສຍຊີວິດ 3ຄົນ.

ທ່ານ ດຣ ນາງ ລັັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ໃຫ້ຮູ້ວ່າ: ວັນທີ 8 ມິຖຸນາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.401 ຕົວຢ່າງ ກວດພົບຜູ້ຕິດເຊື້ອທັງໝົດ 1 ກໍລະນີ, ທັງໝົດແມ່ນຈາກນະຄອນຫຼວງວຽງຈັນ ແລະ ແມ່ນກໍລະນີຕິດເຊື້ອໃນຊຸມຊົນ ຕິດເຊື້ອຈາກການສຳຜັດໃກ້ຊິດກັບຜູ້ຕິດເຊື້ອເກົ່າ.

ທັ້ງນີ້ກ່ຽວກັບຜູ້ຕິດເຊື້ອກໍລະນີຫຼ້າສຸດນີ້ ຜູ້ກ່ຽວຍັງບໍ່ໄດ້ເຂົ້າຮັບການປິ່ນປົວ ເນື່ອງຈາກໃນຕອນທີ່ໄປກວດຫາເຊື້ອໂຄວິດ-19 ຜູ້ກ່ຽວໃຫ້ຂໍ້ມູນຕິດຕໍ່ ແລະ ທີ່ຢູ່ບໍ່ຖືກຕ້ອງຊັດເຈນ ຈຶ່ງເຮັດໃຫ້ບໍ່ສາມາດນໍາຕົວຜູ້ກ່ຽວໄດ້.

ດັ່ງນັ້ນ ຕອນນີ້ຄະນະສະເພາະກິດຈຶ່ງປະກາດຕາມຫາຕົວຜູ້ກ່ຽວ ໂດຍມີຂໍ້ມູນພຽງ ຜູ້ກ່ຽວເປັນເພດຊາຍ ອາຍຸ 57 ປີ ອາຊີບເປັນແປພາສາ, ວອນສັງຄົມຊ່ວຍຕາມຫາຜູ້ກ່ຽວ ຫຼື ຫາກຜູ້ກ່ຽວເຫັນການປະກາດຕາມຫານີ້ ແມ່ນໃຫ້ຮິບຮ້ອນປະສານຫາທ່ານໝໍ ເພື່ອເຂົ້າຮັບການປິ່ນປົວໂດຍດ່ວນ ທັງເປັນການຫຼີກເວັ້ນການແຜ່ເຊື້ອໄປບ່ອນອື່ນ.

ຫາກໃຜພົບເຫັນ, ຮູ້ຈັກ ຫຼື ມີຂໍ້ມູນກ່ຽວກັບຜູ້ກ່ຽວ ແມ່ນໃຫ້ປະສານງານຫາ ດຣ ວຽງສາຄອນ ຫຼວງປະດິດ ໂທ: 020 9409 5533.