ກຳລັງ 1000 ຄົນບໍ່ໜ້ອຍ ແຕ່ໄຊຍະບູລີຈັດໃຫ້ຈົນໄດ້ ຊ່ວຍປະຊາຊົນອະນາໄມເຮືອນຊານ

ກຳລັງ 1000 ຄົນບໍ່ໜ້ອຍ ແຕ່ໄຊຍະບູລີຈັດໃຫ້ຈົນໄດ້ ຊ່ວຍປະຊາຊົນອະນາໄມເຮືອນຊານ

15th June 2021 0 By Education

ໄພນ້ຳຖ້ວມສ້າງຄວາມເສຍຫາຍຫຼາຍສົມຄວນແກ່ບ້ານເຮືອນຂອງປະຊາຊົນຫຼາຍເມືອງໃນແຂວງໄຊຍະບູລີ ເພື່ອເປັນການຕອບໂຕ້ກັບໄພນໍ້າຖ້ວມໂດຍສະເພາະແມ່ນການອະນາໄມບ້ານເຮືອນທີ່ຖືກນໍ້າຖ້ວມໃຫ້ກັບສູ່ສະພາບປົກກະຕິໂດຍໄວ, ການນໍາພັກ-ລັດທຸກພາກສ່ວນຂອງແຂວງ ໄຊຍະບູລີ ໄດ້ມີການປຶກສາຫາລື ແລະ ແບ່ງຄວາມຮັບຜິດຊອບໃຫ້ຄະນະຄຸ້ມຄອງໄພພິບັດຂັ້ນແຂວງໃນການລົງຊ່ວຍ ເຫຼືອປະຊາຊົນບ້ານຕ່າງໆທີ່ຖືກຜົນກະທົບຈາກໄພນໍ້າຖ້ວມ.

ບັນຫາໜ້າວຽກທີ່ຕ້ອງໄດ້ເລັ່ງຈັດການຢ່າງເລັ່ງດ່ວນຄື ການເກັບກໍາຂໍ້ມູນຜົນເສຍຫາຍຢູ່ແຕ່ລະຄອບຄົວ-ແຕ່ລະບ້ານຢ່າງລະອຽດ, ວ່ອງໄວ, ຊັດເຈນ, ສ້ອມແປງລະບົບໄຟຟ້າ, ນໍ້າປະປາໃຫ້ໃຊ້ໄດ້ປົກກະຕິ ຊ່ວຍອະນາໄມບ້ານ-ເຮືອນປະຊາຊົນ, ເບິ່ງແຍງດ້ານສຸຂະພາບ, ສ້ອມ ແປງທາງທີ່ເປ່ເພໃຫ້ທຽວໄດ້ຊົ່ວຄາວ, ຊ່ວຍເຫຼືອດ້ານອາຫານການກິນທີ່ຈໍາເປັນເຊັ່ນ: ນໍ້າດື່ມ-ນໍ້າໃຊ້, ເຂົ້າ ສານ, ອາຫານແຫ້ງທີ່ສາມາດບໍລິໂພກງ່າຍ.

ສະເພາະວັນທີ 15 ມິຖຸນາ ປີນີ້ ທີ່ຫ້ອງວ່າການແຂວງ ກໍໄດ້ເຕົ້າໂຮມກໍາລັງເພື່ອເຂົ້າຊ່ວຍປະຊາຊົນໃນການອະນາໄມເຮືອນຊານບ້ານຊ່ອງ ຊຶ່ງມີກໍາລັງ ທັງໝົດ 1.000 ກວ່າຄົນ.


ໃນນັ້ນ ປະກອບມີ ຈາກກໍາລັງ ປກສ ແຂວງ, ທະຫານແຂວງ, ກອງພົນທະຫານຮາບທີ 2, ທະຫານຈາກແຂວງຫຼວງພະບາງ ແລະ ກໍາລັງຊາວໜຸ່ມຈາກບັນດາພະແນກການອ້ອມຂ້າງແຂວງ, ໂດຍໄດ້ແບ່ງລົງບ້ານທີ່ຖືກນໍ້າຖ້ວມໜັກ ຈໍານວນ 16 ບ້ານ ຈາກ 39 ບ້ານທີ່ຖືກນໍ້າຖ້ວມໃນທົ່ວເມືອງ ໄຊຍະບູລີ ຊຶ່ງແຕ່ລະບ້ານແມ່ນມີການນໍາຂອງແຂວງ ແລະ ເມືອງ ໄຊຍະບູລີ ລົງຕິດຕາມ ແລະ ນໍາພາຕົວຈິງ.


ນອກນີ້ຍັງມີຜູ້ປະກອບການພາຍໃນແຂວງ ແລະ ແຂວງຫຼວງພະບາງ ນໍາລົດຜະລິດນໍ້າດື່ມເຄື່ອນທີ່ເພື່ອແຈກຈ່າຍນໍ້າດື່ມໃຫ້ປະຊາຊົນ, ໂອກາດດັ່ງກ່າວ ທ່ານພົງສະຫວັນ ສິດທະວົງ ເຈົ້າແຂວງໄຊຍະບູລີ ກໍ່ໄດ້ຮຽກໃຫ້ກໍາລັງທຸກພາກສ່ວນທີ່ຈະລົງຊ່ວຍເຫຼືອປະຊາຊົນໃນມື້ນີ້ຈົ່ງຕັ້ງໃຈໃນການໃຫ້ການຊ່ວຍເຫຼືອຢ່າງແທ້ຈິງ ເປັນຕົ້ນແມ່ນການອະນາໄມເຮືອນຊານຂອງປະຊາຊົນ, ການຍູ້ດິນຕົມອອກເຮືອນ, ຂົນສິ່ງເສດເຫຼືອທີ່ມາກັບນໍ້າໃຫ້ແລ້ວໂດຍໄວເພື່ອໃຫ້ປະຊາຊົນໄດ້ກັບມາໃຊ້ຊີວິດປົກກະຕິ, ເຮັດດ້ວຍຄວາມເຕັມໃຈຢ່າງແທ້ຈິງໃຫ້ສົມກັບວ່າ ທະຫານຂອງປະຊາຊົນ.

ພ້ອມນີ້ຍັງຮຽກຮ້ອງໃຫ້ເຈົ້າໜ້າທີ່ຕໍາຫຼວດຈົ່ງແບ່ງກໍາລັງລົງປ້ອງກັນຄວາມສະຫງົບຮອບດ້ານເພື່ອປ້ອງກັນພວກຂີ້ລັກງັດແງະທີ່ສວຍໂອກາດໃນຍາມວິກິດແບບນີ້. ຈາກນັ້ນ ທ່ານເຈົ້າແຂວງພ້ອມການນໍາ ພັກ-ລັດ ກໍໄດ້ລົງກວດກາເບິ່ງຄວາມເສຍຫາຍຂອງປະຊາຊົນ ແລະ ການໃຫ້ການຊ່ວຍເຫຼືອຂອງແຕ່ລະກໍາລັງຢູ່ແຕ່ລະບ້ານ.

ພາບຫຼັງນ້ຳຖ້ວມ ລຽບຕາມສາຍນ້ຳຮຸ່ງ


(ຂ່າວ-ພາບ: ອຸ່ນເຮືອນ ໂພທິລັກ)