ຊ່ວຍຄອບຄົວນີ້ແດ່! ໜຸ່ມໂພສຂໍຄວາມຊ່ວຍເຫຼືອ ຫາປັດໃຈປິ່ນປົວຫວັງຕໍ່ລົມຫາຍໃຈໃຫ້ເມຍທີ່ຮັກໄດ້ກັບເຮືອນຫາລູກ

ຊ່ວຍຄອບຄົວນີ້ແດ່! ໜຸ່ມໂພສຂໍຄວາມຊ່ວຍເຫຼືອ ຫາປັດໃຈປິ່ນປົວຫວັງຕໍ່ລົມຫາຍໃຈໃຫ້ເມຍທີ່ຮັກໄດ້ກັບເຮືອນຫາລູກ

11th June 2021 0 By Education

ເປັນອີກເລື່ອງລາວໜຶ່ງທີ່ແອັດເຫັນແລ້ວສະເທືອນໃຈນໍາ ຈາກຄົນທີ່ໃຊ້ຊີວິດປົກກະຕິ ບໍ່ມີສັນຍານເຕືອນຫຍັງກ່ຽວກັບອາການເຈັບປ່ວຍທີ່ເປັນ ແຕ່ຕ້ອງມາລົ້ມປ່ວຍກະທັນຫັນ ຄອບຄົວບໍ່ທັນຕັ້ງຕົວ ຕ້ອງຫາເງິນປິ່ນປົວກັນໃຫ້ຫາຍໃຈໄດ້ໄປແຕ່ລະມື້ ຈົນຕອນນີ້ ຜູ້ເປັນສາມີຕ້ອງອອກມາຂໍຄວາມຊ່ວຍເຫຼືອຈາກສັງຄົມ ຫວັງໄດ້ເງິນຕໍ່ລົມຫາຍໃຈໃຫ້ເມຍທີ່ຮັກ.

ເລື່ອງລາວທີ່ແອັດກ່າວມາຂ້າງເທິງ ແມ່ນເກີດຂຶ້ນກັບ ຄອບຄົວໜຶ່ງ ເຊິ່ງຜູ້ເປັນຜົວຂອງຄົນເຈັບ ໂດຍໃຊ້ເຟສບຸກຊື່ ຈັນທະວົງສາ ງານຊ່າງທົ່ວໄປ ໄດ້ອອກມາໂພສເລົ່າເລື່ອງລາວທີ່ເກີດຂຶ້ນກັບຄອບຄົວ ພ້ອມຂໍຄວາມຊ່ວຍເຫຼືອຈາກສັງຄົມໄວ້ວ່າ: ດ້ວຍເຈດຈຳນົງຂອງຂ້າພະເຈົ້າບໍ່ແມ່ນວ່າເປັນຄົນທີ່ບໍ່ຍອມຮັບຄວາມຈິງຂອງເຫດການທີ່ເກີດຂື້ນເພາະມັນກໍ່ເປັນເຫດການທີ່ໜ້າຕົກໃຈ ແລະ ເສຍຂວັນພໍສົມຄວນ.

ເພາະຈາກຄົນປົກກະຕິທຸກຢ່າງເລີ່ມເປັນໄຂ້ 2ມື້ແລະມື້ທີ 3ໄປຫາຫມໍໃສ່ຢາໃສ່ນ້ຳແລະເລີ່ມຄຸມສະຕິໂຕເອງບໍ່ຢູ່ເລີ່ມລຸກໆນັ່ງໆນອນໆຢ່າງໆອາການຫຸນຫວຍພໍມື້ທີ່4 ປະສາດຫູຕາເລີ່ມບໍ່ຮັບຮູ້ແລະບໍ່ຕອບສະຫນອງຂອງຄົນລອບຂ້າງແລະພໍຕອນກາງຄືນກາເລີ່ມຊ໊ອກເລີ່ມດິ້ນແລະມື້ທີ 5ຕ້ອງສົ່ງຫ້ອງມໍລະສຸມຫລືຫ້ອງໄອຊີຍູ ແລະບໍ່ຮູ້ໂຕເອງເລີຍແຕ່ມື້ນັ້ນມາ.

3ມື້ຕໍ່ມາທ່ານຫມໍໄດ້ແຈ້ງວ່າເມຍຂ້າພະເຈົ້າເປັນໂລກເຫຍື້ອຫຸ້ມສະຫມອງອັກເສບຢີ່ປຸ່ນຫລືໂລກຈີອີ ແລະທີ່ສຳຄັນໂລກແບບນີ້ຍັງບໍ່ມີຢາຮັກສາແລະຮັກສາບໍ່ໄດ້ແລະເມຍເຈົ້າກໍ່ເປັນຄົນທີ່2ໃນລາວຄົນທີແລກກໍ່..ບໍ່…ແລະຕອນນີ້ເມຍເຈົ້າຢູ່ໄດ້ເພາະເຄື່ອງຊ່ອຍຫາຍໃຈຊື່ໆແຕ່ຫມໍກາບໍ່ກາລັນຕີວ່າຖ້າຖອດອ໊ອກຊີເຄື່ອງຊ່ອຍຫາຍໃຈແລ້ວລາວສິເປັນແບບໃດ.

ບາງເທື່ອກໍ່ເປັນເຈົ້າຍິງນິທາໄປເລີຍຫລືບາງເທື່ອກໍ່ເປັນບ້າໄປເລີຍແລະບາງເທື່ອອາດຈະຂາດໃຈໄປເລີຍແລະຫມໍກໍ່ຍັງວ່າບໍ່ໄດ້. ທັ້ງນີ້ ດ້ວຍເຈດຕະນາຂອງຂ້າພະເຈົ້າເອງກໍ່ຄິດວ່າຢາກເບິ່ງອາການໃຫ້ດີຂື້ນແລ້ວຫາຍໃຈເອງໄດ້ແລ້ວຈຶ່ງສິຖອດອ໊ອກຊີແລ້ວເມືອບ້ານໄປຫາລູກຫາເຕົ້າກ່ອນເພາະຢາກໃຫ້ລູກໆໄດ້ເຫັນຫນ້າແມ່ແລະໃຫ້ແມ່ໄດ້ເຫັນຫນ້າລູກໆກ່ອນ ກ່ອນສິເປັນຫຍັງໄປ.

ພ້ອມນີ້ ຜູ້ໂພສຂໍ້ຄວາມດັ່ງກ່າວ ຍັງເວົ້າເຖິງປະເດັນການຫາເງິນມາປິ່ນປົວເມຍວ່າ: ຂໍອະທິບາຍເລື່ອງຂວັນຂວາຍຫາເງິນມາຮັກສາເມຍຂອງຂ້າພະເຈົ້ານີ້ລະແມ່ນວ່າຖ້າມີພໍ່ແມ່ອ້າຍເອື້ອຍນ້ອງຫມູ່ຄູ່ພໍສິໃຫ້ຍືມເຮົາກໍ່ສິຂໍຍືມພາຍໃນ3ເດືອນເພາະເຮົາກາເຮັດວຽກເຮັດງານໄດ້ປົກກະຕິ ຖ້າບໍ່ຕິດໂຄວິດແລະເມຍເຮົາເປັນແບບນີ້ເຮົາກໍ່ຄືສິບໍ່ລົບກວນໃຜໃຫ້ເດືອດຮ້ອນດອກ.

ແຕ່ມັນເກີດເຫດການແບບນີ້ເຮົາກໍ່ຄົງຕ້ອງຫາທາງອອກທີ່ດີໃຫ້ກັບລູກເມຍເພາະໃຫ້ສົມກັບວ່າເປັນຜູ້ນຳຂອງຄອບຄົວ ແຕ່ຖ້າບໍ່ມີບ່ອນຍືມກໍ່ຈະເຖິງຂັ້ນທີ່2ຄືຂໍຈຳນຳເອົາເງິນມາຮັກສາເມຍກ່ອນແຕ່ຖ້າກໍລະນີຈຳນຳ ບໍ່ເຫມາະສົມ ຫລືຍຸ້ງຍາກກໍ່ຈະເຂົ້າຂັ້ນທີ3ຄືຂາຍໃຫ້ເລີຍ ແລະຕອນນີ້ຍັງບໍ່ຮູ້ຢູ່ວ່າຢູ່ຊ່ວງ1ຫລື2ຢູ່ເດີ້ເຈົ້າ.

ຈັ່ງໃດກາຂໍຂອບໃຈຫລາຍໆທີ່ທຸກຄົນໃຫ້ການຊ່ອຍເຫລືອແລະໃຫ້ຄວາມອະນຸເຄາະມາຕະຫລອດ, ຖ້າຫາກວ່າໃຜຢາກຮ່ວມຊ່ອຍການຮັກສາບໍ່ວ່າພັນກີບຫລືຫ້າພັນຫລືສິບພັນກາຮ່ວມໄດ້ເດີ້ເຈົ້າແຕ່ເຮົາຈະບໍ່ມີຜົນຕອບແທນໃດໆຄືນນອກຈາກຄຳວ່າຂໍຂອບໃຈແລະຂໍຂອບໃຈແລະກາຂໍຂອບໃຈຫລາຍໆເທົ່ານັ້ນ ທີ່ທຸກທ່ານໃຫ້ຄວາມຮ່ວມມືມາຕະຫລອດແລະໃຫ້ການອະນຸເຄາະແບບເຫັນອົກເຫັນໃຈຕະຫລອດມາຂໍຂອບໃຈຫລາຍໆເຈົ້າ ກາສິເປັນຄວາມຊົງຈຳດີໆຕະຫລອດໄປເຈົ້າ ແລະໃຫ້ເຮົາຮູ້ວ່າ ເຮົາບໍ່ໄດ້ຢູ່ຄົນດຽວໃນໂລກໃບນີ້ແລະພ້ອມມີຄົນຈະໃຫ້ຄວາມຮັກຄວາມເມດຕາສະເຫມີ ຂໍຂອບໃຈເຈົ້າ.